اۋىل شارۋاشىلىعىنىڭ ءبىرىنشى ۆيتسە-ءمينيسترى ايداربەك ساپاروۆ ۇكىمەت وتىرىسىندا كوكتەمگى ەگىس جانە ەگىن جيناۋ جۇمىستارىن جۇرگىزۋ ءۇشىن قارجىلاندىرۋ كولەمىن قوسىمشا 70 ملرد تەڭگەگە ۇلعايتۋ مۇمكىندىگى تۋرالى ايتتى, دەپ حابارلايدى Egemen.kz.
ايداربەك ساپاروۆ كوكتەمگى ەگىس جۇمىستارىن تابىستى جۇرگىزۋدىڭ نەگىزگى ماسەلەسى – فەرمەرلەردى نەسيە قاراجاتىمەن قامتاماسىز ەتۋ ەكەنىن جەتكىزدى.
«قازىرگى ۋاقىتتا اشم تاراپىنان كوكتەمگى ەگىس جانە ەگىن جيناۋ جۇمىستارىن جۇرگىزۋ ءۇشىن قارجىلاندىرۋ كولەمىن قوسىمشا 70 ملرد تەڭگەگە ۇلعايتۋ جانە بيۋدجەتتىك كرەديتتەۋدىڭ جالپى سوماسىن 140 ملرد تەڭگەگە دەيىن جەتكىزۋ ماسەلەسى پىسىقتالۋدا. بۇل رەتتە, 70 ملرد تەڭگە كولەمىندە قوسىمشا قاراجات بولىنگەن كەزدە ءاشتو-ءنى قولجەتىمدى كرەديتتەۋمەن قامتۋ ۇلعايتىلادى, بۇل شامامەن 1 300 شارۋاشىلىقتى قوسىمشا قارجىلاندىرۋعا مۇمكىندىك بەرەدى», دەپ ءتۇسىندىردى ايداربەك ساپاروۆ.
ول وسى جىلى «اگرارلىق نەسيە كورپوراتسياسى» اق جەلىسى بويىنشا كوكتەمگى ەگىس جانە ەگىن جيناۋ جۇمىستارىن نەسيەلەندىرۋگە 70 ملرد تەڭگە كولەمىندە بيۋدجەتتىك نەسيە بولىنگەنىن ەسكە سالدى.
بۇگىنگى كۇنى «كەڭ دالا» باعدارلاماسى اياسىندا رەسمي تۇردە 77,6 ملرد تەڭگە سوماسىنا 2673 ءاشتو ءوتىنىم كەلىپ ءتۇستى, ونىڭ ىشىندە:
24,1 ملرد. تەڭگە سوماسىنا ءاشتو-ءنىڭ 720 ءوتىنىمى قارجىلاندىرىلدى; 40,4 ملرد. تەڭگە سوماسىنا ءاشتو-ءنىڭ 1748 ءوتىنىمى ماقۇلداندى; 13,1 ملرد.تەڭگە سوماسىنا 205 ءاشتو ءوتىنىمى قاراستىرىلۋدا.