پاندەميا ۋاقىتىندا جەدەل جاردەم قىزمەتكەرلەرى «مايداننىڭ» العى شەبىنەن تابىلىپ, ۇلكەن ەرلىك كورسەتتى. جاي ۋاقىتتا دا ادام ومىرىنە اراشا بولىپ, انتىنا ادال ەكەندىكتەرىن ىسپەن دالەلدەۋدە. ولار بارلىق ماقتاۋعا لايىق. وسى رەتتە كەشە ەكىباستۇز قالاسىنداعى جەدەل جاردەم قىزمەتكەرلەرىنە پاتەر كىلتتەرى تابىستالدى.
اتاپ ايتساق, كەنشىلەر شاھارىنداعى 103 وبلىستىق ستانساسىنىڭ ەكى فەلدشەرى باسپانالى بولدى. قىزمەتتىك پاتەر سانالسا دا, جاس ماماندار ءۇشىن اجەپتاۋىر كومەك ەكەنى انىق.
بىلتىر ەكىباستۇز قالاسى اكىمدىگى جەدەل جاردەم قىزمەتكەرلەرىنە 4 قىزمەتتىك پاتەر ۇلەستىرگەن-ءدى. ونىڭ ەكەۋىنە جەلىلىك قىزمەت بريگاداسىنىڭ دارىگەرى مەن فەلدشەرى قونىستانىپ كەلسە, 2 پاتەر جوندەۋ جۇمىستارىن قاجەت ەتىپ تۇرعان ەدى.
– بۇل ماسەلەنى 103 وبلىستىق ستانسا باسشىلىعى ءوز موينىنا الدى. جوندەلگەن پاتەرلەردى ەكىباستۇزدان بەس شاقىرىم جەردە ورنالاسقان قاراسور اۋىلىندا تۇراتىن ەكى فەلدشەرگە بەرۋ تۋرالى شەشىم قابىلداندى. ەندى ولار جۇمىسقا كەلۋ ءۇشىن ۇزاق جول ءجۇرىپ اۋرە بولمايدى, – دەيدى جەدەل جاردەم قىزمەتى باسشىسىنىڭ ورىنباسارى يرينا ميششەنكو.
ەستەرىڭىزگە سالساق, 2016 جىلى ەكىباستۇز جەدەل جاردەم قوسالقى ستانساسى وبلىستىق ستانتسيانىڭ قۇرامىنا كىرگەن. بۇگىندە مۇندا 125 ادام ەڭبەك ەتۋدە. ونىڭ جەتەۋى – دارىگەر, 73-ءى فەلدشەر جانە 34-ءى جۇرگىزۋشى بار. 2021 جىلى قوسالقى ستانسادا زاماناۋي مەديتسينالىق جابدىقتارمەن جابدىقتالعان سانيتارلىق كولىك تولىعىمەن جاڭارتىلعان.
پاندەميا كەزىندە ەكىباستۇز قوسالقى ستانساسىنىڭ مەديتسينا قىزمەتكەرلەرى جوعارى كاسىبي جانە ۇيلەسىمدى جۇمىستى كورسەتتى. سونىمەن قاتار سوڭعى 2 جىل ىشىندە بولىمشەدە ءجىتى كورونارلىق سيندرومدارى مەن باسقا دا اۋرۋلارى بار, جكو-دان كەيىن تاسىمالداۋ كەزىندە بىردە-ءبىر ءولىم-ءجىتىم وقيعاسىنا جول بەرىلگەن جوق.