تۇركىمەنستاندا مەرزىمىنەن بۇرىن وتكىزىلگەن پرەزيدەنت سايلاۋىندا داۋىس بەرۋ اياقتالدى, دەپ حابارلايدى Egemen.kz.
سايلاۋ جانە رەفەرەندۋمدار جونىندەگى ورتالىق كوميسسياسى 12 ناۋرىزدا جەرگىلىكتى ۋاقىت 19-00-دەگى مالىمەت بويىنشا, سايلاۋشىلاردىڭ 97,12% داۋىس بەرگەنىن حابارلادى. رەسمي دەرەك بويىنشا, بۇكىل وبلىس پەن ەل استاناسىندا داۋىس بەرۋگە كەلۋشىلەر 97% قۇراعان. بۇل كورسەتكىش شەتەلدەگى ۋچاسكەلەردە 91 پروتسەنتكە جۋىقتايدى.
ساراپشىلاردىڭ كوبى قازىرگى پرەزيدەنتتىڭ ۇلى 40 جاستاعى سەردار بەردىمۇحامەدوۆ ايقىن باسىمدىقپەن جەڭىسكە جەتەدى دەپ بولجايدى. ساياسي دوداعا ودان باسقا 8 ۇمىتكەر قاتىسقان. سەردار بەردىمۇحامەدوۆ وتكەن جىلدىڭ 11-13 اقپانىندا ۆيتسە-پرەمەر, جوعارى باقىلاۋ پالاتاسىنىڭ توراعاسى بولىپ تاعايىندالىپ, تۇرىكمەنستاننىڭ مەملەكەتتىك قاۋىپسىزدىك كەڭەسىنىڭ قۇرامىنا ەنگەن.
جاڭا مەملەكەت باسشىسىن ۇلىقتاۋ ءراسىمى 19 ناۋرىزعا بەلگىلەنىپ وتىر. تۇركىمەنستاندا پرەزيدەنت 7 جىل مەرزىمگە سايلانادى.