1 ءساۋىر – كولىك سالىعىن تولەۋدىڭ سوڭعى كۇنى. ەگەر مىندەتتى تولەم ۋاقتىلى تولەنبەگەن جاعدايدا ونى ەسەلەپ قايتارۋعا تۋرا كەلەدى.
مەملەكەتتىك كىرىستەر كوميتەتى 2021 جىلدىڭ كولىك سالىعىن بيىلعى 1 ساۋىرگە دەيىن تولەۋ كەرەكتىگىن ەسكە سالادى. كوميتەتتىڭ ءباسپاسوز قىزمەتىنىڭ حابارلاۋىنشا, كولىك قۇرالدارىنا سالىناتىن سالىقتىڭ كولەمىن kgd.gov.kz web-پورتالى مەن «e-Salyq Azamat» ءموبيلدى قوسىمشاسىنداعى سالىق كالكۋلياتورىنىڭ كومەگىمەن ەسەپتەپ شىعارۋعا بولادى.
«قازىرگى ۋاقىتتا سالىق ورگاندارى ەسەپتەگەن كولىك سالىعىنىڭ سوماسى «كاسپي بانك» اق جانە «حالىق بانك» اق ءموبيلدى قوسىمشالارىن پايدالانۋشىلارعا PUSH-حابارلاما تۇرىندە جىبەرىلىپ جاتىر. بۇدان باسقا, بۇل اقپارات kgd.gov.kz web-پورتالىندا «جەكە تۇلعالار ءۇشىن الداعى تولەمدەر» سەرۆيسىندە, سونداي-اق «e-Salyq Azamat» جانە ەكىنشى دەڭگەيدەگى بانكتەردىڭ ۇيالى تەلەفون قوسىمشالارىندا جاريالاندى», دەلىنگەن كوميتەتتىڭ رەسمي حابارلاماسىندا.
ەگەر سالىق ۋاقتىلى تولەنبەسە, وندا سالىق ورگاندارى جەكە تۇلعاعا سالىق بەرەشەگى تۋرالى قوسىمشا حابارلاما جولدايدى. وسى حابارلاما تابىس ەتىلگەن كۇننەن باستاپ وتىز جۇمىس كۇنى وتكەن سوڭ ءتيىستى ۆەدومستۆو ءبىر ەسەلەنگەن ايلىق ەسەپتىك كورسەتكىش (3 063 تەڭگە) مولشەرىندە سالىق بۇيرىعىن شىعارادى. ال وسى بۇيرىق تابىس ەتىلگەن كۇننەن باستاپ 5 جۇمىس كۇنى ىشىندە بەرەشەك وتەلمەسە, وندا تولەمدى ماجبۇرلەپ وتەپ الۋ ءۇشىن ءىس جەكە سوت ورىنداۋشىلارىنا جىبەرىلەدى. قارىزگەر ۇستەمە اقشامەن قوسا, سوت ورىنداۋشىلارىنىڭ قىزمەتى ءۇشىن دە قوسىمشا اقشا تولەۋىنە تۋرا كەلەدى. ولار بورىشكەر ازاماتتان سالىق بەرەشەگى سوماسىنىڭ 25%-ىنا دەيىن تولەم ءوندىرىپ الادى. ونىڭ سىرتىندا جەكە تۇلعانىڭ شوتى بۇعاتتالىپ, دەپوزيتىنە شەكتەۋ قويىلۋى مۇمكىن.
سوندىقتان سالىق ورگانى قىزمەتكەرلەرى كولىگى بار ازاماتتاردى مەملەكەت الدىنداعى مىندەتتەمەسىنە ادال بولىپ, سالىقتى ۋاقتىلى تولەۋگە شاقىرادى.