ءماجىلىس اتقارۋشىلىق ءىس جۇرگىزۋدى جەتىلدىرۋگە باعىتتالعان زاڭ جوباسىن ماقۇلدادى

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە اتقارۋشىلىق ءىس جۇرگىزۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭىنىڭ جوباسىن ارىپتەستەرىنە ءماجىلىس دەپۋتاتى دميتري كولودا تانىستىردى.

قۇجاتتا اتقارۋشىلىق ءىس جۇرگىزۋ ماسەلەلەرى بويىنشا زاڭنامالىق اكتىلەردەگى ولقىلىقتاردى, كولليزيالار مەن قايشىلىقتاردى, سونداي-اق سىبايلاس جەمقورلىق كورىنىستەرىنە ىقپال ەتەتىن نورمالاردى جويۋ كوزدەلەدى.

ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ توراعاسى ارمان قوجاحمەتوۆتىڭ ايتۋىنا قاراعاندا, زاڭ جوباسىن قابىلداۋ بىرنەشە ماسەلەنى شەشۋگە مۇمكىندىك بەرەدى.

ولار:

- جەكە سوت ورىنداۋشىلارىنىڭ اتقارۋشىلىق ءىس جۇرگىزۋدى اياقتاعان كەزدە الدىڭعى جەكە سوت ورىنداۋشىلارى شىعارعان ماجبۇرلەۋ شارالارى تۋرالى بارلىق قاۋلىلاردىڭ كۇشىن جويۋ مىندەتىن بەلگىلەۋ;

- سىبايلاس جەمقورلىق قۇقىق بۇزۋشىلىقتى بولعىزباۋ ماقساتىندا بورىشكەردى شاقىرۋ نەگىزدەرىن قىسقارتۋ;

- جەكە سوت ورىنداۋشىلارىنىڭ اتقارۋشىلىق ءىس جۇرگىزۋدى قوزعاۋ تۋرالى قاۋلىنىڭ كوشىرمەسىن جىبەرۋ جانە ماجبۇرلەپ ورىنداتۋ شارالارى تۋرالى حابار بەرۋ جونىندەگى مىندەتىن بەلگىلەۋ. زاڭ جوباسى قابىلدانعان جاعدايدا مىناداي وڭ قۇقىقتىق جانە الەۋمەتتىك-ەكونوميكالىق سالدار كوزدەلەدى:

- اتقارۋشىلىق ءىس جۇرگىزۋگە قاتىساتىن ازاماتتار مەن ۇيىمداردىڭ قۇقىقتارىن نەعۇرلىم جاقسى قامتاماسىز ەتۋ;

- اتقارۋشىلىق ءىس جۇرگىزۋ ماسەلەلەرى بويىنشا شاعىمدار مەن وتىنىشتەردىڭ سانىن ازايتۋ. زاڭ جوباسىن دەپۋتاتتار ءبىرىنشى وقىلىمدا ماقۇلداپ داۋىس بەردى.