بيىلعى كوكتەم سولتۇستىككە كەنەتتەن كەلدى. ناۋرىزدىڭ 30-ىنان باستاپ اۋانىڭ تەمپەراتۋراسى كۇندىز ۇنەمى نولدەن جوعارى بولدى. باسقا جىلداردا بۇل كورىنىس 9-10 كۇننەن كەيىن عانا بولاتىن. جىلى كۇننىڭ اسەرىنەن قار دا تەز ەرىدى. ال سوڭعى 4-5 كۇن بويى پەتروپاۆلدا ءبىر قارا داۋىل سوعادى دا تۇرادى. 6 ساۋىردە ءتۇن ورتاسىندا سەبەلەپ جاڭبىر جاۋعان, سودان بەرى قۇرعاق. ەندى ەكپىندەي سوعاتىن مىنا قارا جەل ءبارىن قۇرعاتىپ, ونىڭ ۇستىنە ءورت قاۋپىن ۇدەتىپ تۇر.
جۋىردا زارەچنىي كەنتىندەگى «رەنەت», «ۆەسنا» ساياجايلارىنان وت شىعىپ, كەشىكپەي ول قۇرعاق داۋىلدىڭ كۇشىمەن قالىڭ ورتكە اينالدى. تج دەپارتامەنتىنىڭ ءباسپاسوز حاتشىسى ە.جۋراۆلەۆتىڭ ايتۋىنا قاراعاندا, ءورت «كيروۆەتس», «سترويتەل», «جەمچۋجينا» دەگەن يەسىز ساياجاي ۋچاسكەلەرىنە جايىلىپ, 10 گەكتار جەردى قامتىعان. باسىندا ەكى ورتسوندىرگىش كولىك جىبەرىلگەن ءورت بارعان سايىن جايىلىپ, داۋىلدىڭ اسەرىمەن لاپىلداپ, جالىن اسپانعا كوتەرىلىپ, بۇكىل قالا تۇرعىندارىنا كورىندى. ءورت سوندىرۋشىلەرگە جەرگىلىكتى بيلىك وكىلدەرى مەن بيزنەس قۇرىلىمدارى دا كومەككە كەلدى. اقىرىندا 12 ءورتسوندىرۋ تەحنيكاسى مەن 70-تەي ادام كۇشى ءورتتى كەشكى ساعات 21.00-دە عانا اۋىزدىقتادى. سونىڭ وزىندە تاڭعا دەيىن بىقسىپ جاتقان جەرلەر بولدى. ءورتتى تەز سوندىرۋگە ساياباق جولدارىنىڭ تارلىعى دا كەسىرىن تيگىزىپ باقتى. جىپىرلاتىپ تىعىز جاسالعان قورشاۋلار جولدىڭ ءبارىن تارىلتىپ تاستاعان. تار جولداردا الىپ تەحنيكالار وتە الماي, وتكەنى سۋى بىتكەن سوڭ اينالىپ شىعا الماي ۋاقىت جوعالتتى.
قازىر كەلتىرىلگەن شىعىن كولەمى انىقتالۋدا. ايتەۋىر جارالانعاندار مەن ادام شىعىنى جوق.
ءدال وسى كۇنى «كوپاي» شاعىن اۋدانىنداعى «زارينا» ديىرمەنىنىڭ ماڭىنداعى قالىڭ قامىستان ءورت شىقتى. بۇل جەردەگى ءورتتى سوندىرۋگە 2 تەحنيكا جانە 13 ادام كۇشى جۇمىلدىرىلدى. جالىنمەن ارپالىسقان جاندار ءورتتى تەك تۇنگى ساعات 23.00-دە عانا اۋىزدىقتاي الدى. ءبىر جاقسىسى, زارداپ شەككەندەر مەن قازا بولعاندار جوق.
پەتروپاۆل قالاسىنىڭ اكىمى بولات جۇمابەكوۆ ءورتتىڭ شىعۋ سەبەبى كۇننىڭ داۋىل ەكەندىگىنە قاراماي بىلتىرعى قاۋدى جاعۋدىڭ سالدارى دەپ وتىر. «كەيبىر تۇرعىندار ءورت قاۋىپسىزدىگى شارالارىن ساقتامايدى. سونىڭ سالدارىنان ۇلكەن شىعىندارعا ۇشىراپ وتىرمىز», دەي كەلىپ, ول قالا تۇرعىندارىن ءورت قاۋىپسىزدىگىن قاتاڭ ساقتاۋعا شاقىردى.
وبلىستىق تج دەپارتامەنتى ءورت باقىلاۋ باسقارماسىنىڭ باستىعى دميتري ءراستيحيننىڭ ايتۋىنا قاراعاندا, بيىل جىل باسىنان بەرى 139 ءورت سوندىرىلگەن ەكەن. كەلتىرىلگەن ماتەريالدىق شىعىننىڭ كولەمى – 83,6 ملن تەڭگە. سونىمەن بىرگە 14 ادام ورتتەن قازا بولىپ, 5 ادام اۋىر جارالانعان. ول دا ءورتتىڭ نەگىزگى سەبەبى ادامداردىڭ ءورت قاۋىپسىزدىگىن ساقتاماعانىنان بولاتىنىن ايتادى. ء«بىز وسى ايدا عانا جۇرگىزىلگەن رەيدتىڭ بارىسىندا ءورت قاۋىپسىزدىگىن ساقتاماعان 16 ادام انىقتالدى. ولاردىڭ ىشىندە 6 تۇلعاعا 184 مىڭ تەڭگەنىڭ ايىپپ ۇلى سالىندى», دەدى د.راستيحين.
اۋا رايىن بولجاۋ قىزمەتىنىڭ ايتۋىنا قاراعاندا, سولتۇستىك قازاقستان وبلىسىندا اۋانىڭ جىلىنۋى 12-14 گرادۋسقا دەيىن كوتەرىلمەك. ءتىپتى كەي كۇندەرى 28 گرادۋسقا دەيىن ىسيدى. ەگىستىڭ ىلعالى ۇشىپ كەتەتىن بولعاندىقتان بۇل ديقان قاۋىمىن الاڭداتۋدا. الايدا بيىلعى جازدا قۇرعاقشىلىق بولادى دەگەن بولجام جوق, جاۋىن-شاشىن جىلداعى نورمادا بولادى دەگەن ءۇمىت باسىم.
سولتۇستىك قازاقستان وبلىسى