ۇكىمەت باسشىسى ءاليحان سمايىلوۆ جۇمىس ساپارىمەن سولتۇستىك قازاقستان وبلىسىندا بولدى.
پرەمەر-مينيستر قىزىلجار اۋدانىنداعى «پەتەرفەلد-اگرو» جشس-دەگى كوكتەمگى دالا جۇمىستارىمەن تانىستى. ءا.سمايىلوۆ شارۋا قوجالىقتارىمەن جانە اگروكاسىپورىنداردىڭ باسشىلارىمەن قىزۋ سۇحبات قۇردى. ولاردىڭ سۇراعىنىڭ نەگىزگى بولىگى سالىق سالۋ, كادر دايارلاۋ, تىڭايتقىشتار مەن تۇقىم جەتكىزۋ جولدارى, استىق ءونىمىن ساتىپ الۋ باعاسى جانە سۋبسيديا ماسەلەسىنە ارنالدى.
ءا.سمايىلوۆ سولتۇستىك قازاقستاننىڭ ەلىمىزدەگى ەڭ ۇلكەن استىقتى ايماقتارىنىڭ ءبىرى ەكەنىن ايتىپ, ءوڭىردىڭ ءوندىرىستى ءارتاراپتاندىرۋدا دا الدا كەلە جاتقانىن جەتكىزدى. «ايماقتىڭ باسەكەگە قابىلەتتى اسا ءىرى كولەمدە ءونىم وندىرە الاتىن مۇمكىندىگى مەن الەۋەتى جوعارى. تەك جاڭا تەحنيكا مەن تەحنولوگيالار ەنگىزىپ, ەڭبەك ونىمدىلىگىن ۇنەمى ارتتىرا بەرۋ مىندەتىن العا قويىپ وتىرمىز. بۇل شارالار حالىقتىڭ ناقتى تابىسىن ارتتىرادى», دەدى ۇكىمەت باسشىسى.
«پەتەرفەلد-اگرو» جشس وبلىستاعى 22 كاسىپورىننىڭ ءبىرى بولىپ تاۋارلى ءسۇت فەرماسىن اشقان. قازىر ايماقتا وندىرىلگەن ءسۇتتىڭ 55 پايىزعا جۋىعى وڭدەلەدى. بۇل جەتىستىككە اتالعان كاسىپورىن دا ۇلەس قوسۋدا. سونىمەن بىرگە بيىل وبلىستا تاعى 8 تاۋارلى ءسۇت كەشەنى اشىلماق. پرەمەر-مينيستر جىل سايىن ەلىمىزدە كەمىندە 35 تاۋارلى ءسۇت فەرماسى ىسكە قوسىلىپ جاتقانىن ايتتى.
سونداي-اق ۇكىمەت باسشىسى پەتروپاۆل ەلەكتروتەحنيكالىق زاۋىتى قىزمەتىمەن تانىستى. «قىزىلجار» ەركىن ەكونوميكالىق ايماعىندا ىسكە قوسىلعان زاۋىت قازىر 1 ملرد تەڭگەنىڭ تاپسىرىسى بويىنشا جۇمىس ىستەۋدە. بۇل قاراجاتقا كاسىپورىن 4 مىڭ بىرلىك ترانسفورماتور دايىنداماق. قازىر مۇندا 80 ادام جۇمىس ىستەيدى. كاسىپورىننىڭ ديرەكتورى نۇرجان ابدوللاەۆتىڭ ايتۋىنشا, زاۋىتتا كادر ماسەلەسى وزەكتى. «مامان تاپشىلىعى سەبەپتى زاۋىت تولىق قۋاتىندا جۇمىس ىستەي الماي تۇر. زاۋىتتىڭ ءوندىرىس قۋاتى جىلىنا 13 مىڭ دانا ءونىم شىعارۋعا شاقتالعان. ازىرگە تەك جىلىنا 4 مىڭ ترانسفورماتور عانا شىعارا الامىز», دەدى ول. زاۋىت تسەحتارىن ارالاپ كورگەن پرەمەر-مينيستر كاسىپورىننىڭ جۇمىسىنا وڭ باعا بەرىپ, الداعى ۋاقىتتا قولداۋ بولاتىنىن جەتكىزدى. «مۇنداي زاۋىتتار ەكونوميكانى ءارتاراپتاندىرۋ ءۇشىن ماڭىزدى. اسىرەسە, قازىر كورشى ەلدەردە قوسىمشا نارىقتار اشىلىپ جاتىر. سوندىقتان ۇكىمەت تاراپىنان وسىنداي جوبالاردى قولداۋعا كومەك كورسەتەمىز», دەدى ول.
