تبيليسيدە اباي قۇنانباي ۇلىنىڭ ەسكەرتكىشىنىڭ اشىلۋ سالتاناتى ءوتتى. ءىس-شاراعا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ قاتىستى, دەپ حابارلايدى Egemen.kz.
تبيليسيگە جۇمىس ساپارىمەن كەلگەن قر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ گرۋزيانىڭ ۆيتسە-پرەمەرى, ەكونوميكا جانە تۇراقتى دامۋ ءمينيسترى لەۆان داۆيتاشۆيليمەن كەزدەستى.
كەلىسسوزدەر بارىسىندا كولىك, اقپاراتتىق تەحنولوگيالار جانە يننوۆاتسيالار سالاسىنداعى ساۋدا-ەكونوميكالىق ىنتىماقتاستىقتى دامىتۋ پەرسپەكتيۆالارى سياقتى ماڭىزدى ماسەلەلەر قوزعالدى. ق.وسكەنباەۆتىڭ ايتۋىنشا, قازاقستان مەن گرۋزيا اراسىنداعى ساۋدا قاتىناستارىن ۇلعايتۋدا ايتارلىقتاي الەۋەت بايقالادى. مينيستر بۇگىنگى تاڭدا قازاقستاندىق كومپانيالار مەتاللۋرگيا, مۇناي-حيميا, تاماق جانە ماشينا جاساۋ سالالارىندا وڭدەلگەن تاۋارلارىنىڭ گرۋزياعا ەكسپورتىن ارتتىرۋعا دايىن ەكەنىن اتاپ ءوتتى. ولاردىڭ قاتارىندا فارماتسەۆتيكا مەن قۇرىلىس سالاسى دا بار.
«ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيا ارىپتەستىكتى دامىتۋ بارىسىندا ماڭىزدى ءرول اتقارادى. وسى رەتتە ەكى ەل اراسىنداعى ءوزارا ءىس-قيمىلدىڭ دامۋ قارقىنىن اتاپ وتكىم كەلەدى. بۇگىندە ەلىمىزدە گرۋزيانىڭ قاتىسۋىمەن 248 بىرلەسكەن كاسىپورىن جۇمىس ىستەيدى. قازاقستان مەن گرۋزيا اراسىنداعى سىرتقى ساۋدا اينالىمى دا وڭ ديناميكا كورسەتىپ وتىر», دەدى مينيستر.
ترانسكاسپي حالىقارالىق كولىك باعدارىن دامىتۋ شەڭبەرىندە قازاقستان گرۋزيامەن بەلسەندى ىنتىماقتاستىق ورناتقانىن اتاپ وتكەن ءجون.
يدم باسشىسى سونداي-اق «دەلتا» مەملەكەتتىك اسكەري عىلىمي-تەحنيكالىق ورتالىعىنا جانە «تام» تبيليسي اۆياتسيالىق زاۋىتىنا بارىپ, كاسىپورىننىڭ جۇمىسىمەن تانىستى, كەيىن «پوتي» جانە «باتۋمي» پورتتارىنىڭ باسشىلارىمەن كەزدەستى.
سونىمەن بىرگە جۇمىس ساپارى اياسىندا اباي قۇنانباي ۇلىنىڭ ەسكەرتكىشىنىڭ اشىلۋ سالتاناتىنا قاتىستى. اتالعان ءىس-شارا قازاقستان مەن گرۋزيا اراسىنداعى ديپلوماتيالىق قارىم-قاتىناستاردىڭ ورناعانىنا 30 جىل تولۋىنا وراي ۇيىمداستىرىلدى.
«بۇل ەكى ەل اراسىنداعى دوستىعىمىزدىڭ تاعى ءبىر نىشانى بولارى ءسوزسىز. اباي مۇراسى تەك ءبىزدىڭ ەلىمىز ءۇشىن عانا ەمەس, بۇكىل ادامزات ءۇشىن ۇلكەن قۇندىلىق. 2020 جىلى ءبىز ۇلى ابايدىڭ 175 جىلدىق مەرەيتويىن اتاپ وتتىك. كورسەتىلگەن وسىناۋ قۇرمەت ءۇشىن گرۋزيا ۇكىمەتى مەن حالقىنا العىس ايتامىن», دەپ اتاپ ءوتتى قايىربەك وسكەنباەۆ.
ساپاردىڭ ەكىنشى كۇنى مينيستر گرۋزيانىڭ قورعانىس ءمينيسترى بۋرچۋلادزە دجۋانشەرمەن كەزدەسىپ, ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيا وتىرىسىنىڭ جۇمىسىنا قاتىسۋدى جوسپارلاپ وتىر. وتىرىس قورىتىندىسى بويىنشا بىرقاتار قۇجاتتارعا قول قويىلادى دەپ كۇتىلۋدە.