قازىر پاۆلودار قالاسىنىڭ بيلىگى شىبىن-شىركەيدىڭ ماسەلەسىمەن الەك. شالىس باسسا, تۇرعىنداردىڭ نالاسىنا ۇشىرايتىنىن جاقسى تۇسىنەدى. باستان وتكەن سوڭ بارىنشا قامدانىپ ءجۇر. بۇل – مەزگىل ماسەلەسى. شاھاردا ودان دا ماڭىزدى پروبلەمالار از ەمەس. جىلۋ قۇبىرلارىنىڭ توزۋى, جولعا اسفالت توسەۋ سياقتى كوممۋنالدىق باعىتتاعى جۇمىستار شاشەتەكتەن. سايكەسىنشە, شاعىم دا كوپ.
باسشىلار جۇيكەسىن تاۋىسادى, باسقا جۇمىسقا اۋىسادى. ماسەلە سول كۇيىندە قالا بەرەدى. ءتىپتى جىل سايىن ۋشىعا تۇسۋدە. كوشەدەن كەز كەلگەن پاۆلودارلىقتى توقتاتىپ, «شاھاردا قانداي پروبلەما بار؟» دەپ سۇراساڭىز, كوممۋنالدىق سالا تۋرالى سايراي جونەلەتىنىنە كۇمانىمىز جوق.
بۇدان حاباردار وبلىس باسشىلىعى جۋىقتا پاۆلودار قالاسىن دامىتۋ جونىندە ۇلكەن جيىن وتكىزدى. وعان بۇرىنعى شاھار باسشىلارى ارنايى شاقىرىلىپ, ارداگەرلەردىڭ ۇسىنىس-تىلەكتەرى نازارعا الىندى. پاۆلودار قالاسىنىڭ اكىمى اسايىن بايحانوۆتىڭ ايتۋىنشا, وبلىس ورتالىعىنداعى 610 اۋلانىڭ 83 پايىزىن, ياعني 504 اۋلانى جاڭارتۋ قاجەت. ارينە, ونىڭ بارلىعىن ءبىر جىل ىشىندە جاڭارتۋ مۇمكىن ەمەس. سوندىقتان جەرگىلىكتى بيلىك بيىل ازىرگە 150 اۋلادا بالالاردىڭ ويىن جانە سپورت الاڭدارىن ورناتۋ, اسفالت جابىندىسىن اۋىستىرۋ, ورىندىقتار قويۋ, كولىك تۇراقتارىن قاراستىرۋ سياقتى شارۋالاردى تىندىرماق. بۇدان بولەك, 55 ۆوركاۋت الاڭدارى مەن كوشە ترەناجەرلارى ورناتىلادى دەپ جوسپارلانۋدا. پاۆلودارلىقتار جارىق ماسەلەسىن ءجيى كوتەرەدى. بۇگىندە 164 اۋلا تاسقاراڭعى كۇيدە ەكەن. 10 كوشەنىڭ بويىندا جارىق جەلىلەرى مۇلدەم جوق. وسى رەتتە, شاھار باسشىلىعى جىل سوڭىنا دەيىن قوسىمشا 2 250-دەن استام تىرەك باعاندارى مەن شامدار قويىلاتىنىنا سەندىرۋدە. جالپى, شاھاردىڭ ينفراقۇرىلىمىن جاڭعىرتۋعا وبلىستىق بيۋدجەتتەن 14 ملرد تەڭگە, رەسپۋبليكالىق قازىنادان 2 ملرد تەڭگە قاراجات قاراستىرىلماق. از اقشا ەمەس, ارينە. وبلىس باسشىلىعى ەندىگى جەردە مۇنداي قوماقتى قارجىنى ءتيىمدى پايدالانۋ كەرەك ەكەنىن ەسكەرتتى.
بۇگىندە وبلىس ورتالىعىنداعى جولداردىڭ 24 پايىزىنىڭ ساپاسى سىن كوتەرمەيدى. جاياۋ جۇرگىنشىلەرگە ارنالعان جولدار ەسكى تەحنولوگيامەن رەتكە كەلتىرىلەدى. بيىل 12 كوشەدەگى 25 شاقىرىمنان استام جولدى قالپىنا كەلتىرۋ ءۇشىن 13 ملرد تەڭگە جۇمسالماق. بۇعان دەيىن جەكە سەكتورداعى 174 كوشەدە مۇلدە جول بولماعان ەدى. وتكەن جىلى ونىڭ 20-سىنا اسفالت توسەلىپتى. بيىل تاعى 53 كوشەدە جاڭا جول جابىندىسى پايدا بولماق.
دامۋ جوسپارى تالقىلانعان جيىنعا قاتىسقان قوعامدىق كەڭەس مۇشەلەرى دە ۇسىنىس-پىكىرلەرىن ورتاعا سالدى. بالالاردى وڭالتۋ ورتالىقتارىن كوبەيتۋ, قوعامدىق دارەتحانالار اشۋ, قۇرىلىس ساپاسىن جاقسارتۋعا قاتىستى تالاپ-تىلەكتەر ايتىلدى.
پاۆلودار