ايدىڭ كۇننىڭ امانىندا ۇلىنان ايىرىلىپ قالعان اكەنىڭ تىلەگى بۇل. وتكەن ايدا «Egemen Qazaqstan» گازەتىنىڭ رەداكتسياسىنا ءۇرجار اۋدانىنا قاراستى اقشوقى اۋىلىنىڭ تۇرعىنى بەكەن نۇرقانوۆ بالاسىنىڭ ولىمىنە بايلانىستى تەرگەۋ ءادىل جۇرسە دەگەن ماقساتپەن حات جولداپتى. بالاسى نۇرىم نۇرقانوۆتى 20 قاڭتار كۇنى باقتى اۋىلىنا كىرەبەرىستە اتىپ كەتكەن ەكەن. وقيعا تۇسىنىكتى بولۋى ءۇشىن ادىلدىك ىزدەگەن اكەنىڭ حاتىن ىقشامداپ, وقىرمانعا ۇسىنايىق.
«قاڭتاردىڭ 20-سى كۇنى تۇستەن كەيىن ۇلىم نۇرىم نۇرقانوۆ, دوسى اسىلبەك تلەنوۆ جانە جەزدەسى قىزىربەك قارلىباەۆ الماتى قالاسىنان ءۇرجار اۋدانىنىڭ باقتى اۋىلىنا جولعا شىعادى. الماتى مەن باقتى اۋىلىنىڭ اراسى شامامەن 900 شاقىرىمعا جۋىق. ءسويتىپ, باقتىعا 20 كم جەر قالعاندا, يەن دالادا, تۇنگى ساعات 1-لەر شاماسىندا بەلگىسىز بىرەۋلەر ۇشەۋ مىنگەن كولىكتى توقتاتادى. ءتۇن ورتاسى. قازاقستاندا توتەنشە جاعداي رەجىمى ەندى عانا الىنىپ جاتقاندىقتان, كولىكتى توقتاتۋعا باتىلى بارمايدى. الايدا بەلگىسىز ازاماتتار ارتىنان لەزدە قۋىپ, فارلارىن جاعىپ-ءوشىرىپ توقتاتادى. سويتسە, باقتى اۋىلىنىڭ جىگىتتەرى ەكەن. ءبىر-ءبىرىن سول جەردە تانيدى. بالام «مەن اسىعىس ەدىم, كولىگىمدە دوسىم بار, باقتى اۋىلىندا سويلەسەيىك» دەپ ءجۇرىپ كەتەدى. توقتاتقان جىگىت جەرلەسىمىز ا. ەسىمدى ازامات ەكەن. ول ىلە-شالا ارتىنان ءجۇرىپ وتىرادى دا, باقتى اۋىلىنىڭ جىگىتتەرىنە ۇيالى تەلەفونمەن حابارلاسىپ, كۇتىپ الۋ كەرەكتىگىن ايتقان كورىنەدى. باقتى اۋىلىنا كىرە بەرىستە ءۇش بىردەي جەڭىل كولىك جولعا كولدەنەڭنەن تۇرىپ, جۇرگىزبەي قويادى. سول جەردە ا. ەسىمدى ازامات مىلتىقپەن اتادى. ءبىرىنشى اتىلعان وق اسفالتقا ءتيىپ, ۇشقىن شىعىپتى. ەكىنشى وق اياعىنا ءتيىپ, ۇلىم سول جەردە قۇلايدى. سول جەردەن ماقانشى اۋىلىنىڭ اۋرۋحاناسىنا جەتكەنشە, كوپ قان جوعالتىپ, قايتىس بولدى.
سونداعى مەنىڭ ۇلىما تاعىلعان ايىپ «مەن توقتاتقاندا, سەن نەگە توقتامادىڭ» دەگەننىڭ توڭىرەگىندە. وقيعا ورنىنان بارلىق جىگىتتەر قاشىپ كەتەدى. بىرنەشە ساعاتتان كەيىن پوليتسيا كەلىپ, ءتورت ازاماتتى تەرگەۋ اباقتىسىنا قامايدى. ەرتەڭىندە قارۋ ۇستاعان ازامات تا ۇستالىپ, تەرگەۋ اباقتىسىنا قامالادى. كىناسىن مويىنداعان كورىنەدى. ال قالعان ءتورت جىگىت ء«بىز تەك كۋامىز» دەپ تەرگەۋگە بارىپ-قايتىپ ءجۇر ەكەن.
ۇلىمنىڭ ارتىندا جارى, ەكى بالاسى قالدى. قىزى بەس جاستان اسسا, ۇلى ءۇش-اق جاستا. ال كۇدىكتى ازاماتتىڭ وسى ۋاقىتقا دەيىنگى ىستەگەنى از ەمەس. وسىدان 7-8 جىل بۇرىن اقشوقى اۋىلىنا ءۇش-ءتورت جەڭىل كولىكپەن كەلىپ, اۋىلدىڭ بىرنەشە جىگىتىن سوققىعا جىعىپ كەتكەن. مىلتىق اتىپ, قورقىتقان. 2021 جىلى الاكول جازعى دەمالىس ايماعىندا ءبىر جىگىتتى اياعىنان اتىپ, جارالايدى. تىزە بەرسەڭ, ا. ەسىمدى ازاماتتىڭ تەنتەكتىگى كوپ.
