17 ءساۋىر كۇنى بەسىنشى الماتى جارتىلاي مارافونى ءوتتى, دەپ حابارلايدى Egemen.kz.
مارافون تاڭعى ساعات 8-دە تۇڭعىش پرەزيدەنت ساياباعىندا باستادى. 5500-گە جۋىق اۋەسقوي سپورتشى قالا كوشەلەرىمەن ورتالىق ستاديونداعى مارەگە قاراي جۇگىردى.
سورەدە بارلىق قاتىسۋشىلاردى الماتى قالاسى اكىمىنىڭ ورىنباسارى ارمان ورازباي ۇلى قىرىقباەۆ قۇتتىقتادى. جارىستىڭ باس دارىگەرى ورازبەك ساحوۆ, باس سەرىكتەس – Onlinebank وكىلى داۋرەن سارتاەۆ جانە جارىس ديرەكتورى سالتانات قازىباەۆا تىلەك سوزدەرىن ايتتى.
تاڭعى ساعات 8-دە سورەدەن ءبىرىنشى بولىپ 10 كم-گە قاتىسۋشىلار مەن سكانديناۆيالىق ءجۇرىس وكىلدەرى شىقتى. 8:32-دە مارەگە وسى قاشىقتىقتىڭ جەڭىمپازى دەنيس ستەپانەنكو كەلدى. ايەلدەر اراسىندا 10 كم-دە العاشقى بولعان – ەكاتەرينا گريتساي.
ساعات 8:20-دا جارتىلاي مارافونشىلار – اۋەسقوي سپورتشىلار, ەستافەتا قاتىسۋشىلارى, سونداي-اق كاسىپقوي جەڭىل اتلەتتەر, جارتىلاي مارافوننان (21,1 كم) قازاقستان چەمپيوناتىنىڭ قاتىسۋشىلارى سورەگە شىقتى.
جارتىلاي مارافونشىلاردىڭ اراسىنان مارە سىزىعىنا ءبىرىنشى بولىپ جەتكەن حالىقارالىق دەڭگەيدەگى جەڭىل اتلەتيكالىق سپورت شەبەرى ريناس احمەدەەۆ بولدى. ونىڭ مارە ۋاقىتى - 1 ساعات 5 مينۋت جانە 11 سەكۋند, جانە دە بۇل كورسەتكىش الماتى جارتىلاي مارافونى جول باعىتىنىڭ ابسوليۋتتىك رەكوردى.
1:06:57 ناتيجەسىمەن جۇگىرىپ كەلگەن كەلمانوۆ راكىمجان قازاقستان رەسپۋبليكاسى چەمپيونى اتاعىنا يە بولدى.
ايەلدەردىڭ اراسىنان مارەگە ءبىرىنشى بولىپ جەتكەن تالدىقورعان قالاسىنان مادينا كەريموۆا بولدى. سونداي-اق ول 1 ساعات 18 مينۋت 52 سەكۋند ۋاقىتىمەن جارتىلاي مارافوننان قازاقستان رەسپۋبليكاسى چەمپيونى اتاندى.
ەستافەتا كوماندالارىنىڭ اراسىندا JRun جۇگىرۋ مەكتەبىنىڭ كومانداسى جەڭىسكە جەتتى.