ادامدى قايتا تاربيەلەۋگە بولا ما؟

قاراڭعى قازاق كوگىندە ءبىلىم مەن عىلىمنىڭ تۋىن جەلبىرەتىپ, قانداستارىنا سىني كوزبەن قاراپ قانا قويماي, ولارعا باعدار بەرىپ, قايتا تاربيەلەۋ ءۇشىن بارلىق كۇش-جىگەرىن دە, تەمىردەي بەرىك جۇيكەسىن دە, قارىمدى قالامىن دا اياماي جۇمساپ, مىڭمەن ءبىر ءوزى الىسىپ وتكەن زامانىنان وزىپ تۋعان دانىشپان اباي قايتا تاربيەلەۋگە بولادى دەيدى. قولىندا بيلىگى بولسا, ادامدى قايتا تاربيەلەۋگە بولمايدى دەگەن ادامنىڭ ءتىلىن دە كەسەر مە ەدى, كىم ءبىلسىن.

سودان بەرى اباي تاربيەسىن ماقۇل ەتكەن, اششى سىندارىنا تۇششىنعان, دانىشپان سىلتەگەن جولمەن ءجۇرۋدى مۇرات ەتكەن ەكى عاسىرعا جۋىق ۋاقىت ءوتتى. ايتقاندارى سانامىزعا تەرەڭ سىڭبەسە دە بۇل كۇندە ءجيى ەسكە الاتىن حالدەمىز.

ال قازىر قوعامدا سانامىزدا جەتپىس جىل بويى كومپارتيا ءسىڭىرىپ كەلگەن يدەولوگيا دا ازدى-كوپتى ءومىر ءسۇرىپ جاتقانىن قاپەردەن شىعارماعان ءجون.

بۇرىندارى ءبىر رۋلى ەلدى جۇرت الدىندا بەدەلدى, ءارى-بەرگىنى بولجاي بىلەتىن, وزىنەن گورى وزگەنىڭ, ەلدىڭ قامىن كوبىرەك ويلايتىن ءبىر قاريا بيلەيتىن بولسا, بۇل كۇندە شاراپاتىن اينالاسىنا مولىنان شاشقان اۋىل اعاسىن ىزدەپ تابۋدىڭ ءوزى وڭاي ەمەس. تاپقان كۇننىڭ وزىندە ونداي داناگوي قارتتى تىڭدايتىن, اقىلىنا قۇلاق اساتىن جانداردى كەزدەستىرۋ دە قيىننىڭ قيىنى بولىپ بارادى.

جاسىرىپ قايتەمىز, قازىرگىدەي دۇربەلەڭى كوپ دۇنيەدە كەيدە تۇتاس ۇلتتىڭ قامىنان گورى, رۋدىڭ جالاۋىن كوتەرىپ كەتەتىنىمىز جانە بار. تاۋەلسىزدىك العان وتىز جىلىمىزدا رۋشىلدىعىمىز باسەڭدەۋدىڭ ورنىنا ودان ءارى ءورشىپ كەتكەندەي كورىنەدى ماعان. قاراپ وتىرىپ وزىمنەن ءوزىم شوشيمىن. وسىلاي كەتە بەرسەك, جاڭا قازاقستاندى قالاي قۇرامىز؟

مەنىڭشە, جاڭا قازاقستاندى قۇرۋ اركىمنىڭ وزىنەن باستالۋعا ءتيىس. ادامدى قايتا تاربيەلەۋ, ارينە, قيىننىڭ قيىنى. بىراق اركىم ءوزىن ءوزى قايتا تاربيەلەي الادى. بويىندا ار-ۇياتى بار سانالى ادام ءوزىن ءوزى ءومىر بويى تاربيەلەيدى. ويتكەنى ءومىردىڭ ءوزى ساباق!

بۇعان قوسارىم, ارقايسىمىز ءبىرىمىز ءۇشىن ەكىنشىمىز جان الىسىپ, جان بەرىسەتىن تاس ءتۇيىن ەل بولۋعا ۇمتىلۋىمىز قاجەت. قانداي قيىن جاعدايدا دا ءبىر-ءبىرىمىزدى تۇسىنۋگە تىرىسىپ, ءبىر-ءبىرىمىزدى قولتىعىمىزدان دەمەپ, ءبىر-بىرىمىزگە سۇيەنىش, تىرەۋ بولا بىلسەك, بولاشاعىمىزدىڭ كوكجيەگى دە كەڭەيە تۇسەدى. ەل باسىنا اۋىرتپالىق تۇسە قالسا, بىرلەسىپ كوتەرىسۋ دە وڭاي بولادى.

سوندا عانا پرەزيدەنت ۇسىنعان جاڭا قازاقستاندى بۇكىل حالىقتىڭ ويىنان شىعاتىنداي ەتىپ قۇرا الماقپىز.

مارات قاشقىنباەۆ,

بالقاش اۋدانىنىڭ قۇرمەتتى ازاماتى

الماتى وبلىسى,

باقاناس اۋىلى