قازاقستان رەسپۋبليكاسىنىڭ جەنەۆاداعى بۇۇ بولىمشەسى جانىنداعى جانە باسقا دا حالىقارالىق ۇيىمدار جانىنداعى تۇراقتى وكىلى ەرلان الىمباەۆ قىزىل كرەست جانە قىزىل جارتى اي قوعامدارى حالىقارالىق فەدەراتسياسىنىڭ باس حاتشىسى دجاگان چاپاگەينمەن اعىمداعى ەكىجاقتى ىنتىماقتاستىقتى جانە ونى ودان ءارى دامىتۋ پەرسپەكتيۆالارىن تالقىلادى, دەپ حابارلايدى Egemen.kz.
تاراپتار 2018 جىلى الماتىدا وتكەن قىزىل كرەست جانە قىزىل جارتى ايدىڭ 10-شى وڭىرلىك كونفەرەنتسياسىنىڭ ناتيجەلەرىن جوعارى باعالادى.
دج.چاپاگەين فەدەراتسيانىڭ ۋكرايناداعى جۇرگىزىپ جاتقان گۋمانيتارلىق قىزمەتى تۋرالى ايتىپ بەردى. سونىمەن قاتار, ول فەدەراتسيانىڭ الماتىداعى ايماقتىق وكىلدىگى نەگىزىندە گۋمانيتارلىق ديپلوماتيانىڭ وڭىرلىك حابىن قۇرۋ جوسپارلارىمەن ءبولىستى.
ە.الىمباەۆ باس حاتشىنى قازاقستاننىڭ ۋكرايناعا 2,2 ميلليون اقش دوللاردان استام سوماعا مەديتسينالىق ماقساتتاعى بۇيىمدار تۇرىندەگى گۋمانيتارلىق كومەك كورسەتۋ شەشىمى تۋرالى حاباردار ەتتى.
كەزدەسۋ سوڭىندا سۇحباتتاستار قازاقستاندا جانە ورتالىق ازيادا بىرلەسكەن جوبالاردى جۇزەگە اسىرۋ ارقىلى گۋمانيتارلىق سالاداعى ىنتىماقتاستىقتى جالعاستىرۋعا كەلىستى.