كاتونقاراعايدا ۇلتتىق تابيعي پارك قۇرىلعالى قۇرىپ كەتكەن اڭ-قۇستار كوزگە تۇسە باستادى. كەيىنگى جىلدارى اۋىل ىشىنە تۇياقتى اڭداردىڭ كىرىپ كەتۋى تاڭعالاتىنداي جاعداي ەمەس. ونى قويىپ, اۋىل ىشىندە ايۋدىڭ قونجىقتارى اسىر سالا ويناپ جۇرگەنىن دە اۋىلدىقتار كورگەن. ال بيىل كۇن جىلىنا سالا شىڭعىستاي اۋىلىنىڭ ىرگەسىنە قوس اققۋ قونىپتى.
مۇنى اۋىلدىقتار جاقسىلىققا بالاپ وتىر. بۇرىندارى دا كوكتەم شىعا اققۋ قۇسى وزەن-كولدەردىڭ جاعاسىنا قوناتىن. ال اۋىل ىرگەسىندەگى ايدىندا تۇڭعىش رەت الاڭسىز تەربەلىپ ءجۇر. ادامنان ۇرىكپەيدى. سوعان قاراعاندا قالىڭ جىنىس اراسىنا ۇيا سالىپ, بالاپان باسىپ جاتقان كورىنەدى.
– باياعىدا اۋىلدىڭ ىرگەسىنە قاراقۋ كەلىپ قونعان ەكەن. ونى ءبىز كورگەن جوقپىز, ۇلكەندەر ايتىپ وتىرادى. كەيىن جوعالىپ كەتىپتى. ال اققۋ ءبىرىنشى رەت قوندى. اۋىلدا بۇرىنعىداي اسىر سالعان بالا از, گۇرىلدەگەن تەحنيكا جوق. ونىڭ ۇستىنە پاركتىڭ اۋماعى. ەشكىم ۇركىتپەيدى. ونى قۇس تا سەزەدى, – دەيدى شىڭعىستاي اۋىلىنىڭ تۇرعىنى ابىلاي ياۋادانتەگى.
ينسپەكتورلاردىڭ قورعاۋىندا بولسىن, بولماسىن, اققۋعا قازاق الىمساقتان تيىسپەيدى. اققۋ, قارلىعاش, بۇركىت سەكىلدى قۇستاردى قاسيەتتى دەپ سانايدى. ال اققۋ – قۇستاردىڭ ىشىندە جۇپتاسىپ ءومىر سۇرەتىن بىردەن-ءبىر قۇس. ءبىرى اجال قۇشسا, ەكىنشىسى جۇپ ىزدەمەيدى. سوندىقتان دا شىعار, ۇيلەنگەن جاستار ءبىر-بىرىنە ادال بولسىن دەپ, اققۋدىڭ ماحابباتىن تىلەپ جاتادى. سۇلۋ قىزداردى اققۋعا تەڭەيتىنىمىز جانە بار. قالاي دەگەنمەن, ەرەكشە قۇس. جالپى, جەر بەتىندە اققۋدىڭ التى-جەتى ءتۇرى بار. ونىڭ بەسەۋى سولتۇستىك جارتىشاردى مەكەندەسە, بىرەۋى ەكۆاتوردىڭ وڭتۇستىك بەتىن قونىس ەتەدى ەكەن. ەلىمىزدەگى ايدىنداردى مەكەندەيتىن ەكەۋى – سىبىرلاق جانە سۇڭقىلداق اققۋلار.
شىڭعىستايدىڭ شەتىنە قونعان اققۋلار كۇزگە قاراي جىلى جاققا قايتا ۇشادى. قوس اققۋ عانا ەمەس, بالاپاندارى ەرتە ۇشادى. اۋىل ىرگەسى جايلى بولسا, كەلەر جىلى بىرنەشەۋى قايتا ۇشىپ كەلۋى مۇمكىن. بۇل – تابيعات تىنىشتىعىن ساقتاپ جۇرگەن قورىقشىلاردىڭ بولجامى.