«كوكەك» ايەل مۇحيت اسىپتى...

پەتروپاۆلدىڭ سوتى كامەلەتكە تول­ما­عان بالاسى ءۇشىن ايەلدەن اليمەنت ءوندىرۋ تۋرالى شەشىم شىعارادى. بىراق سوت شەشىمى قولىنا تيسە دە, تۋعان بالاسىنا جانى اشىماعان «كوكەك» ايەل اليمەنت تولەۋدى ويىنا دا الماي, رەسەيدىڭ تۇمەن قالاسىندا باسقا ءبىر ەركەكپەن تۇرىپ جاتادى. بىراق قازاقستاندىق سوت شە­شىمىن ورىنداتۋشىلار دا ونىڭ قىر-سوڭىنان قالمايدى. الايدا ايەل ءىزىن جوعالتىپ, تۇمەن قالاسىنان (رەسەي) كوشىپ كەتەدى.

ناۋ­رىزدىڭ 28 مەن 30-ى ارالىعىندا سولتۇستىك قازاقستان وبلىسىنىڭ پوليتسەيلەرى بورىشكەرلەردى, اليمەنتتەن جالتارۋشىلاردى جانە تۋىستىق باي­لانىستارىن ۇزگەندەردى ىزدەستىرۋ بويىنشا اكتسيا وتكىزگەن بولاتىن. اكتسيا بارىسىندا 40 جاستاعى «كوكەك» ايەلدىڭ اقش-قا قونىس اۋدارعانى بەلگىلى بولىپ, امەريكاداعى مەكەن-جايى انىقتالدى. ەندى سوت ورىنداۋشىسى اقش-تىڭ قۇقىق قورعاۋ ورگاندارى ارقىلى اليمەنتتى ءوندىرىپ الاتىن شىعار دەگەن ءۇمىت بار. بۇل وقيعا قازىرگى زاماندا ءتىپتى باسقا مەملەكەتكە قاشۋدىڭ ءوزى سوتتىڭ قۇرىعىنان قۇتقارمايتىنىن كورسەتتى.

اتالعان اكتسيا بارىسىندا وبلىس پوليتسەيلەرى بارلىعى 75 ءىس بويىنشا بورىشكەرلەردى ىزدەستىرگەن. ونىڭ جارتىسى دەرلىك بالالاردى قاراۋسىز قالدىرعان اتا-انالارمەن بايلانىستى. «جالپى, اكتسيانىڭ العاشقى كۇنىندە ىزدەۋدە جۇرگەن 14 ادام انىقتالدى. ونىڭ 4-ءۋى بورىشكەر, 7-ءۋى اليمەنت تولەمەۋشى جانە تۋىستىق بايلانىس­تارىن جوعالتقان 3 ادام. ولاردىڭ بەسەۋى وبلىس اۋماعىنان تىس جەردە انىقتالدى, ەكەۋى الىس شەتەلدە ەكەنى بەلگىلى بولدى. اراقاشىقتىق جۇمىستى قيىنداتا تۇ­سە­دى, بىراق باعىندىرىلمايتىن كە­دەرگى جوق. ىزدەۋ جۇمىسى ۇدايى نەگىز­دە جالعاساتىن بولادى. جىل باسىنان كوشى-قون قىزمەتىنىڭ بارلىق ءۇش باعىتى بو­يىنشا 93 ادام ەسەپتە تۇرعان, قازىرگى ۋاقىتتا 43 ادامنىڭ جۇرگەن جەرى انىقتالدى», دەيدى پوليتسيا دەپار­تا­مەن­تى كوشى-قون قىزمەتى باسقارماسى باسشىسىنىڭ مىندەتىن اتقارۋشى, پو­ليتسيا پودپولكوۆنيگى ەرمەك نۇسىرباەۆ.

سولتۇستىك قازاقستان وبلىسى