23 ناۋرىز كۇنى قاراعاندى قالاسىندا اۋا رايىنىڭ قولايسىزدىعىنان 22 جول-كولىك وقيعاسى تىركەلدى, دەپ حابارلايدى Egemen.kz پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
تەمىرتاۋ قالاسىنىڭ اۋماعىنان وتەتىن رەسپۋبليكالىق ماڭىزى بار «الماتى-ەكاتەرينبۋرگ» تاس جولىندا 31 جاستاعى Hyundai اۆتوكولىگىنىڭ جۇرگىزۋشىسى 33 جاستاعى جاياۋ جۇرگىنشىنى قاعىپ كەتكەن. جول-كولىك وقيعاسىنان كەيىن اتالعان اۆتوكولىك 37 جاستاعى ازاماتتىڭ باسقارۋىنداعى Renault اۆتوكولىگىمەن سوقتىعىسقان. جول-كولىك وقيعاسى سالدارىنان جاياۋ جۇرگىنشى وقيعا ورىنىندا قازا تاۋىپ, Hyundai اۆتوكولىگىنىڭ جۇرگىزۋشىسى ءارتۇرلى جاراقاتتارمەن اۋرۋحاناعا جەتكىزىلدى.
«اتالعان فاكتى بويىنشا تەمىرتاۋ قالالىق پوليتسيا باسقارماسىنا قاراستى ەسكى قالالىق پوليتسيا بولىمىندە قازاقستان رەسپۋبليكاسى قىلمىستىق كودەكسىنىڭ 345 بابى 3 تارماعىنا سايكەس تىركەلدى. تەرگەۋ امالدارى جۇرگىزىلۋدە», دەپ مالىمدەدى پوليتسيا دەپارتامەنتىنىڭ ءباسپاسوز قىزمەتى.
پوليتسيا قىزمەتكەرلەرى كولىك جۇرگىزۋشىلەردەن ساقتىق شارالارىن قاتاڭ ۇستانىپ, اۋا رايى كۇرت وزگەرگەن جاعدايدا الىس ساپارلارعا شىقپاۋلارىن ەسكەرتەدى.
مۇنداي قولايسىز اۋا رايىندا توتەنشە جاعدايلار قىزمەتى ماماندارىنىڭ دا جۇمىسى قاۋىرت. قۇتقارۋشىلار قاراعاندى وبلىسىندا ءبىر تاۋلىك ىشىندە قار قۇرساۋىندا قالعان 68 ادامدى قۇتقارىپ, 114 ادامدى ەۆاكۋتسيالادى.