بالام نۇرىم نۇرقانوۆ بولسا وسىدان ءۇش جىل بۇرىن «نۇر كوركەم» جەكە كاسىپكەرلىگىن اشىپ, الاكول جازعى دەمالىس ايماعىن كوركەمدەۋ جۇمىستارىن جۇرگىزۋگە اتسالىسقان. ودان بولەك كوشەلەرگە شام تارتۋ, دۇكەندەرگە بەينەباقىلاۋ كامەراسىن ورناتۋ, اۋىلداردىڭ كىرەبەرىسىنە قاقپا جاساۋ سەكىلدى جۇمىستارمەن اينالىسقان. جول جوندەۋ سالاسىندا دا جۇمىس ىستەگەن. ءيا, بالامنىڭ ەڭبەگىن اۋىلداستارى بىلەدى.
دوستارى مەن اۋىلداستارىنىڭ ۇلىما دەگەن قۇرمەتىن جەرلەۋ راسىمىندە كوردىك. بەس شاقىرىم جەردەگى زيرات باسىنا دوستارى جاياۋ كوتەرىپ اپاردى. سول مەزگىلدە جانازاعا كەلگەن جاماعاتتىڭ وق اتقان ازاماتتارعا دەگەن اشۋ-ىزاسىن كوردىك, توقتاۋ سالدىق. وسىدان-اق بالامنىڭ بەدەلىن, سىيلى بولعانىن بايقاۋعا بولادى. مۇنىڭ ءبارى جەتپىسكە كەلگەن ماعان دا, الپىستان اسقان اناسىنا دا, ەكى بالاسىمەن قالعان جارىنا دا, اپايى مەن باۋىرلارىنا دا وڭاي ەمەس. كوز جاسىمىز قۇرعاعان جوق.
ەندىگى ويىمىز, وسى ۇيىمداسقان كۇدىكتى ازاماتتارعا قاتىستى تەرگەۋ ءادىل ءجۇرىپ, سوت ۇكىمى ءتيىستى جازاسىن تاعايىنداسا دەگەن تىلەك قانا. «Egemen Qazaqstan» گازەتىنىڭ رەداكتسياسى تەرگەۋدىڭ زاڭ اياسىندا ءجۇرىپ جاتقاندىعىن جانە سوت پروتسەسىن نازاردا ۇستاپ وتىرسا ەكەن دەيمىز».
حات سوڭىندا وقىرمانىمىز بەكەن نۇرقانوۆ دەپ اتى-ءجونىن, تەلەفون ءنومىرىن قالدىرىپتى. حابارلاسىپ, ءمان-جايدى اۋىزشا تاعى ءبىر مارتە انىقتاپ سۇرادىق. سويتسەك, كولىكتە بىرگە بولعان نۇرىمنىڭ جەزدەسى قىزىربەك قارلىباەۆ جۋىقتا ءوز-وزىنە قول جۇمساپ, قايتىس بولىپتى. ايتۋىنشا, قالتاسىنان ءۇش ادامنىڭ اتى-ءجونى جازىلعان قاعاز تابىلعان ەكەن.
ءبىز ءوز تاراپىمىزدان وسى وقيعاعا قاتىستى شىعىس قازاقستان وبلىسى پوليتسيا باسقارماسىنا رەسمي سۇراۋ حات جولدادىق. پوليتسيا باسقارماسى باستىعىنىڭ ورىنباسارى ت.شاياحمەتوۆتىڭ مالىمەتىنشە, ءۇرجار اۋدانىندا بولعان ن.نۇرقانوۆتىڭ ولىمىنە بايلانىستى تەرگەۋ باسقارماسى قىلمىستىق كودەكستىڭ 99-بابى 2-بولىگى 9-تارماعى (بۇزاقىلىق نيەتپەن جاسالعان ادام ءولتىرۋ) بويىنشا №226364031000023 قىلمىستىق تەرگەۋ جۇرگىزىلىپ جاتىر.
قازىرگى ۋاقىتتا قىلمىستىق ءىس بويىنشا بىرقاتار ساراپتاما تاعايىندالعان. سونداي-اق قىلمىستىق پروتسەستىك كودەكستىڭ 24-بابىنىڭ تالاپتارىنا سايكەس ءىستىڭ ءمان-جايىن جان-جاقتى, تولىق جانە وبەكتيۆتى تەرگەۋگە باعىتتالعان جەدەل-تەرگەۋ امالدارى قولعا الىنعان. جۇرگىزىلگەن ساراپتامالار مەن تەرگەۋ ارەكەتتەرىنىڭ قورىتىندىسىنا سايكەس قىلمىسقا قاتىسى بار بارلىق كۇدىكتى قىلمىستىق جاۋاپكەرشىلىككە تارتىلادى. وزگە مالىمەتتەر قپك-ءنىڭ 201-بابىنىڭ تالاپتارىنا سايكەس جاريالاۋعا جاتپايدى.
ايتا كەتسەك, ءۇرجار اۋدانىندا ادام ولىمىمەن بايلانىستى قىلمىستار از ەمەس. ەستەرىڭىزدە بولسا, 2020 جىلى ماقانشىداعى پوليتسيا بولىمىندە 33 جاستاعى ازامات ورازالىنىڭ قازاسى كوپشىكتىڭ ەسىندە. ستاتيستيكالىق دەرەكتەرگە كوز سالساق, 2021 جىلدىڭ قاڭتارىنان باستاپ وسى ۋاقىتقا دەيىن ءۇرجار اۋدانىندا ادام ولىمىمەن بايلانىستى 7 قىلمىستىق ءىس تىركەلگەن ەكەن. بيىل قاڭتار ايىندا قارۋ اسىنعان ازاماتتار ۇرجارداعى مەيرامحانالاردىڭ بىرىنە كىرىپ, وق اتقانىن دا بىلەمىز. وسى ورايدا ويعا ورالاتىن سۇراق – قازاقى اۋداندا تەنتەكتەردى تەزگە سالاتىن تاربيە تەتىگى جوق پا؟
شىعىس قازاقستان وبلىسى,
ءۇرجار اۋدانى