بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى» زاڭ جوباسى ماقۇلدانىپ, سەنات قاراۋىنا جىبەرىلدى, دەپ حابارلايدى Egemen.kz.
اتالعان قۇجات بويىنشا بايانداما جاساعان دارحان مىڭبايدىڭ ايتۋىنشا, زاڭ جوباسىن پىسىقتاۋ بارىسىندا دەپۋتاتتار قۇجاتتىڭ مازمۇنىن, جالپى ساپاسىن جاقسارتاتىن تۇزەتۋلەر ەنگىزدى. ونىڭ ىشىندە:
- بيولوگيالىق قاۋىپسىزدىك سالاسىنداعى قىزمەتتى جۇزەگە اسىراتىن مەملەكەتتىك ورگانداردى, ولاردىڭ قۇزىرەتتەرى مەن وكىلەتتىكتەرىن ناقتىلاۋ بويىنشا تۇزەتۋلەر قابىلداندى;
- بيولوگيالىق قاۋىپسىزدىك سالاسىنداعى تالاپتاردىڭ ساقتالۋىن مەملەكەتتىك باقىلاۋ جانە قاداعالاۋ تەتىكتەرىن جەتىلدىرۋ ماقساتىندا زاڭ جوباسى جەدەل دەن قويۋ شارالارىن قولدانۋ ءتارتىبىن رەتتەيتىن جاڭا باپپەن تولىقتىرىلدى;
- اقپارات الماسۋ بولىگىندە بيولوگيالىق قاۋىپسىزدىك سالاسىنداعى حالىقارالىق ىنتىماقتاستىقتىڭ باسىمدىقتارى مەن باعىتتارى, ولاردى وقشاۋلاۋ مەن جويۋعا قاتىسۋ جۇزەگە اسىرىلاتىن توتەنشە جاعدايلاردىڭ تۇرلەرى ناقتىلاندى;
- پاتوگەندى بيولوگيالىق اگەنتتەرمەن جۇمىس ىستەۋگە رۇقسات بەرۋ, بيولوگيالىق قاۋىپسىزدىك سالاسىنداعى ەسەپكە الۋ جانە مونيتورينگ تەتىكتەرى ناقتىلاندى;
- بيولوگيالىق قاتەردىڭ تۋىنداۋ جانە ولاردى جويۋ جاعدايلارىندا قولدانۋعا ارنالعان دارىلىك زاتتاردى, پرەپاراتتار مەن مەديتسينالىق بۇيىمداردى جەدەل مەملەكەتتىك تىركەۋ مۇمكىندىگى كوزدەلگەن;
- پاتوگەندى بيولوگيالىق اگەنتتەردى جىكتەۋ كريتەريلەرى ناقتىلاندى; ادامداردىڭ, جانۋارلار مەن وسىمدىكتەردىڭ اۋرۋ جاعدايلارىن بيولوگيالىق قاتەرلەرگە جاتقىزۋ ماسەلەلەرىن رەتتەيتىن نورمالار پىسىقتالدى.
اتاپ ايتقاندا, ادامداردىڭ, جانۋارلار مەن وسىمدىكتەردىڭ اۋرۋى بويىنشا ناقتى قانداي ستاتيستيكالىق جانە ەسەپتىك دەرەكتەردىڭ ارتۋى ەلدىڭ بيولوگيالىق قاۋىپسىزدىگىنە قاۋىپ توندىرەتىنى ناقتىلاندى.
«سونداي-اق زاڭ جوباسىنىڭ نورمالارىن قازاقستان رەسپۋبليكاسىنىڭ زاڭناماسىنا سايكەس كەلتىرۋ ماقساتىندا تۇزەتۋلەر, رەداكتسيالىق سيپاتتاعى تۇزەتۋلەر ەنگىزىلدى. جۇمىس توبىنىڭ 20 وتىرىسى, سونداي-اق باس كوميتەتتىڭ 2 كەڭەيتىلگەن وتىرىسى وتكىزىلدى. سالىستىرمالى كەستە قابىلدانعان 307 پوزيتسيادان تۇرادى. ءماجىلىستىڭ بارلىق كوميتەتتەرى زاڭ جوباسى بويىنشا وڭ قورىتىندىلارىن بەردى», دەدى دارحان مىڭباي.
وسىدان كەيىن دەپۋتاتتار «قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى» قازاقستان رەسپۋبليكاسى زاڭىنىڭ جوباسىن ەكىنشى وقىلىمدا ماقۇلداپ, پارلامەنت سەناتىنىڭ قاراۋىنا جىبەردى.