اقمولا وبلىسىنىڭ ششۋچينسك قالاسىندا ەسىرتكى ساۋداسىمەن اينالىسقان 63 جاستاعى ەر ادام ۇستالدى, دەپ حابارلايدى Egemen.kz وبلىستىق پوليتسيا دەپارتامەنتى ءباسپاسوز قىزمەتىنە سىلتەمە جاساپ.
ۆەدومستۆونىڭ مالىمەتىنشە, اقمولا وبلىسى پد ەسىرتكى قىلمىسىنا قارسى ءىس-قيمىل باسقارماسى قىزمەتكەرلەرىنە ششۋچينسك قالاسىنىڭ 63 جاستاعى تۇرعىنى ەسىرتكى زاتتارىن ساتۋمەن اينالىساتىندىعى تۋرالى اقپارات تۇسكەن. ەر ادام ەسىرتكى ساتقانى ءۇشىن بۇعان دەيىن دە ءىستى بولعان.
«انىقتالعانداي, ەر ادام پاتەر جالداپ, وندا ءوزىنىڭ «ەسىرتكى دۇكەنىن» اشقان. پاتەردى ءتىنتۋ كەزىندە جالپى سالماعى 16 كەلىدەن اساتىن كەپتىرىلگەن ماريحۋانا ەسىرتكى زاتى سالىنعان قاپ, ەكى پوليەتيلەن پاكەت جانە 353 گازەت تۇيىنشەگى تابىلدى. سونداي-اق تۇرعىلىقتى جەرى بويىنشا جۇرگىزىلگەن ءتىنتۋ بارىسىندا 300 مىڭ تەڭگە جانە 1200 اقش دوللارى سوماسىنداعى اقشا تاركىلەندى», - دەدى اقمولا وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى مەيرام جاپباسوۆ.
قازىرگى كەزدە كۇدىكتىگە قاتىستى قىلمىستىق كودەكستىڭ 297-بابى 3 بولىگى «اسا ءىرى مولشەردە ەسىرتكى زاتتارىن زاڭسىز وتكىزۋ» بويىنشا سوتقا دەيىنگى تەرگەۋ امالدارى جۇرگىزىلۋدە. ەر ادام ۋاقىتشا ۇستاۋ وقشاۋلاعىشىنا قامالدى.