سپورت – دەنساۋلىق كەپىلى. اسىرەسە مۇمكىندىگى شەكتەۋلى جاندار ءۇشىن سپورتتىڭ پايداسى كوپ-اق.
قازىر مۇنايلى وڭىردە ءتۇرلى سەبەپپەن وسىنداي ساناتقا ەنگەن جانداردىڭ سپورتقا قىزىعۋشىلىعى ارتىپ كەلەدى. سونىڭ ىشىندە پارادزيۋدوشىلاردىڭ جەتىستىگى قۋانتادى. ماسەلەن, بىلتىر توكيودا وتكەن پاراليمپياداعا اتىراۋلىق التى پارادزيۋدوشى قاتىسىپ, ۇشەۋى كۇمىس جۇلدەگەر اتانعان ەدى. سول جاھاندىق دودادا جۇلدە الماسا دا, ەل نامىسىن قورعاعان جانكەشتى سپورتشىلاردىڭ قاتارىندا امانجول جانبوتا مەن عالىمجان سماعۇل ۇلى دا بار.
جاقىندا اتالعان پارادزيۋدوشىلار تۇركيادا وتكەن گران پري سايىسىنا قاتىسىپ, J2 ساناتىندا باق سىنادى. الەمنىڭ 19 ەلىنەن پارادزيۋدوشىلار قاتىسقان سايىستا ەكەۋى دە 90 كيلو سالماقتا قارسىلاستارىن قاپى قالدىرىپ, اقتىق سىنعا القىنباي جەتتى. سپورتتىق بابى كەلىسكەن قوس اتىراۋلىقتىڭ جولى اقتىق سىندا ءتۇيىستى. ءبىر-ءبىرىنىڭ سپورتتاعى ءادىسىن جاقسى بىلەتىن ولار التىن مەدال ءۇشىن بارىن سالدى.
دەگەنمەن بۇل سايىستا امانجول جانبوتانىڭ باعى جاندى. ءسويتىپ, گران پري سايىسىنىڭ جەڭىمپازى اتانعان ول العاشقى التىن مەدالىنە قول سوزدى. ال عالىمجان سماعۇل ۇلى كۇمىس جۇلدەنى يەلەندى.
– بۇل – پارادزيۋدوشى امانجول جانبوتانىڭ العاشقى التىنى. مۇنى پارادزيۋدوشىلاردىڭ جەتىستىگى دەۋگە دە بولادى. الدا ءالى تالاي اسۋ بار, – دەپ ءمالىم ەتتى وبلىستىق سپورت جانە دەنە شىنىقتىرۋ باسقارماسىنىڭ ءباسپاسوز قىزمەتى.