وڭىردە جۇزەگە اسىرىلىپ جاتقان وزگە دە جوبالار تۋرالى وبلىس اكىمىنىڭ ورىنباسارى داۋرەن جانداربەك باياندادى. ونىڭ ايتۋىنا قاراعاندا, جالپى قۇنى 320 ملرد تەڭگەنىڭ 37 جوباسى جۇزەگە اسىرىلىپ جاتىر. سونىڭ ناتيجەسىندە 4 مىڭ ادام جۇمىسپەن قامتىلىپ وتىر.
سولتۇستىكقازاقستاندىقتاردى الاڭداپ وتىرعان ءبىر ماسەلە – 2-ءشى جىلۋ-ەلەكتر ورتالىعىنىڭ جاعدايى. ناۋرىز ايىندا ونىڭ ءبىر مۇرجاسى قۇلاپ, قالانى ۇلكەن ابىگەرگە سالعان. مامىر ايىنىڭ سوڭىنا دەيىن اپاتتىڭ ورىن الۋ سەبەبى تولىعىمەن انىقتالماق. ازىرگە ەكى كومپانيادا ساراپتاۋ جۇمىستارى جۇرگىزىلىپ جاتىر. ورتالىقتىڭ جۇمىسىن قالپىنا كەلتىرۋ ءۇشىن 17 ملرد تەڭگەدەن استام قاراجات كەرەك.
ۇكىمەت باسشىسى وبلىستىڭ الەۋمەتتىك-ەكونوميكالىق دامۋى جونىندە كەڭەس وتكىزدى.
ءا.سمايىلوۆ مەملەكەت باسشىسىنىڭ تاپسىرماسى بويىنشا سولتۇستىك قازاقستان وبلىسىن 2025 جىلعا الەۋمەتتىك-ەكونوميكالىق دامۋ جوسپارىنا 1,8 ترلن تەڭگە قاراستىرىلعانىن اتاپ ءوتتى.
ء«وڭىر باسشىلىعىنىڭ الدىندا تۇرعان نەگىزگى مىندەتتەردىڭ ءبىرى – بەلگىلەنگەن جوبالاردى ۋاقىتىلى جانە ساپالى ىسكە اسىرۋ. سەبەبى بۇل الەۋمەتتىك-ەكونوميكالىق دامۋعا قوسىمشا سەرپىن بەرۋى ءتيىس. وسى ماقساتقا جەتۋ ءۇشىن ۇكىمەت تاراپىنان بارلىق قاجەتتى قولداۋ كورسەتىلىپ جاتىر», دەدى ءا.سمايىلوۆ. ول بيىل وبلىستى دامىتۋعا 108,6 ملرد تەڭگە كوزدەلگەنىن, ال بيۋدجەتتى ناقتىلاۋ كەزىندە قوسىمشا 72,7 ملرد تەڭگە بولىنەتىنىن ايتتى.
ۇكىمەت باسشىسى سونداي-اق قازىرگى گەوساياسي تۇراقسىزدىققا بايلانىستى الەمدە ازىق-ت ۇلىك تاۋارلارى باعاسىنىڭ ارتقانىمەن ءوڭىر باسشىلىعى ىشكى نارىقتاعى باعانىڭ نەگىزسىز وسۋىنە جول بەرمەۋى كەرەگىن ايتتى. «ازىق-ت ۇلىك تاپشىلىعى مەن باعا ءوسىمىن بولدىرماۋ ءۇشىن قولدا بار بارلىق تەتىكتى ءتيىمدى پايدالانۋى كەرەك. باعا 15 پايىزدان اسپاسىن», دەدى ول. سونىمەن بىرگە وڭتۇستىك وڭىرلەردەن جانە ورتالىق ازياداعى كورشى مەملەكەتتەردەن ەرتە پىسەتىن كوكونىستەردى اكەلۋ ءۇشىن تىكەلەي شارتتار جاساسۋ قاجەت ەكەنى ەسكەرتىلدى. ۇكىمەت باسشىسى ناقتى تاپسىرمالار قاتارىندا 2023 جىلدىڭ سوڭىنا دەيىن رەسپۋبليكالىق ماڭىزى بار پەتروپاۆل – قورعان تاس جولى ۋچاسكەسىن تولىق ىسكە قوسۋدى جۇكتەدى.
ءا.سمايىلوۆ جاسى 100-گە تولعان مايدانگەر ۆالەنتينا ۆولكوداۆتىڭ ۇيىنە كىرىپ, ونى جەڭىس مەرەكەسىمەن قۇتتىقتادى. 1922 جىلى تۋعان ۆ.ۆولكوداۆ 1-ءشى بەلارۋس جانە 1-ءشى ۋكراين مايداندارىندا سوعىسى, 1941 جىلدان 1945 جىلعا دەيىن سوعىستا بولعان.
سولتۇستىك قازاقستان وبلىسى