بۇل كۇندەرى قازاقتىڭ اسا كورنەكتى جازۋشىلارىنىڭ ءبىرى, مەملەكەتتىك سىيلىقتىڭ لاۋرەاتى سافۋان شايمەردەنوۆتىڭ قالامىنان وتىزعا جۋىق رومان, حيكايات, اڭگىمەلەر جيناعى تۋدى. «بولاشاققا جول» دەگەن اتاۋمەن وقىرمانعا جول تارتقان العاشقى شىعارماسى 1958 جىلى جارىق كورگەن.
باسپا سالاسىنىڭ باسشىلىق قىزمەتتەرىندە جۇرسە دە شىعارماشىلىقتان قول ۇزبەدى. بيتابار بالۋان تۋرالى جازعان «جىل قۇسى» حيكاياتى وداقتىق كاسىپوداقتىڭ ارنايى جۇلدەسىن جەڭىپ الدى. «دوكەي كەلە جاتىر» اتتى دراماسى وبلىستىق جانە رەسپۋبليكالىق ساحنالاردان ءجيى كورىندى. جازۋشى تىڭ تاقىرىپتاردى قامتۋعا تىرىساتىن. ونىڭ ادام مەن يت اراسىنداعى جالعانسىز جاقىندىقتى ارقاۋ ەتكەن «يت اشۋى» حيكاياتى كەزىندە قازاق ادەبيەتى جاناشىرلارىنىڭ اراسىندا ۇلكەن رەزونانس تۋدىرعان. كوركەم اۋدارما سالاسىندا دا ول جەمىستى ەڭبەك ەتىپ, ل.تولستويدىڭ, ر.تاگوردىڭ شىعارمالارىن ءتارجىمالادى. ونىڭ «اعالاردىڭ الاقانى» اتتى اڭگىمەلەر جيناعى مەملەكەتتىك سىيلىق الدى.
سافەكەڭ كوركەمسوزدىڭ شەبەرى عانا ەمەس, قايراتتى قوعام قايراتكەرى دە بولا بىلگەن جان. ونىڭ جەلتوقسان وقيعاسىنان كەيىن جازۋشىلار وداعىندا قازاقستان كپ ورتالىق كوميتەتىنىڭ ءبىرىنشى حاتشىسى گ.كولبينمەن كەزدەسۋدە سويلەگەن ءسوزى ناعىز قايسار, ۇلتى ءۇشىن جانى شىرقىرايتىن پاتريوت ەكەنىن كورسەتتى. جازۋشى جۇبان مولداعاليەۆ ەكەۋى عانا قالعان جۇرت اۋىزدارىن اشۋعا باتىلدارى بارماي وتىرعاندا, قازاق حالقىنىڭ سول كەزدەگى نارازىلىعىن گ.كولبيننىڭ قۇلاعىنا اشىق جەتكىزە الدى. ودان كەيىنگى ۋاقىتتاردا سافەكەڭنىڭ قازاق مەكتەپتەرىن اشۋ جولىندا كوپ تەر توككەنىن زامانداستارى ۇنەمى ەسكە الىپ جۇرەدى.
سولتۇستىك قازاقستان وبلىسىنىڭ تۇرعىندارى ماعجان جۇماباەۆ, ءسابيت مۇقانوۆ, عابيت مۇسىرەپوۆتەن كەيىن تۋعان قازاق ادەبيەتىنىڭ كورنەكتى وكىلى, وزدەرىنىڭ جەرلەستەرى سافۋان شايمەردەنوۆتى ورىندى ماقتان تۇتادى. جازۋشىنىڭ مەرەيتويىنا وراي وبلىستىڭ ءتورت جەرىندە مەرەكەلىك ءىس-شارالار ۇيىمداستىرىلدى. سونىڭ ىشىندە وبلىستىق مۋزەيدە, عابيت مۇسىرەپوۆ اتىنداعى وبلىستىق كىتاپحانادا, جامبىل اۋدانىنداعى مادەنيەت ۇيىندە مەرەكەلىك شارالار وتكىزىلىپ, جازۋشى تۋرالى ەستەلىكتەر ايتىلىپ, جىرلار وقىلىپ, اندەر توگىلىپ جاتتى.
مەرەكەلىك شارالاردىڭ ەڭ ۇلكەنى سافۋان شايمەردەنوۆ اتىنداعى كلاسسيكالىق گيمنازيادا بولىپ, وعان وبلىس اكىمىنىڭ ورىنباسارى عاني نىعىمەتوۆ, وبلىستىق ءبىلىم باسقارماسىنىڭ باسشىسى ءنازىر جاشىبەكوۆ, جازۋشىنىڭ بالاسى, بەلگىلى جۋرناليست سايىن ەسماعي جانە جەرگىلىكتى اقىن-جازۋشىلار, ادەبيەتسۇيەر قاۋىم وكىلدەرى, جۋرناليستەر قاتىستى. رەسپۋبليكاعا بەلگىلى ايتىس اقىندارى جارقىن جۇپارحان مەن امانجول زاعىپارلار جازۋشىعا ارناعان سياسى ءالى كەپپەگەن جاڭا ولەڭدەرىن وقىدى. كەزدەسۋدە جازۋشىنىڭ ەسىمىن ماڭگى ەستە قالدىرۋ تۋرالى جاڭا ۇسىنىستار مەن يدەيالار ايتىلدى. وبلىسقا بەلگىلى كاسىپكەر, مەتسەنات ءبىرجان شايمەردەنوۆ جازۋشى اتىنداعى وسىناۋ ءبىلىم ورداسىنىڭ قابىرعاسىنا كورنەكتى تاقتا ورناتقان ەكەن, جيىن بارىسىندا سونىڭ اشىلۋ سالتاناتى دا بولدى. كەزدەسۋگە جازۋشىنىڭ نەمەرە قىزدارى زەينەش پەن زەينەپ تە قاتىستى. ءسويتىپ, س.شايمەردەنوۆتىڭ 100 جىلدىق مەرەيتويى تۋعان جەرىندە ءدۇبىرلى توي بولماسا دا دۇركىرەگەن كەزدەسۋلەرمەن باستالدى.
سولتۇستىك قازاقستان وبلىسى