تەمىرتاۋ قالاسىنداعى مەكتەپتىڭ بىرىندە ەسىرتكى جاسىرىپ جۇرگەن 11-سىنىپ وقۋشىسى ۇستالدى, دەپ حابارلايدى Egemen.kz.
ۇستالعان كەزدە 17 جاستاعى وقۋشىدان 40 ءتۇيىر ەسىرتكى شىققان. بۇل «جىلدامدىق» دەپ اتالعان سينتەتيكالىق ەسىرتكىنىڭ ءبىر ءتۇرى. ول بۇل ورامالاردى قالانىڭ ءار بولىگىنە كەلىسىم بويىنشا ساتىپ الۋشىلار ۇشىن جاسىرماقشى بولعان ەكەن.
سونىمەن قاتار 11 ساۋىردە قاراعاندىدا گوگول كوشەسىندە پوليتسەيلەر قالانىڭ 20 جاستاعى تۇرعىنىن ۇستادى, ودان اق ءتۇستى ۇنتاق ءتارىزدى زاتى بار ءتورت ءتۇيىر تاركىلەدى. تەرگەۋ كەزىندە ول ەسىرتكى زاتتارى جاسىرىلعان 13 جەردى كورسەتكەن. كۇدىكتىنىڭ ايتۋىنشا ول ءبىر جىل بويى ەسىرتكىنى تاسىمالداۋشى رەتىندە جۇمىس جاساعان. سول كۇنى قاراعاندى ساياباعىنان 26 جانە 30 جاستاعى تاعى ەكى ەر ادام ۇستالعان. ۇستالعان ازاماتتاردىڭ ءبىرىنىڭ كولىگىنەن ەسىرتكى بار التى ءتۇيىر جانە وسىمدىك تەكتەس زاتى بار ءبىر ءتۇيىر تاركىلەندى.ولار قالانىڭ ءار بولىگىندە ورنالاسقان ءتورت جاسىرىن ورىندارىن كورسەتكەن ەكەن. ايتا كەتەر جايت ۇستالعان ەكى ازاماتتىڭ ءبىرى تۇراقتى جۇمىسى مەن وتباسى بار سالاۋاتتى ءومىر سالتىن ۇستانعان ازامات. ال ەكىنشىسى بۇرىن بىرەۋدىڭ مۇلكىن ۇرلاعانى ءۇشىن شارتتى تۇردە جازاعا تارتىلعان.
«اتالعان بارلىق فاكتىلەر بويىنشا قر قك 297-بابى شەڭبەرىندە سوتقا دەيىنگى تەرگەۋ جۇرگىزىلۋدە, ءتيىستى ساراپتامالار تاعايىندالدى. ەسىرتكى زاتتارىن تاسىمالداۋ جونىندەگى ءىس-ارەكەتتەر وتكىزۋ رەتىندە سارالانادى جانە بۇل ءۇشىن 10 جىلدان 20 جىلعا دەيىنگى مەرزىمگە باس بوستاندىعىنان ايىرۋ تۇرىندەگى قىلمىستىق جاۋاپكەرشىلىك كوزدەلگەن», دەپ مالىمدەدى وبلىستىق پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى باۋىرجان ميسساليموۆ.
ال وقۋدىڭ ورنىنا ەسىرتكىنى ەرمەك ەتكەن وقۋشى وقىعان مەكتەپتە قىزمەتتىك تەكسەرۋ باستالعان.
ايانا توعانبەك