كۇن مەن ءتۇندى تەڭەستىرىپ, جارىقتىڭ ۇلەسىن ۇلعايتقان جىل باسى دا كەلدى. بارىس جىلى ەكى جىل بويى ەلدى ۇرەي قۇشاعىندا ۇستاعان ىندەتتى ىسىرعانى دا, ۇمىتتىرعانى دا راس. بىراق كوروناۆيرۋستان تولىق قۇتىلدىق پا؟ ەندى ەمىن-ەركىن جۇرۋگە بولا ما؟ مەرەكەلەردەن كەيىنگى ەپيدەميالىق احۋال قانداي؟
قىسقاسى, ىندەتتىڭ قاقپاسى بولعان الماتىدا بۇل كەسەل ءىزىم-قايىم قۇرىدى دەۋگە ءالى دە ەرتە. سوڭعى رەسمي دەرەك بويىنشا, مەگاپوليستە 23 ناۋرىزدا 8 ادامنان كۆي تابىلدى. ينفەكتسيالىق ستاتسيونارلاردا 86 ادام ەمدەلىپ جاتىر, ىشىندە 11 بالا بار.
قالادا جاعداي ايتارلىقتاي تۇراقتالعاننان كەيىن, «الماتىدا شەكتەۋ شارالارىن الىپ تاستاۋ ماسەلەلەرى جونىندە» ءباسپاسوز جيىنى وتكەن ەدى. كوپشىلىك ورىندار مەن جابىق جەرلەردە ماسكا رەجىمى مىندەتتى بولىپ قالا بەرەتىنىن مالىمدەگەن قالالىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا ىندەت جۇقتىرۋ كورسەتكىشىنىڭ تومەندەۋى قولدانىستاعى شەكتەۋلەردى, سونىڭ ىشىندە Ashyq جوباسى بويىنشا شەكتەۋلەردى جەڭىلدەتۋگە مۇمكىندىك بەرگەنىن اتاپ ءوتتى. الماتىلىقتار ءۇشىن ەكپە الۋ مەن قايتا ۆاكتسينالاۋ ءالى دە ماڭىزدى, يممۋندىق قابات كەمىندە 75-85% بولۋى كەرەك. وكىنىشكە قاراي, الماتىدا يممۋندىق قابات 60%-دان اسپايدى.
«بۇگىندە ۆاكتسينالىق پروفيلاكتيكا جۇقپالى جانە پارازيتتىك اۋرۋلارعا, سونىڭ ىشىندە كوروناۆيرۋسقا قارسى نەگىزگى قورعانىس شاراسى بولىپ قالا بەرەدى», دەيدى سەبد باسشىسىنىڭ ورىنباسارى.
ءوز كەزەگىندە الماتى كاسىپكەرلەر پالاتاسىنىڭ ديرەكتورى ايتۋار قوشمامبەتوۆ كوپشىلىك ورىنداردا Ashyq جۇيەسىن قولدانۋ مىندەتتى ەمەستىگىن جانە بيزنەستىڭ ءوز شەشىمى بويىنشا ەرىكتى تۇردە جۇزەگە اسىرىلۋى مۇمكىن ەكەنىن حابارلادى. بىراق ول دا بولمەلەردەگى ماسكا تاعۋ رەجىمى جويىلماعانىن جەتكىزدى. سپيكەر الماتىدا شەكتەۋ شارالارى كەزىندە Ashyq جوباسىنا 24 مىڭنان استام بيزنەس سۋبەكتىسى قاتىسقانىن اتادى.
«ەپيدەميالىق احۋالدىڭ جاقسارۋىنا بايلانىستى كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى مەكەمەارالىق كوميسسيا شەكتەۋ شارالارىن جەڭىلدەتۋ تۋرالى شەشىم قابىلدادى», دەدى ا.قوشمامبەتوۆ.
«قىزىل ايماقتا» ورنالاسقان ايماقتارداعى Ashyq قاتىسۋشىلارى ءوز قىزمەتىن نىسانداردىڭ تولۋىنا قاراي شەكتەۋلەر ەنگىزە الادى. بۇدان باسقا, بيزنەس وكىلى ۆاكتسينالانعان قىزمەتكەرلەر مەن كەلۋشىلەرگە قويىلاتىن تالاپتاردى ەنگىزۋ قاجەت پە, جوق پا, ونى دا ءوزى شەشەدى», دەدى كاسىپكەرلەر پالاتاسىنىڭ ديرەكتورى.
ا.قوشمامبەتوۆ ەلدىڭ كوپشىلىگى بەتپەردە رەجىمىنە قاتىستى تارماقتى قاتە قابىلداعانىن ايتادى. جابىق جەرلەردە جانە قوعامدىق كولىكتەردە ماسكا رەجىمى ءالى دە مىندەتتى. سوندىقتان وسى تالاپتاردى ساقتاۋدى جالعاستىرۋ قاجەت. بۇدان باسقا, ەلدىڭ باس سانيتارلىق دارىگەرىنىڭ قاۋلىسىمەن: كۇندىزگى رەجىمدە, ياعني قىزمەت كورسەتۋ نىساندارىندا COVID-19-عا قارسى ۆاكتسينا الماعان قىزمەتكەرلەردى جۇمىسقا جىبەرۋگە شەكتەۋلەر, سونداي-اق ۆاحتالىق ادىسپەن جۇمىس ىستەيتىن ۇيىمداردىڭ قىزمەتكەرلەرى ءۇشىن ۆاحتاعا كىرۋ جانە شىعۋ كەزىندە پتر ادىسىمەن مىندەتتى زەرتحانالىق تەستىلەۋ الىنىپ تاستالعانىن ەسكە سالا كەتۋ كەرەك.
ا.قوشمامبەتوۆ باس سانيتارلىق دارىگەردىڭ قاۋلىسىنىڭ قوسىمشاسىندا «قىزىل» مارتەبەسى بار كەلۋشىلەردى انىقتاۋ شارالارى كورسەتىلگەنىن جەتكىزدى.
الماتى