كاسپيدىڭ ويپاتىندا جاڭا كەن ورىندارىنىڭ اشىلۋى كومىرسۋتەك شيكىزاتىنىڭ ستراتەگيالىق رەزەرۆىن ارتتىرىپ, كومىرسۋتەكتەردى ءوندىرۋدىڭ جوعارى دەڭگەيىن ساقتاۋعا مۇمكىندىك بەرەدى. بۇل تۋرالى «ەۋرازيا» حالىقارالىق جوباسىنىڭ جۇزەگە اسىرۋ بارىسىنا ارنالعان كەڭەستە وتاندىق گەولوگتەر ايتتى.
ەكولوگيا, گەولوگيا جانە تابيعي رەسۋرستار مينيسترلىگىنىڭ اقپاراتىنا سايكەس «ەۋرازيا» حالىقارالىق جوباسىنىڭ 1-ءشى كەزەڭىن ىسكە اسىرۋ ءۇشىن كاسپيدىڭ قازاقستاندىق بولىگىندەگى ويپاتىندا گەولوگيالىق-گەوفيزيكالىق مالىمەتتەردى وڭدەپ, وزىق جانە يننوۆاتسيالىق تەحنولوگيالارىن پايدالانۋ ارقىلى كەلەسى كەزەڭدەرىنە جەتەكشى مۇناي-گاز كومپانيالارىنىڭ قاتىسۋ مۇمكىندىگى قاراستىرىلدى.
ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ ەكونوميكالىق تۇراقتىلىقتى قامتاماسىز ەتۋدە اتالعان جوبانى جۇزەگە اسىرۋدىڭ ماڭىزى زور ەكەنىن جەتكىزدى.
بيىل كاسپي ماڭىنا بايلانىستى قولدا بار بارلىق گەولوگيالىق-گەوفيزيكالىق مالىمەتتى وزىق جانە يننوۆاتسيالىق تەحنولوگيالاردى قولدانىپ, قايتا وڭدەۋ مەن ءتۇسىندىرۋ جونىندەگى جۇمىستار جۇرگىزىلەدى. سونداي-اق ودان ارعى جۇمىستاردى ناقتىلاۋ ءۇشىن كاسپي ماڭى ويپاتى شەگىندەگى نەعۇرلىم پەرسپەكتيۆالى ايماقتاردى انىقتايتىن ەسەپ ورىندالىپ جاتىر.
2-3 كەزەڭدەردە وڭىرلىك سەيسميكالىق بەيىندەردى, سەيسميكالىق ەمەس اەروگەوفيزيكالىق زەرتتەۋلەردى پىسىقتاپ, پەرسپەكتيۆالى بولىمشەلەردى شىنايى گەولوگيالىق زەرتتەۋ جانە باسسەين تۇبىندەگى نىسانداردى ىزدەۋ ماقساتىندا وزىق يننوۆاتسيالىق تەحنولوگيالاردى پايدالانىپ, الىنعان دەرەكتەردى وڭدەۋ مەن انىقتالعان ايماقتا تەرەڭ ىزدەۋ ۇڭعىماسىن بۇرعىلاۋ كوزدەلەدى.
قازاقستاندىق مۇنايشى-گەولوگتەر قوعامىنىڭ پرەزيدەنتى بالتابەك قۋاندىقوۆ جوبانىڭ 1-ءشى كەزەڭى بويىنشا ورىندالىپ جاتقان جۇمىستاردىڭ العاشقى ناتيجەلەرىن ۇسىنىپ, تاريحي دەرەكتەردى زاماناۋي تەحنولوگيالارمەن وڭدەۋ ناتيجەلەرىن كورسەتتى.
ۇيىم باسشىسى ايتقانداي, تاياۋ ارادا اتالعان جوبا وتاندىق ەنەرگەتيكالىق قاۋىپسىزدىكتىڭ ىرگەتاسىنا اينالىپ, كومىرسۋتەك شيكىزاتىنىڭ ستراتەگيالىق رەزەرۆىن ارتتىرۋعا جول اشادى.
كەڭەستە وسى جوبانىڭ 2-3-ءشى كەزەڭدەرىن جۇزەگە اسىرۋدا مۇناي-گاز كومپانيالارىنىڭ قاتىسۋ شارتتارىنا ەرەكشە نازار اۋدارىلدى.