ەلوردادا تۇرعىنداردىڭ سانى جىل سايىن ارتىپ كەلە جاتقانىن ەسكەرسەك, سۋمەن جابدىقتاۋ, جىلۋمەن جابدىقتاۋ, ەلەكترمەن جابدىقتاۋ, كارىز-تازارتۋ قۇرىلىستارى, نوسەر كارىزدەرى سەكىلدى الەۋمەتتىك نىساندارعا دا, ينجەنەرلىك جەلىلەرگە دە قوسىمشا كۇش ءتۇسىپ وتىر. بۇل رەتتە نۇر-سۇلتان قالاسىنىڭ اكىمى التاي كولگىنوۆ ءماسليحات وتىرىسىندا ينفراقۇرىلىمدى جۇيەلى دامىتۋ, ستراتەگيالىق نىساندار قۇرىلىسى تۋرالى ايتىپ بەردى.
«تۇرعىندار مەن قالانىڭ ءوسۋ ديناميكاسىن, ياعني جاڭا قۇرىلىس اۋداندارىنىڭ اشىلۋىن ەسكەرە وتىرىپ, الدىمەن جىلۋ, ەلەكتر, سۋ بەرۋ قۋاتىن ارتتىرۋ قاجەت. وسى فاكتورلار ءومىر ءسۇرۋ جايلىلىعىنا, قالانىڭ دامۋىنا, ينۆەستيتسيا تارتۋعا تىكەلەي بايلانىستى. مەملەكەت باسشىسىنىڭ تاپسىرماسى بويىنشا وسى ماسەلەنى شەشۋ ءۇشىن بىرقاتار ستراتەگيالىق نىساننىڭ قۇرىلىسىن جۇرگىزىپ جاتىرمىز. مىسالى, سۋعا قاتىستى ماسەلەلەردى شەشۋ ءۇشىن وتكەن جىلدان باستاپ سورعى-سۇزگى ستانساسىنىڭ (سسس-3) قۇرىلىسىنا كىرىستىك. نىسان وسى جىلدىڭ سوڭىنا قاراي ءىشىنارا پايدالانۋعا بەرىلەدى. ال 2023 جىلدان باستاپ جاڭا سسس-3 جۇمىسىنىڭ قۋاتىن ۇلعايتامىز. بۇل بولاشاق قۇرىلىس الاڭدارىن اۋىزسۋمەن قامتاماسىز ەتىپ قانا قويماي, قازىرگى سۋ بەرۋ قۋاتىن ارتتىرۋعا مۇمكىندىك بەرەدى. ماسەلەن, قازىر تاۋلىگىنە 300 مىڭ تەكشە مەتردى تۇتىناتىن بولساق, وندا سسس-3 قۋاتى تاۋلىگىنە قوسىمشا 100 مىڭ تەكشە مەتردەن استام قۋات بەرەدى. سونداي-اق سسس-3-كە ۇزىندىعى 18 كم سۋبۇرعىش سالامىز», دەدى ا.كولگىنوۆ.
ەلوردادا سوڭعى 3 جىلدا 8,5 ملن شارشى مەتر تۇرعىن ءۇي سالىندى. سول سەبەپتەن جىلۋمەن قامتۋ قۋاتىن ارتتىرۋ قاجەت. بۇل ءۇشىن قالا اكىمدىگى جەو-3 قۇرىلىسىن جاڭعىرتۋدان بولەك ءۇش جەرگىلىكتى گاز قازاندىعىن جوبالاۋعا كىرىستى. گاز قازاندىقتارىنىڭ قۋاتى ساعاتىنا 1 مىڭ گيگاكالوريادان اسادى, بۇل جەو-3 قۋاتىنان ءۇش ەسەدەن اسا كوپ. بۇل قۇرىلىس جۇرەتىن پەرسپەكتيۆالى اۋدانداردى جىلۋمەن قامتۋعا مۇمكىندىك بەرەدى. سونداي-اق ەلوردادا قالانى گازداندىرۋ جۇمىسى ءجۇرىپ جاتىر. الماتى جانە سارىارقا اۋداندارى تولىعىمەن گازداندىرىلدى. بۇل رەتتە 680 شاقىرىمنان استام گاز تاراتۋ جەلىسى سالىندى. بۇعان قوسا گاز تاراتۋ جەلىلەرى قالعان ەكى اۋداندا سالىنادى.
سونىمەن قاتار كارىز تازارتۋ قۇرىلىستارىن جوبالاۋ (كتق-2) بويىنشا جۇمىستار جۇرگىزىلۋدە. سول سياقتى ەلەكتر جەلىلەرىن جاڭعىرتۋ, «اراي», «جۇلدىز» جانە باسقا دا قوسالقى ستانسالاردى جوبالاۋ جانە رەكونسترۋكتسيالاۋ بويىنشا جۇيەلى جۇمىستار اتقارىلادى. سونداي-اق قالا ءماسليحاتى تۇرعىندار سانى جىل سايىن ءوسىپ كەلە جاتقانىن, تيىسىنشە قالا كوشەلەرىنە تۇسەتىن كۇشتىڭ ۇلعايۋىن ەسكەرە وتىرىپ, قالالىق كولىكتىڭ 10 جانە ودان دا كوپ جىلعا ارنالعان بىرىڭعاي تەحنيكالىق باقىلاۋدى ازىرلەۋگە مۇمكىندىك بەرەتىن كەشەندى كولىك سحەماسىنىڭ (ككس) تۇجىرىمداماسىن قابىلدادى.