مەملەكەت باسشىسى قاسىم-جومارت توقاەۆ ىشكى ىستەر ءمينيسترى مارات احمەتجانوۆتى قابىلدادى, دەپ حابارلايدى Egemen.kz اقوردانىڭ رەسمي سايتىنا سىلتەمە جاساپ.
پرەزيدەنتكە ەلىمىزدەگى كريمينوگەندىك جاعداي تۋرالى مالىمەت بەرىلدى. ۆەدومستۆو باسشىسىنىڭ ايتۋىنشا, قىلمىستىق ىستەر كورسەتكىشى 7,6 پايىزعا تومەندەگەن. سونىڭ ىشىندە دەنساۋلىققا اۋىر زاقىم كەلتىرۋ, قاراقشىلىق, توناۋ, مال ۇرلىعى, بۇزاقىلىق, الاياقتىق جانە زورلاۋ دەرەكتەرى ايتارلىقتاي ازايعان.
مينيستر قاڭتار وقيعاسى كەزىندە جاسالعان قىلمىستاردى تەرگەپ-تەكسەرۋ, كىنالىلەردى انىقتاپ, جاۋاپقا تارتۋ, ۇرلانعان قارۋلاردى زاڭسىز اينالىمنان الۋ جۇمىستارى جونىندە ەسەپ بەردى.
سونىمەن قاتار مەملەكەت باسشىسى قاۋىپسىزدىك ماسەلەلەرىن قوعاممەن سەرىكتەستىك ورناتۋ ارقىلى شەشۋگە نەگىزدەلگەن پوليتسيانىڭ سەرۆيستىك مودەلىنىڭ ەنگىزىلۋ بارىسىمەن تانىستى.
مارات احمەتجانوۆ پرەزيدەنتكە ىشكى ىستەر مينيسترلىگىنىڭ قىزمەتىن بيۋروكراتيادان ارىلتۋ, تسيفرلاندىرۋ جانە جۇمىس ۇدەرىسىن اۆتوماتتاندىرۋ, ىشكى راسىمدەردى وڭتايلاندىرۋ جونىندە باياندادى.
بۇدان بولەك ول ۇدەرىستەردى جەدەل باسقارۋ ءۇشىن Big Data تالداۋ قۇرالدارىن پايدالانا وتىرىپ, كريمينوگەندىك جاعدايدى مونيتورينگتەۋ ءۇشىن ءىىم-ءنىڭ احۋالدىق ساراپتاما ورتالىعىنىڭ قۇرىلعانى جونىندە باياندادى.
قاسىم-جومارت توقاەۆقا جول ءجۇرۋ ەرەجەلەرىن قاساقانا بۇزعانداردى انىقتاۋعا باعىتتالعان «قورعاۋ» دەپ اتالاتىن جاڭا باعدارلاما تانىستىرىلدى. مينيستر مەملەكەت باسشىسىنا نۇر-سۇلتان, الماتى جانە شىمكەنت قالالارىندا باعدارلامانى قولدانۋ ارقىلى جۇرگىزىلگەن جۇمىستاردىڭ ناتيجەلەرى تۋرالى ايتتى.
سونداي-اق پرەزيدەنتكە قاۋىپسىزدىك ماسەلەلەرىن ازاماتتىق قوعاممەن سەرىكتەستىك ورناتۋ ارقىلى قامتاماسىز ەتۋ تۇجىرىمداماسىنىڭ جوباسى ازىرلەنىپ جاتقانى جونىندە مالىمەت بەرىلدى.
كەزدەسۋ قورىتىندىسى بويىنشا پرەزيدەنت پوليتسيانىڭ سەرۆيستىك مودەلىن ودان ءارى ەنگىزۋ, ەلىمىزدە ازاماتتاردىڭ قاۋىپسىزدىگى مەن قۇقىقتىق ءتارتىپتى قامتاماسىز ەتۋ جونىندە بىرقاتار ناقتى تاپسىرما بەردى.
وسى رەتتە مەملەكەت باسشىسى جول قاۋىپسىزدىگىن قامتاماسىز ەتۋ سالاسىنداعى جاۋاپكەرشىلىكتى قاتاڭداتۋ قاجەت ەكەنىن ەرەكشە اتاپ ءوتتى.
ايانا توعانبەك