«Matchroom Boxing» پروموۋتەرلىك ۇيىمىنىڭ جەتەكشىسى ەددي حيرن اسا اۋىر سالماق دارەجەسىندە باق سىناپ جۇرگەن ۇلىبريتانيالىق بوكسشىعا قارسىلاس ىزدەپ جاتىر, دەپ حابارلايدى Egemen.kz.
اۋەلدە ەنتوني دجوشۋا WBA (super), IBF, WBO جانە IBO تۇجىرىمدارى بويىنشا الەم چەمپيونى, ۋكراينالىق الەكساندر ۋسيككە قارسى شارشى الاڭعا شىعۋى كەرەك بولعان. الايدا الەكساندر ۋسيكتىڭ وتانىن قورعاۋ ءۇشىن ۋكرايناعا كەتۋىنە بايلانىستى دجوشۋانىڭ پروموۋتەرى بوكسشىعا باسقا قارسىلاس ىزدەۋدى باستادى.
باستاپقىدا ەنتوني دجوشۋانىڭ دەونتەي ۋايلدەر, دجو دجويس, لۋيس ورتيس, وتتو ۆاللين سەكىلدى بوكسشىلارمەن جۇدىرىقتاسۋى ىقتيمال ەكەنى تۋرالى اقپارات تاراعان ەدى. ەندى ەددي حيرن تىزىمدەگى تورتتىكتىڭ سانىن ەكەۋگە دەيىن قىسقارتقاندى ءجون دەپ تاۋىپتى.
«جاقىندا عانا ەنتوني دجوشۋا مەنەن كىمگە قارسى شارشى الاڭعا شىعاتىنىن سۇرادى. مەن وعان ءتۇپتىڭ-تۇبىندە الەكساندر ۋسيكپەن قولعاپ تۇيىستىرەتىنىن, سوندىقتان سولاقاي بوكسشىمەن جۇدىرىقتاسقانى ءجون ەكەنىن ايتتىم. مەنىڭ ويىمشا ول لۋيس ورتيسپەن نەمەسە وتتو ۆاللينمەن كەزدەسەدى. قالاي بولعان كۇندە دە الداعى شايقاس الەكساندر ۋسيككە قارسى وتەتىن جەكپە-جەك الدىندا جاقسى دايىندىق بولاتىنى ءسوزسىز. ال ۋسيكتىڭ كومانداسى بىزگە حابارلاسىپ, ساشانىڭ ماۋسىم ايىندا شارشى الاڭعا شىعا الاتىنىن حابارلاسا, ءبىز قۋانا كەلىسىم بەرەمىز. ەگەر ولار الەكساندر قازان ايىندا دايىن بولادى دەسە, ءبىز ارالىق جەكپە-جەك وتكىزەمىز», دەدى پروموۋتەر باق وكىلدەرىنە بەرگەن سۇحباتىندا.