جۇقپالى اۋرۋلاردىڭ جولى كەسىلدى

وبلىستىڭ باس سانيتارلىق دارى­گە­رى ايناگۇل مۋسينانىڭ ايتۋىنا قاراعاندا, سوڭعى بەس جىلدا ا گەپاتيتى ۆيرۋسىمەن سىرقاتتانۋ كورسەتكىشى ءبىرشاما تومەندەگەن. 2008 جىلدان باستاپ وڭىردە 18 جاعداي ورىن السا, جوسپارلى ۆاكتسينا ەگۋدىڭ ناتيجەسىندە 2021 جىلى وسىنداي جۇقپالى اۋرۋعا ۇشىراۋ تىركەلمەگەن. دەگەنمەن سان­دىقتاۋ اۋدانىندا 14 جاسقا دەيىنگى ءبىر بالانىڭ بويىنان انىقتالىپ وتىر. وسى ءبىر دەرەكتەردى تارازى باسىنا تارتاتۇعىن بولساڭىز, ەل ىشىندە ەكىۇداي پىكىر ايتىلىپ جاتقان ۆاكتسينانىڭ قاجەتتىلىگى تايعا تاڭبا باسقانداي كورىنىپ تۇر. ۋاقتىلى ۆاكتسينا الۋ ارقىلى ا گەپاتيتى ۆيرۋسىنىڭ جولى كەسىلدى. جامان تۇماۋعا قارسى ۆاكتسينانى ۋاقىتىندا الۋ قاجەتتىگىن, دەمىگىپ تۇرعان دەرتتىڭ الدىن الاتىن وسىنداي شارا ەكەندىگىن تاعى ءبىر قايتالاپ ايتقىمىز كەلەدى.

وڭىردە تۇرعىنداردىڭ قۇرت اۋرۋىمەن سىرقاتتانۋ دەڭگەيى وتكەن جىلمەن سالىستىرعاندا 1,3 پايىزعا ازايدى. بىلتىر تۋبەركۋلەز دەرتىنە بايلانىس­تى 305 وقيعا تىركەلگەن بولاتىن. تۇتاس كورسەتكىش كەمىگەنىمەن, قۇرت اۋرۋىنىڭ قۇتىرىپ تۇرعان وشاقتارى دا بار. ماسەلەن, اقكول, ەگىندىكول, ءبىرجان سال, زەرەندى, تسەلينوگراد, شورتاندى اۋداندارى مەن ستەپنوگورسك, كوكشەتاۋ قالالارىنىڭ تۇرعىندارى اراسىندا تۋبەركۋلەز دەرتىنىڭ ءوسۋى بايقالادى.

وڭىردە جالپاق الەمدى جالعىز تارىنىڭ قاۋىزىنا سىيعىزعان جامان تۇماۋدىڭ بەتى قايتقان سىڭايلى. دەرت جۇقتىرۋ دەرەگى سەيىلگەننەن كەيىن وبلىس جاسىل ايماقتىڭ ساناتىنا ءوتتى. ايتسە دە, توقمەيىلسۋگە, جار استىنداعى كۆي ىندەتىنىڭ قاۋپىن ەسكەرمەۋگە بولمايدى. ءدال قازىر ستانتسيونارلاردا جۇزدەن استام كوروناۆيرۋس دەرتىن جۇقتىرعان ادامدار ەم-دوم قابىلداۋدا. سوڭعى تاۋلىكتە وبلىستا 7 ادامنىڭ بويىنداعى ىندەت زەرتحانالىق جولمەن انىقتالعان. باس سانيتارلىق دارىگەردىڭ ايتۋىنا قاراعاندا, مەديتسينا قىزمەتكەرلەرىنە, ەگدە ادامدارعا, مۇمكىندىگى شەكتەۋلى ادامدارعا «كوميرناتي» ۆاكتسيناسىن قولدانا وتىرىپ, كوروناۆيرۋسقا قارسى رەۆاكتسينالاۋ جۇرگىزۋگە رۇقسات ەتىلگەن.

سونداي-اق بالالاردىڭ اماندىعى دا باستى نازاردا. 2021-2022 وقۋ جىلدارىندا 3 700-دەن استام وقۋشىنىڭ كوروناۆيرۋس ىندەتىنە شالدىققانى بەلگىلى. دەمەك ءبىلىم وشاقتارىندا ساقتىق شارالارىن مۇقيات اتقارۋعا كوڭىل بولگەن ءلازىم. ناۋرىز ايىنداعى مەرەكە كۇندەرى «كوك» جانە «جاسىل» مارتەبەدەگى ادامدارعا Ashyq قوسىمشاسى بار مەكەمەلەرگە بارىپ, ءىس-شارالارعا قاتىسۋعا بولادى. ءوڭىر قىزىل ايماقتىڭ قاتارىندا بولعان كەزىندەگى شەكتەۋلەر الىنىپ تاستالدى.

سولاي بولا تۇرا, ساقتىق شارالارىن ۇمىتۋعا استە بولمايدى. قاۋىپ بۇلتى ءبىرجولا سەيىلگەن جوق.

اقمولا وبلىسى