پەتروپاۆل قالاسىنداعى ەڭ ساۋلەتتى سارايدا «ۇلتىن سۇيگەن ۇلىلار» اتتى رەسپۋبليكالىق عىلىمي-پراكتيكالىق كونفەرەنتسيا ءوتتى. بۇل كونفەرەنتسيا سولتۇستىك قازاقستان وبلىسىنان شىققان اتاقتى اقىن-جازۋشىلار – ۇلتىمىزدىڭ ماقتانىشى عابيت مۇسىرەپوۆتىڭ – 120, سافۋان شايمەردەنوۆتىڭ – 100 جانە كاكىمبەك سالىقوۆتىڭ 90 جىلدىق مەرەيتويلارىنا ارنالدى.
كونفەرەنتسيانى «دارىن» مەملەكەتتىك جاستار سىيلىعىنىڭ لاۋرەاتى, قازاقستان رەسپۋبليكاسىنىڭ ەڭبەك سىڭىرگەن قايراتكەرى داۋلەتكەرەي كاپ ۇلى اشىپ, جۇرگىزىپ وتىردى. العاشقى ءسوزدى وبلىس اكىمىنىڭ ورىنباسارى عاني نىعىمەتوۆ الىپ, الماتى مەن نۇر-سۇلتاننان كەلگەن قادىرلى قوناقتارعا ريزاشىلىعىن ءبىلدىرىپ, جەرلەس جازۋشىلارىمىزدىڭ ەسىمىن وبلىس تۇرعىندارى ماقتان ەتەتىنىن, جاس ۇرپاقتى تاربيەلەۋدە ولاردىڭ شىعارماشىلىعى مەن ونەگەسى ارقاشان ۇلگى ەكەنىن اتاپ ءوتتى. «بۇكىل قازاقستان حالقى ءبىزدىڭ جەرلەسىمىز عابيت مۇسىرەپوۆتىڭ شىعارمالارىن, سونىمەن قاتار ونىڭ ۇلتتىق ادەبيەتىمىزدىڭ ءوسىپ-وركەندەۋ جانە دامۋ جولىندا ەرەن ەڭبەك ەتكەنىن جاقسى بىلەدى. بيىل ايتۋلى تۇلعانىڭ مەرەيتويى بارلىق مادەنيەت ورىندارى مەن مەكتەپتەردە اتالىپ وتۋدە.
سونىمەن قاتار قابىرعالى قالامگەر سافۋان شايمەردەنوۆتىڭ 100 اتاقتى اقىنىمىز كاكىمبەك سالىقوۆتىڭ 90 جىلدىعى دا كەڭىنەن تويلانۋدا. ءبىز وسىنداي جەرلەستەرىمىزدى ماقتان تۇتامىز», دەدى ول.
كونفەرەنتسيادا قازاقستاننىڭ ەڭبەك سىڭىرگەن قايراتكەرى, «پاراسات» جانە «قۇرمەت» وردەندەرىنىڭ يەگەرى, حالىقارالىق ايتىس اقىندارى مەن جىرشى-تەرمەشىلەر وداعىنىڭ توراعاسى, اقىن ءجۇرسىن ەرمان, جازۋشىلار وداعى توراعاسىنىڭ ءبىرىنشى ورىنباسارى اقبەرەن ەلگەزەك جانە ت.ب. قۇتتىقتاۋ سوزدەرىن ايتتى. ا.ەلگەزەكتىڭ ءبىر سوزىندە قازاقستان جازۋشىلار وداعىن سولتۇستىك قازاقستان وبلىسىنان شىققان س.مۇقانوۆ, ع.مۇسىرەپوۆ جانە ع.