نۇر-سۇلتاندا كوللەدجدەر مەن ۋنيۆەرسيتەتتەر ستۋدەنتتەرى اراسىندا «BILIM Hackathon-2022» IT بايقاۋى ءوتتى, دەپ حابارلايدى Egemen.kz.
جارىسقا قاتىسۋعا ەلىمىزدىڭ بارلىق وڭىرىنەن 107 كوماندا ءوتىنىش بەردى. 230 ستۋدەنتتەن قۇرالعان 72 كوماندا فينالعا جولداما الدى.
ءبىلىم جانە عىلىم مينيسترلىگى, Daryn.Online ءبىلىم بەرۋ پلاتفورماسى, BTS Education, EDUS جانە Mail.kz سىندى وتاندىق IT كومپانيالار ۇيىمداستىرعان جارىستىڭ جۇلدە قورى 3,5 ميلليون تەڭگەنى قۇرادى.
قازىلار القاسىنىڭ شەشىمىمەن Nazarbayev University جانە Astana IT University ستۋدەنتتەرى جەڭىمپاز اتاندى. ەكىنشى ورىندى نازارباەۆ ۋنيۆەرسيتەتىنىڭ تاعى ءبىر كومانداسى جەڭىپ الدى. ءۇشىنشى ورىن ع.داۋكەەۆ اتىنداعى الماتى ەنەرگەتيكا جانە بايلانىس ۋنيۆەرسيتەتىنىڭ, Suleyman Demirel University جانە Astana IT University ستۋدەنتتەرىنەن قۇرالعان كومانداسىنا بۇيىردى.
جەڭىمپاز ستۋدەنتتەر قارجىلاي سىيلىقپەن قوسا, Daryn online, BTS Education, EDUS جانە Mail.kz سياقتى تانىمال IT-كومپانيالاردا جۇمىسقا ورنالاسۋ مۇمكىندىگىنە يە بولدى. سونىمەن قاتار كەيبىر تسيفرلىق شەشىمدەر ءوز ينۆەستورلارىن تاۋىپ ۇلگەردى.