شىعىس قازاقستان وبلىسى بورودۋليحا اۋدانىندا سۋ باسقان ۇيلەردەن 36 ادام ەۆاكۋاتسيالاندى, دەپ حابارلايدى Egemen.kz شقو توتەنشە جاعدايلار دەپارتامەنتىنىڭ ءباسپاسوز قىزمەتىنە سىلتەمە جاساپ.
بورودۋليحا اۋدانىنداعى ۇبە وزەنىندە سۋ دەڭگەيىنىڭ كوتەرىلۋى جانە مۇز كەپتەلۋى سالدارىنان رەچنوە اۋىلىنىڭ تۇرعىندارى ەۆاكۋاتسيالاندى.
- 9 ءساۋىر كۇنى تاڭەرتەڭ كوتەرىلگەن سۋ اۋەلدە 2 ءۇي مەن 3 ءۇي ماڭىنداعى اۋماقتى باستى. قۇتقارۋشىلار 50-دەن استام مالدى قاۋىپسىز جەرگە كوشىردى. 16 تۇرعىن, ونىڭ ىشىندە 2 بالا تۋىستارىنىڭ ۇيلەرىنە ورنالاستىرىلدى. جەرگىلىكتى اتقارۋشى ورگاندار مەن قۇتقارۋشىلار مۇز كەپتەلگەن ۋچاسكەگە اەروۆيزۋالدى مونيتورينگ جۇرگىزدى. ناتيجەسىندە, مۇزدى قوپسىتۋ ماقساتىندا جارىلىس جۇمىستارىن جۇرگىزۋ تۋرالى شەشىم قابىلداندى. بارلىعى 2347,5 كەلى جارىلعىش زاتتار قولدانىلدى. جارىلىس جۇمىستارىنىڭ جالپى اۋدانى 6067 شارشى مەتردى قۇرادى, - دەلىنگەن اقپاراتتا.
20 ساعات ىشىندە سۋ دەڭگەيى تاعى كوتەرىلىپ, ۇيلەرگە كىرە باستاعان. قازىرگى ۋاقىتتا بارلىعى 8 ءۇي سۋ استىندا قالدى. قۇتقارۋشىلاردىڭ باقىلاۋىمەن تۇرعىندار دەرەۋ ۇيلەرىنەن كوشىرىلدى. 9-10 ءساۋىر كۇندەرى 36 تۇرعىن, ونىڭ ىشىندە 10 بالا تۋىستارىنىڭ ۇيىنە ورنالاستىرىلدى.
وقيعا ورنىندا تجد جەكە قۇرامىنان 69 ادام, 2 ءجۇزۋ قۇرالى, 11 موتوپومپا جانە 8 تەحنيكا, جەرگىلىكتى اتقارۋشى ورگانداردان 20 قىزمەتكەر جانە 8 تەحنيكا جۇمىلدىرىلعان. قوعامدىق ءتارتىپتى ساقتاۋ جانە سۋ باسقان ۇيلەردەن توناۋ فاكتىلەرىن بولدىرماۋ ءۇشىن پوليتسەيلەر كەزەكشىلىك ەتۋدە.
قازىرگى ساتتە وزەندە سۋ دەڭگەيىنىڭ تومەندەۋى بايقالادى.