كۇنى كەشە بارشا قازاقستان حالقىن ۇلكەن قۋانىشقا بولەگەن بوكس جەكپە-جەگى وتكەنى بەلگىلى. وندا وتانىمىزدىڭ داڭقىن الىسقا اسىرىپ جۇرگەن كاسىپقوي بوكستىڭ حاس شەبەرى گەننادي گولوۆكين اۋەسقوي جانە كاسىپقوي بوكستاعى بۇكىل جاپونيانىڭ ماقتانىشى, 2012 جىلعى لوندون وليمپياداسىنىڭ جەڭىمپازى, كاسىپقويلار اراسىندا WBA نۇسقاسى بويىنشا تۇراقتى چەمپيون ريوتا مۋراتانى 12 راۋندقا ەسەپتەلگەن جەكپە-جەكتىڭ 9-شى راۋندىندا تەحنيكالىق نوكاۋتپەن جەڭىپ, ءتورت جىل بۇرىن ايىرىلىپ قالعان سول WBA بەلبەۋىن قايتارىپ الدى.
بۇل جەكپە-جەكتىڭ جاپونيادا ءوتۋىنىڭ ءتيىمدى جاعى سول, ۋاقىتى جاعىنان قازاقستاندىقتار ءۇشىن وتە قولايلىلىعىمەن ەرەكشەلەندى. وسىنىڭ ناتيجەسىندە شارشى الاڭنىڭ شاڭىن شىعارعان جەكپە-جەكتى ەڭبەكتەگەن بالادان ەڭكەيگەن كارىگە دەيىن تاماشالاۋعا مۇمكىندىك الدى. ءتىپتى وزدەرىن سپورتقا جاقىن سانامايتىن جۇرتشىلىق تا سول كۇنى تەلەديدارعا تەلمىردى. جەكپە-جەك اياقتالعان سوڭ جەرلەسىمىز ءوزىن جەڭىسىمەن قۇتتىقتاپ, قولداۋ بىلدىرگەن بارشاعا ريزا ەكەنىن ايتتى. «اسىرەسە, قازاقستاندىق جانكۇيەرلەرگە ريزاشىلىعىمدى بىلدىرەمىن.مەن ارقاشان سىزدەردىڭ قولداۋلارىڭىزدى سەزىنىپ جۇرەمىن. راحمەت, سىزدەرگە! العا قازاقستان!», دەدى قاراعاندىلىق چەمپيون.
كوپتەگەن جانكۇيەرگە گ.گولوۆكيننىڭ ءوزىن كەڭقولتىق قازاقى قالىپتا كورسەتكەنى دە قاتتى ۇنادى. قارسىلاسىنا ءوزىنىڭ اجىراماس سيمۆوليكاسىنا اينالعان ويۋلى شاپانىن جاپقانى ءوز الدىنا, جەڭىپ العان بەلبەۋىن قايتارىپ بەرگەنىن حالقىمىزعا ءتان مارتتىكتىڭ جارقىن كورىنىسىنە بالادىق.
ەگەمەن ەلىمىزدىڭ كوك تۋىن جەلبىرەتىپ, ءانۇرانىن اسقاقتاتىپ جۇرگەن گەنا باۋىرىمىزعا ارقاشان ابىروي بيىگىنەن كورىنە بەر دەگەن تىلەك قوسقىم كەلەدى.
قىمبات بەكماعامبەتوۆا,
زەينەتكەر
اقمولا وبلىسى,
ستەپنياك قالاسى