جاپونيادا تۇراتىن قازاقستاندىقتار ناۋرىز مەرەكەسىنە وراي باس قوسىپ, توكيو تورىندە ۇلىستىڭ ۇلى كۇنىن تويلادى. بۇل تۋرالى جاپونياداعى قازاق قاۋىمداستىعىنىڭ وكىلى ابدىبەك قاليبەك ۇلى ايتىپ بەردى, دەپ حابارلايدى Egemen.kz.
جاپونيادا قازاق قاۋىمداستىعى وسىدان ءبىر جىل بۇرىن قۇرىلعان بولاتىن. الايدا پاندەمياعا بايلانىستى جينالىستار وتكىزىلمەگەن.
«بيىل ۇلىستىڭ ۇلى كۇنىنە بايلانىستى تىكەلەي اتسالىسىپ, جاپونياداعى قازاقتاردىڭ باسىن قوسايىن دەگەن ويمەن توكيودا قازاقستاندىقتاردى جينادىق. 40 شاقتى ازامات بولدى. موڭعوليا, قىتاي قازاقتارى دا بولدى. پاندەمياعا قاراماستان ءبارى كەلدى. دومبىرا شەرتىلدى, كۇي وينالدى. قازاقتىڭ كوك بايراعى توكيودا اسپانىندا كوتەرىلدى. ورتا ازياداعى باۋىرلاس مەملەكەتتەر, ونىڭ ىشىندە قىرعىزدار, وزبەكتەر كەلدى. ءسويتىپ, كىشىگىرىم توي بولدى. 30-عا جۋىق جاستار كەلدى. جالپى جان-جاقتان 80 شاقتى ادام جينالدى. ونىڭ ىشىندە 95 پايىز قازاقتار بولدى. ءبارىمىز باس قوسىپ, ۇلىستىڭ ۇلى كۇنى - ناۋرىزدى تويلادىق», دەدى ابدىبەك قاليبەك ۇلى.
ۇلىستىڭ ۇلى كۇنىنە وراي وتكىزىلگەن ءىس-شاراعا جاپونيادا وقيتىن جانە جۇمىس ىستەيتىن قازاقستاندىقتار قاتىستى.
«پاندەمياعا قاراماستان, ويلاعاننان دا كوپ ادام جينالدى. باستى ماقسات جاپونياداعى قازاق قاۋىمداستىعى اتىنان قازاقتاردى ءبىر جەرگە جيناپ, ناۋرىز مەرەكەسىن تويلاۋ بولدى. سول ماقسات ىسكە اسىپ, قۋانىشىمىز قوينىمىزعا سىيماي وتىر. توكيودا العاش رەت ناۋرىز مەرەكەسىن تويلادىق», دەپ تولىقتىردى ول.