اقپارات جانە قوعامدىق دامۋ ءمينيسترى اسقار وماروۆ بارلىق مەديا قاۋىمداستىققا پايدا اكەلەتىن باق تۋرالى جاڭا زاڭنىڭ ساپاسى بويىنشا جۇمىس ىستەيتىنىن اتاپ ءوتتى, دەپ حابارلايدى Egemen.kz.
ءمينيستردىڭ ايتۋىنشا, ازىرلەۋ كەزىندە جۋرناليستىك ۇيىمدار مەن قوعامداستىقتاردىڭ پىكىرلەرى ەسكەرىلەتىن بولادى.
«تاپسىرما بەرىلدى, بارلىق مەديا قاۋىمداستىققا پايدا اكەلەتىن جاڭا زاڭنىڭ ساپاسى بويىنشا جۇمىس ىستەيتىن بولامىز. مۇمكىندىگىنشە قىسقا مەرزىمدە جاساۋعا تىرىسامىز», دەدى اقپارات جانە قوعامدىق دامۋ ءمينيسترى اسقار وماروۆ.
ونىڭ ايتۋىنشا, كەز كەلگەن ەلدە ارقاشان ءوز ماقساتتارى بار ءتۇرلى توپتارمەن ىنتىماقتاسا الاتىن بەلگىلى ءبىر توپتار بار.
«مەن ناقتى ءبىر باق تۋرالى ايتا المايمىن. مەنىڭ ويىمشا, بۇل ءبىزدىڭ ەلىمىزدە عانا ەمەس, جالپى العاندا, وسىنداي ءۇردىس بار دەپ ايتىلدى. مەملەكەت باسشىسى دا وسىعان وراي تاپسىرما بەردى», دەدى اسقار وماروۆ.
مەملەكەت باسشىسى حالىققا جولداۋىندا مەملەكەتتىڭ مۇددەلەرىن, قوعامنىڭ سۇرانىستارىن جانە مەديا سالانىڭ دامۋ تەندەنتسيالارىن ەسكەرە وتىرىپ, بۇقارالىق اقپارات قۇرالدارى تۋرالى زاڭدى قايتا قاراۋ قاجەت ەكەنىن ايتقان بولاتىن.
«باق – بيلىك پەن حالىق اراسىنداعى كوممۋنيكاتسيانىڭ ءتيىمدى ارناسى. ولار قوعامنىڭ وزەكتى ماسەلەلەرىن كوتەرە الادى جانە كوتەرۋى كەرەك. بىراق مۇنى ۇلكەن ازاماتتىق جاۋاپكەرشىلىكپەن جاساۋ كەرەك», دەدى قاسىم-جومارت توقاەۆ.