موڭعوليادا ازيا چەمپيوناتى اياسىندا ەركىن كۇرەستەن جارىستار جالعاسۋدا. بۇگىن كىلەمگە 61, 74, 86, 92, 125 كەلىگە دەيىنگى بالۋاندار شىقتى, دەپ حابارلايدى Egemen.kz Olympic.kz-كە سىلتەمە جاساپ.
بۇگىن ءۇش قازاقستاندىق فينالعا جولداما الدى. 74 كەلىگە دەيىنگى سالماقتا نۇرقوجا قايپانوۆ جارتىلاي فينالدا قىرعىز بالۋانى يسلامبەك وروزبەكوۆتى 15:8 ەسەبىمەن ۇتتى. اقتىق باسەكەدە ن.قايپانوۆ يراندىق سپورتشى يونەس الياكبار ەماميچوگاەيمەن كەزدەسەدى.
فينالعا جولدامانى ازامات داۋلەتبەكوۆ تە (86 كەلىگە دەيىن) الدى. ول 1/2 كەزەڭدە قىرعىزستاندىق ساياقباي يۋسۋپوۆتى مەرزىمىنەن بۇرىن ۇتتى – 10:0. التىن مەدال ءۇشىن ايقاستا ۇندىستاندىق ديپاك پۋنيامەن كەزدەسەدى. 125 كەلىگە دەيىنگى سالماق دارەجەسىندەگى الىشەر ەرعالي دا قۇرلىق بىرىنشىلىگىنىڭ «التىنىن» ساراپقا سالادى.
جارتىلاي فينالدا ول وڭتۇستىككورەيالىق يەحيون چوننان اسىپ ءتۇستى – 9:6. باس جۇلدە ءۇشىن جەكپە-جەكتە ەرعالي يراندىق يادوللاح موحاممادكازەم موحەبيمەن بەلدەسەتىن بولادى. سونداي-اق ەكى جەرلەسىمىز ءتۋرنيردىڭ قولا جۇلدەسى ءۇشىن تالاسادى. اكبار قۇربانوۆ (61 كەلىگە دەيىن) الىبەك الىبەگوۆپەن (باحرەين) كەزدەسەدى. ال ادىلەت داۋلانباەۆ (92 كەلىگە دەيىن) جاپوندىق تاكۋما وتسۋعا قارسى شىعادى.
فينال نۇر-سۇلتان ۋاقىتىمەن 16:00-دە باستالادى.