سەمەي قالاسىندا سۋعا باتىپ بارا جاتقان بالانى قۇتقارىپ قالعان 7-سىنىپ وقۋشىسى مەن كوللەدج ستۋدەنتى ماراپاتتالدى, دەپ حابارلايدى Egemen.kz.
شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, وقيعا 1 مامىر كۇنى بولعان. بالالار وزەن جاعاسىنا سەرۋەنگە شىققان.
«سۋعا سەكىرگەن 11 جاستاعى بالا جاعاعا جەتە الماي, باتا باستاعان. سول كەزدە سەمەي قالاسىنداعى قۇرىلىس كوللەدجىنىڭ 2-كۋرس ستۋدەنتى دانيلا كوندراتەنكو لەزدە كومەككە ۇمتىلىپ, ونى سۋدان الىپ شىققان. ال بالانىڭ سىنىپتاسى رۋسلان وماروۆ دارىگەرلەر كەلىپ جەتكەنگە دەيىن العاشقى مەديتسينالىق كومەك كورسەتتى. سونىڭ ارقاسىندا وقۋشى امان قالعان», دەلىنگەن اقپاراتتا.
زارداپ شەگۋشى وبلىستىق بالالار اۋرۋحاناسىنا جاتقىزىلدى. قازىرگى ۋاقىتتا ول دارىگەرلەر باقىلاۋىندا.
«رۋسلان وماروۆ پەن دانيلا كوندراتەنكو ەرلىك تانىتىپ, ادام جانىن اجالدان اراشالاپ قالدى. سىن ساعاتتا باتىل ارەكەت ەتكەن ولار وزدەرىن باتىر سانامايتىنىن ايتادى. قازاقستان رەسپۋبليكاسى توتەنشە جاعدايلار ءمينيسترىنىڭ بۇيرىعىمەن ەكەۋى قۇرمەت گراموتاسىمەن ماراپاتتالدى», دەلىنگەن حابارلامادا.