قازاقستان پرەزيدەنتى قاسىم-جومارت توقاەۆ ريم پاپاسى فرانتسيسكپەن ەكىجاقتى كەلىسسوز جۇرگىزدى. كەلىسسوز بەينەبايلانىس رەجيمىندە ءوتتى, دەپ حابارلايدى Egemen.kz اقوردانىڭ رەسمي سايتىنا سىلتەمە جاساپ.
كەزدەسۋ بارىسىندا قازاقستان مەن ۆاتيكان اراسىنداعى ىنتىماقتاستىقتى نىعايتۋدىڭ پەرسپەكتيۆالارى, ونىڭ ىشىندە كونفەسسياارالىق كەلىسىم مەن دىنارالىق ديالوگتى ىلگەرىلەتۋ ماسەلەلەرى كوتەرىلدى.
كەلىسسوز بارىسىندا بيىلعى قىركۇيەك ايىندا وتەتىن الەمدىك جانە ءداستۇرلى دىندەر كوشباسشىلارىنىڭ VII سەزى تالقىلاندى. اتالعان فورۋم نۇر-سۇلتان قالاسىندا وتەتىنىن ايتا كەتكەن ءجون. سوندىقتان قاسىم-جومارت توقاەۆ بۇل فورۋمنىڭ قازاقستان ءۇشىن ماڭىزى زور ەكەنىن اتاپ ءوتتى.
پرەزيدەنت كونفەسسياارالىق كەلىسىم مەن بىرلىكتىڭ قازاقستاندىق مودەلى تۋرالى ايتتى. سونداي-اق مەملەكەت باسشىسى ريم پاپاسىنا قازاقستاندا جۇزەگە اسىرىلىپ جاتقان اۋقىمدى ساياسي جانە ەكونوميكالىق رەفورمالار جونىندە بىرقاتار مالىمەت بەردى.
ريم پاپاسى كەزدەسۋگە مۇمكىندىك بەرگەنى ءۇشىن پرەزيدەنتكە ريزاشىلىعىن ءبىلدىرىپ, قازاقستانعا رەسمي ساپارمەن كەلەتىنىن, الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىساتىنىن راستادى. سونداي-اق ءوزىنىڭ قازاقستانعا ساپارى مەن الداعى ۋاقىتتا وتەتىن فورۋمنان ۇلكەن ءۇمىت كۇتەتىنىن جەتكىزدى.
«مەن دىنارالىق ديالوگتى, مەملەكەتتەردىڭ بىرلىگى مەن جاقىنداسۋىن ىلگەرىلەتۋ تۇرعىسىنان وسى كەلەلى جيىندى تاعاتسىزدانا كۇتەمىن. مۇنىڭ قازىرگى ۋاقىتتا ءمانى وتە زور», دەدى كاتوليك شىركەۋىنىڭ باسشىسى.
پونتيفيك قازىرگى كۇردەلى گەوساياسي جاعداي كەزىندە الەمدە بىرلىك پەن كەلىسىمگە قول جەتكىزۋ اسا ماڭىزدى ەكەنىن جەتكىزدى.
ء«سىزدىڭ ەلىڭىزدىڭ قانشالىقتى ءارالۋان جانە تۇتاس ەكەنىن كورىپ وتىرمىز. بۇل – تۇراقتىلىقتىڭ نەگىزى. قازاقستاندا بۇعان تۇسىنىستىكپەن قارايتىنىنا قۋانىشتىمىز. مەنىڭ قولداۋىما سەنۋىڭىزگە بولادى. ءسىزدىڭ كۇش-جىگەرىڭىزدى باعالايمىن», دەدى ريم پاپاسى.
كەلىسسوز سوڭىندا قاسىم-جومارت توقاەۆ قازاقستاننىڭ قاسيەتتى تاقپەن رۋحاني كەلىسىم جانە ءوزارا قۇرمەت كورسەتۋ سالاسىنداعى ىنتىماقتاستىقتى ودان ءارى دامىتۋعا بەيىلدى ەكەنىن ناقتىلادى.