توعجانوۆ سياقتى ءۇش بىردەي قايراتكەردىڭ باسقارعانىن جانە ونداي جەتىستىك باسقا بىردە-ءبىر وبلىستان شىقپاعانىن ەسكە سالعانى كوپشىلىكتى ەرىكسىز ەلەڭ ەتكىزدى. سونىمەن قاتار ول عابەڭنىڭ توراعا بولعانداعى ەرلىكتەرىن, الماتىنىڭ قاق ورتاسىنان جازۋشىلار وداعىنا عيمارات الىپ بەرگەنىن دە اۋىزعا العانى جينالعان قاۋىمنىڭ قۇلاعىنا جاعىپ وتىردى. بايانداماشىلار قاتارىندا بولعان «سولتۇستىك قازاقستان» وبلىستىق گازەتىنىڭ باس ديرەكتورى جاراسباي سۇلەيمەنوۆ «تاۋەلسىزدىك جىلدارىنداعى سولتۇستىك قازاقستان وبلىسىنداعى ادەبيەتتىڭ دامۋى», قازاقستاننىڭ ەڭبەك سىڭىرگەن قايراتكەرى, اقىن عالىم جايلىباي «كاكىمبەك سالىقوۆ – قايراتكەر, اقىن, ازامات», «ەگەمەن قازاقستان» گازەتىنىڭ سولتۇستىك قازاقستانداعى مەنشىكتى ءتىلشىسى جاقسىباي سامرات عابيت مۇسىرەپوۆكە ارنالعان «موگيكاننىڭ سوڭعى تۇياعى», م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ كانديداتى جانار تالاسپاەۆا «سافۋان شايمەردەنوۆ – كوركەمسوز شەبەرى» اتتى باياندامالارىن وقىدى.
وسى كەشتە سولتۇستىكقازاقستاندىق جاس جازۋشىلار امانجول زاعىپاردىڭ «تاعدىرىمنىڭ تامشىلارى», نۇرگۇل وقاشەۆانىڭ «نۇر», ساعىندىق ءسابيت ۇلىنىڭ «دوڭدەگى اۋىل» جانە قىزىلجار اقىندارى انتولوگياسىنىڭ تۇساۋكەسەر ءراسىمى بولدى. ءتورت كىتاپ تا وبلىستىق اكىمدىكتىڭ قولداۋىمەن جارىق كورگەن.
كەش بارىسىندا سافۋان شايمەردەنوۆتىڭ نەمەرە ءىنىسى سايىن ەسماعي ءسوز الىپ جازۋشىنىڭ ەسىمىن حالىقتىڭ ەسىندە ساقتاۋ باعىتىندا اتقارىلماي جاتقان ىستەر تۋرالى ءوزىنىڭ وكىنىشتى ويلارىن جەتكىزدى. وعان وبلىس اكىمىنىڭ ورىنباسارى عاني نىعىمەتوۆ جاۋاپ بەرىپ, سىننىڭ ورىندى ەكەنىن, ونى تۇزەتۋگە كۇش سالىناتىنىن جەتكىزدى.
كەش سوڭىندا جازۋشىلار وداعى توراعاسىنىڭ ءبىرىنشى ورىنباسارى اقبەرەن ەلگەزەك جەرگىلىكتى جاس اقىندار امانجول زاعىپار, كۇلايحان راحمەت, نۇرگۇل وقاشەۆانى جانە پروزاشى ساعىندى ءسابيت ۇلىن جازۋشىلار وداعىنا مۇشەلىككە قابىلداپ, جازۋشى كۋالىگىن تاپسىردى.
ال ەرتەسىنە وسى تاقىرىپتا رەسپۋبليكالىق اقىندار ايتىسى ءوتتى. ونى جىرشى-تەرمەشىلەر وداعىنىڭ توراعاسى ءجۇرسىن ەرمان جۇرگىزدى. ايتىسقا قازاقستاننىڭ بارلىق تۇكپىرىنەن رۇستەم قايىرتاي, ەركەبۇلان قاينازار, قاليجان ءبىلداش, مەيىربەك سۇلتانحان, تولەگەن جامانوۆ جانە ت.ب. جۇيرىكتەر قاتىسىپ, قوماقتى جۇلدەنى ساراپقا سالدى.
سولتۇستىك قازاقستان وبلىسى