سوڭعى كۇندەرى اۋا رايىنىڭ قولايسىزدىعى سالدارىنان ەلىمىزدىڭ 8 وبلىسىندا 289 ەلدىمەكەن ەلەكتر جارىعىنسىز قالدى. بۇل تۋرالى قر توتەنشە جاعدايلار ءمينيسترى يۋري يلين ءمالىم ەتتى, دەپ حابارلايدى Egemen.kz.
«بيىل 29-30 ناۋرىز كۇندەرى رەسپۋبليكانىڭ 7 وبلىسى مەن 2 قالاسىندا قاتتى جەلدىڭ سالدارىنان بىرنەشە نىسان شاتىرىنىڭ ۇشۋى (297 جاعداي) تىركەلدى. ولاردىڭ قاتارىندا ءبىلىم بەرۋ, دەنساۋلىق ساقتاۋ, تۇرعىن ۇيلەر, جەرگىلىكتى بيلىك جانە قۇقىق قورعاۋ ورگاندارى مەن تاعى باسقا نىساندار بار. توتەنشە جاعداي سالدارىنان 8 ادام, ونىڭ ىشىندە 3 بالا زارداپ شەكتى. ولاردىڭ 4-ءى اۋرۋحاناعا جاتقىزىلىپ, قالعانى تەكسەرۋدەن سوڭ ۇيلەرىنە جىبەرىلدى», دەدى يۋري يلين وكق-دە وتكەن بريفينگتە.
ءمينيستردىڭ ايتۋىنشا, قولايسىز اۋا رايىنىڭ سالدارىنان بىرنەشە ءوڭىر تۇرعىندارى ۋاقىتشا قيىندىققا تاپ بولدى.
«8 وبلىستىڭ 289 ەلدىمەكەنىندە اۋا رايى قولايسىزدىعىنان بولعان اپات سالدارىنان ەلەكتر جارىعى ءوشىپ قالدى. بارلىعى 110 387 ابونەنت ەلەكتر جارىعىنسىز قالدى. اتاپ ايتقاندا اقمولا وبلىسى– 87, قاراعاندى وبلىسى– 25, الماتى وبلىسى – 83, اتىراۋ وبلىسى – 10, پاۆلودار وبلىسى– 70, سقو – 12, اقتوبە وبلىسى – 1 جانە جامبىل وبلىسى – 1. بۇگىن ساعات 11.00-دەگى جاعداي بويىنشا 275 ەلدىمەكەندە ەلەكتر جارىعى قالپىنا كەلتىرىلدى. دەگەنمەن 3 وبلىستاعى 14 ەلدىمەكەندە 12 709 ابونەنت ءالى دە بولسا ەلەكتر جەلىسىنە قوسىلماعان», دەيدى ول.
بۇعان دەيىن اتالعان ۆەدومستۆو باسشىسى ءۇيىن سۋ باسقان تۇرعىندارعا وتەماقى تولەنە مە دەگەن ساۋالعا جاۋاپ بەردى.