شىڭىراۋ تۇبىندەگى شىندىق

جالعان ءسوز, شىن ءسوز – قاتار ءومىر سۇرەتىن ەگىز قۇبىلىس. ءبارىن ءبىلۋ ءۇشىن ءبىرىنىڭ ماڭىزىنان ءمانىن, ءبىرىنىڭ مازمۇنىنان ماعىناسىن تانىعان ءجون.

قارسى الدىندا تۇرعان – قارا قۇردىم بولگەن قايقاڭ بيىك. جوعارىدان كورىنۋ ءۇشىن تومەننەن باستاۋ قاجەت.

شىڭىراۋ وزىنە تەسىلىپ قا­راعان ادامعا ءوزى دە قادالىپ قارايدى. تۇڭعيىقتىڭ ءجۇزى سۋىق. تەرەڭ شۇڭعىمانىڭ قۇ­شاعى كەڭ.

پوۆەست – ابەكەڭدىكى ء(ابىش كەكىلباي), كينوۆەرسياسى – جانىبەك جەتىرۋدىكى. اقيقات قانا قۇدايدىكى.

رەجيسسەر الەمدى وپەراتور­دىڭ كوزىمەن كورەدى, وپەراتور دۇنيەجارىقتى رەجيسسەردىڭ دۇنيەتانىمىنا (ولشەمىنە) سىيعىزادى.

فيلمدەگى ءاربىر كادر – پاڭ.

شالقاق. ءسان-سالتاناتى اس­قان كوش, ايبىنى باسقان لەك. فوتواپپاراتتاي جارق-جۇرق ەتكەن كورىنىس جوق, ساحنادا ەسترادا ەمەس, وپەرا. ويلاندىراتىن, تولعاندىراتىن جانر.

ءار كادر – باياۋ. ۋاقيعالارى باسەڭ. قاھارماندارى ورنىق­تى, بايىپتى, سابىرلى. كلاس­سيكادا اسىعىستىق جوق. ول – ماڭگىلىكتىڭ كاتەگورياسى. بۇگىن­گىنىڭ ۋاقىتى تار.

ءبىر سۋرەت – ءبىر كادر.

جيۆوپيس.

ءوز الدىنا شەدەۆر. ارەكەت – مازمۇندى, ءسوز – دەرەكتى. وت­كىر كوزدە, قۇمىعىپ جەتكەن داۋىستا – ءومىر. دىبىستاردا – سان الۋان تىرشىلىكتىڭ بوياۋى. قا­راكەتى. كەيدە جالپى فون ءىرى پلانعا قىزمەت ەتەدى. ءىرى پلان ءوز كەزەگىندە فون كەڭدىگىن, تەرەڭ­دىگىن, ۇزاقتىعىن بىلدىرەدى.

شۋدىڭ دا ءتارتىبى بار. دى­بىس داۋىستى, داۋىس دىبىس­تى قوزعايدى. سۋدىڭ كەلە جاتقانى تۇلا بويىڭدى شىمىرلاتادى. ونىڭ ءوزى كينو.

بىلعارى شەلەكتىڭ تۇسكەنى مەن كوتەرىلگەنى – عاجاپ. كينو دەگەنىمىز سول. قۇدىقتىڭ اۋزىنا جەتىپ, كەنەرەسىمەن تەڭەسكەندە دوڭگەلەك كەڭىستىكتەن ايدىڭ قي­ىعى كورىنەدى. بۇل جەكە تالدانۋى ءتيىس ەپيزود.

باياۋ ءفيلمنىڭ بەينەتى كوپ, سونىسىمەن قۇندى. سيۋجەتتە جال­عان دەتەكتيۆ ازايعاندا, شىن كينو كوبەيەدى.

اسەم كادر – كينونىڭ الدى. فابۋلادان ستسەناريدى قيىپ العاندا, سيۋجەت شىعادى.

ديسپوزيتسيادان – كومپوزيتسيا, جەلىدەن – كوگەن.

ءفيلمنىڭ مازمۇنى – قۇ­دىقتىڭ سىرتىندا ەمەس, ىشىندە. شىن ارپالىس شىڭى­راۋدا. باقتالاستىق تا, باقىت تا, باق تا.

قاراقالپاقستان اۋىپ كەلگەن شەبەردىڭ كىناسى سول – ول تالانتتى. ەرتەدە دارىن دارىنعا دوس, ءبىر-بىرىنە جاق ەدى. ونى شايتان اربادى. اتاعىن, ابىرويىن قىزعاندى. سودان بەرى باسىنان باق تايدى, قۇتى قاشتى, سورلادى.

شىڭىراۋعا قىزىعىپ ەدى, شىڭىراۋدى مولىنان كور­دى. ونى شىڭىراۋ جۇتىپ قوي­دى, تەڭىزگە بەت العان اعىس جو­لىنداعىسىن قيراتىپ, جويى­پ, قوپارىپ, وزىمەن بىرگە اق تەڭىزگە الا كەتتى.

تەڭىز العانىن بەرمەيدى, ادام العانىن بەرۋى ءتيىس ەكەن. بويىنداعى قارىم-قابىلەت, قادىر-قاسيەت حالىقتىكى.

ەڭسەپ كومۋسىز قالدى. قازعان ۇلى قۇدىعى «ەڭسەپ ولگەن» اتاندى.

بۇل شىعارما – ءتامسىل. جا­ڭابەكتىڭ كينو-ءتامسىلى: تالانت – قۇداي بەرگەن قارىز. ونى وتەمەي و جاققا كەتە المايسىڭ.

ەلگە جاساعان قىزمەتىڭدى كوپسىنبە, ەلدىڭ بويىنداعى تالانتتى ازسىنبا, دەيدى كينو. باس كەيىپكەردى سومداۋشى اك­تەر­دىڭ شەبەرلىگى تامساندىردى. نەگىزىنەن, رەجيسسەرلىك جۇمىس, اۆتورلىق كوزقاراس.

راسىندا, بۇل جاڭابەكتىڭ, قالا بەردى, قازاقتىڭ ەڭ ۇزدىك كينولارىنىڭ ءبىرى. ول توپ جارىپ شىقتى. تەك سابىر كەرەك...

ديدار امانتاي