نۇر-سۇلتان قالاسىنىڭ ەكى سپورتشىسى برازيليادا وتەتىن سۋردليمپيادا ويىندارىندا ونەر كورسەتەدى, دەپ حابارلايدى Egemen.kz ەلوردا اكىمدىگىنىڭ سايتىنا سىلتەمە جاساپ.
1-15 مامىر ارالىعىندا برازيليانىڭ كاشياس-دۋ-سۋل قالاسىندا 24-جازعى سۋردوليمپيادا ويىندارى وتەدى. جارىستا باعدارلامانىڭ 21 ءتۇرى بويىنشا 205 ماراپات جيىنتىعى ويناتىلادى. الەمنىڭ 100 ەلىنەن 3000-نان استام سپورتشى قاتىسادى دەپ جوسپارلانىپ وتىر.
وسىعان دەيىن سۋردوليمپيادا ويىندارىنا قاتىسۋ قۇقىعىنا ەلوردالىق تەننيسشى ۆلاديمير نەستەروۆ يە بولعان. ەندى نۇر-سۇلتان قالاسى اكىمدىگىنىڭ «بالالار-جاسوسپىرىمدەر سپورت مەكتەبى, مۇگەدەك سپورتشىلارعا ارنالعان سپورت مەكتەبىنىڭ» تاعى ەكى سپورتشىسى ءتورت جىلدا ءبىر وتەتىن باستى جارىستا ەل نامىسىن قورعايتىنى بەلگىلى بولدى.
جۇزۋدەن ۇلتتىق قۇراما ساپىنا ەلوردالىق سپورتشى تالعات الىشەر ەندى. ءوزىنىڭ جاستىعىنا قاراماستان سپورتشى رەسپۋبليكا چەمپيوناتتارىنىڭ بىرنەشە دۇركىن جۇلدەگەرى, پولشاداعى حالىقارالىق جارىستاردىڭ چەمپيونى بولىپ سانالادى. الىشەر قازىر مەكتەپ وقۋشىسى, ءجاسوسپىرىم بولاشاعىن سپورتپەن بايلانىستىرىپ, الداعى ۋاقىتتا جاتتىقتىرۋشى بولۋدى جوسپارلاپ ءجۇر.
سابىرجان حاپيزوۆ تا بۇل جارىستا دزيۋدودان ەل نامىسىن قورعايدى. سپورتشى 2022 جىلعى قازاقستان رەسپۋبليكاسى كۋبوگىنىڭ جەڭىمپازى, فرانتسياداعى الەم چەمپيوناتىندا دزيۋدوشى 7-ورىنعا يە بولدى. سپورتشىمىز مەديتسينالىق كوللەدجدى بىتىرگەن, سپورتتا جوعارى ناتيجەلەرگە قول جەتكىزۋدى ارماندايدى.