ەرلان قارين قىزىلوردا وبلىسىنىڭ تۇرعىندارىمەن كەزدەستى

الدىمەن مەملەكەتتىك حاتشى مەن ۇلتتىق كەڭەس مۇشەلەرى قىزىلوردا وبلىسىنىڭ اكتيۆىمەن جۇزدەستى. وبلىس اكىمى نۇرلىبەك نالىباەۆ ءوڭىردىڭ ەكونوميكالىق دامۋىنىڭ نەگىزگى باعىتتارى مەن الەۋمەتتىك ماڭىزى بار ينفراقۇرىلىمدىق جوبالاردىڭ جۇزەگە اسىرىلۋىنا توقتالدى.

ءوز كەزەگىندە, مەملەكەتتىك حاتشى كونستيتۋتسيالىق رەفورمانىڭ نەگىزگى باعىتتارى تۋرالى ايتتى.

كەزدەسۋدە ۇقسك مۇشەسى مۇرات ابەنوۆ كونستيتۋتسيالىق رەفورماعا قاتىستى تۇسىندىرمە بەردى. ول ساياسي رەفورمالار مەن كونستيتۋتسيالىق وزگەرتۋلەردى ازىرلەۋ بارىسىنداعى تالقىلاۋلارعا ساراپشىلار مەن قوعام قايراتكەرلەرىنىڭ, ونىڭ ىشىندە ۇلتتىق كەڭەس مۇشەلەرىنىڭ قاتىسقانىن جەتكىزدى. سونىمەن قاتار, كونستيتۋتسيالىق رەفورمانى ازىرلەۋدىڭ ءار كەزەڭىندە قوعامدىق تالقىلاۋلار جۇرگىزىلدى. ناتيجەسىندە جۇرتشىلىق ۇسىنىس-پىكىرلەرىنىڭ باسىم بولىگى ەسكەرىلدى.

سونىمەن قاتار, مەملەكەتتىك حاتشى مەن ۇقسك مۇشەلەرى شىعارماشىلىق زيالى قاۋىم وكىلدەرى جانە وبلىستىڭ قوعامدىق كەڭەس مۇشەلەرىمەن كەزدەستى. جيىندا ءبىلىم, مادەنيەت جانە وسكەلەڭ ۇرپاققا رۋحاني-پاتريوتتىق تاربيە بەرۋ ماسەلەلەرى كوتەرىلدى. قوعام وكىلدەرى ەلىمىزدە جۇرگىزىلىپ جاتقان ساياسي رەفورمالار مەن جالپىحالىقتىق رەفەرەندۋم وتكىزۋدىڭ ماڭىزدىلىعىن اتاپ ءوتتى.

ودان كەيىن قىزىلوردا وبلىسىنىڭ قوعامدىق كەڭەس مۇشەلەرىمەن كەزدەسۋ ءوتتى. كەزدەسۋدە قوعام بەلسەندىلەرى, ساراپشىلار جانە مەملەكەتتىك قىزمەتكەرلەر اراسىنداعى ءوزارا ءىس-قيمىلدىڭ تيىمدىلىگىن ارتتىرۋ جايىندا اڭگىمە قوزعالدى.

بۇدان سوڭ ەرلان قارين ءوڭىردىڭ بەلسەندى جاستارىمەن كەزدەستى. كەزدەسۋگە قاتىسۋشىلار جۇمىسپەن قامتۋ جانە جاستارعا ارنالعان الەۋمەتتىك قولداۋ باعدارلامالارىنىڭ ورىندالۋ جايىن تالقىلادى. ءوز كەزەگىندە مەملەكەتتىك حاتشى پرەزيدەنت جانىنداعى جاستار ساياساتى جونىندەگى كەڭەستىڭ قىزمەتىنە توقتالىپ, جاس بۋىننىڭ ەلدەگى قوعامدىق-ساياسي ومىرگە ارالاسۋىنىڭ ماڭىزدىلىعىن اتاپ ءوتتى.

جالپى, كەزدەسۋلەر اياسىندا ايماقتىڭ قوعام بەلسەندىلەرى كونستيتۋتسياعا ەنگىزىلەتىن وزگەرتۋلەر مەن جالپىحالىقتىق رەفەرەندۋم وتكىزۋ يدەياسىن قولدادى.