اقمولا وبلىسىنا قاراستى قوسشى قالاسىنداعى «Diamond park» تۇرعىن ءۇي كەشەنى ماسەلەسى بويىنشا مەردىگەرلەردىڭ ۇستىنەن قوزعالعان ءىس تاياۋدا اقياتالىپ, سوتقا جولداناتىن بولادى, دەپ حابارلايدى Egemen.kz.
بۇل تۋرالى قوسشى قالالىق پوليتسيا ءبولىمىنىڭ باسشىسى تالعات ساقانوۆ مالىمەت تاراتتى.
«بۇل ماسەلەگە قاتىستى قىلمىستىق ءىستى ءساۋىردىڭ 10-نا دەيىن تەرگەپ, پروكۋراتۋراعا جولدايتىن بولامىز. وسى ىسكە قاتىسى بار دەلىنگەن ەكى مەردىگەر دە قازىرگى كەزدە ۋاقىتشا ۇستاۋ ورتالىعىنا قامالعان. ۇلەسكەرلەردىڭ بارلىعى قىلمىستىق ءىس بارىسىندا زارداپ شەگۋشىلەر دەپ تانىلعان», دەيدى ول.
مۇندا العاشقى جەتى ءۇي عانا ءتيىستى قۇجاتتارى راسىمدەلىپ, پايدالانۋعا بەرىلگەن. قالعان جەتى ءۇيدىڭ ۇلەسكەرلەرى ءۇش جىلدان بەرى قۇرىلىستىڭ اياقتالۋىن جانە قۇرىلىستى زاڭداستىرۋدى اسىعا كۇتىپ ءجۇر.