ارالاس جەكپە-جەك الەمىندەگى ەڭ ۇزدىك بەس پروموۋشەننىڭ ءبىرى – رەسەيدىڭ اسا ليگاسى الداعى ايلاردا جەڭىل سالماقتا كۇش سىناسىپ جۇرگەن ەڭ مىقتى سەگىز سپورتشىنىڭ باسىن قوسىپ, جاقسى ءبىر جارىستىڭ جالاۋىن جەلبىرەتۋدى كوزدەپ وتىر. سول ءدۇبىرلى دودادا ءبىزدىڭ ارتەم رەزنيكوۆ تا ونەر كورسەتەدى.
ارتەم رەزنيكوۆ – شىعىس قازاقستان وبلىسىنداعى ريددەر قالاسىنىڭ تۋماسى. جاسى 30-دا. بوزبالا شاعىندا ەركىن كۇرەسكە مىقتاپ دەن قويعان ول بىرقاتار جارىستا جۇلدە الدى. سودان كەيىن «سوڭعى يمپەراتور» اتانعان داڭقتى سپورتشى فەدور ەمەليانەنكوعا ەلىكتەپ, ارالاس جەكپە-جەكپەن اينالىستى. بۇل رەتتە دە ارتەم ەلەۋلى تابىستارعا قول جەتكىزدى. 10 جىلدان استام ۋاقىت ىشىندە 28 كەزدەسۋ وتكىزىپ, 22 رەت جەڭىسكە جەتتى. 17 قارسىلاسىن ەسىنەن تاندىردى. 70 كيلو سالماقتا كۇش سىناسىپ جۇرگەن جەرلەسىمىز العاشقى توعىز جەكپە-جەگىندە جەڭىسكە جەتسە, ونىنشى مارتە وكتاگونعا شىققاندا رەسەيلىك گەورگي كيچيگينگە ۇپاي سانىمەن ەسە جىبەردى. ودان كەيىن ول تاعى بەس باسەكەنى ءوز پايداسىنا شەشتى.
ا.رەزنيكوۆتىڭ سپورتتىق عۇمىرىندا قۇلدىراۋ كەزەڭى دە بولدى. 2016-2017 جىلدارى ول قاتارىنان بەس كەزدەسۋدە جەڭىلىستىڭ كەرمەك ءدامىن تاتتى. بىراق بۇل جاعداي جەرلەسىمىزدىڭ جىگەرىن جاسىتقان جوق. كەرىسىنشە, ءار ساتسىزدىكتەن ساباق العان شىعىستىڭ شىمىر جىگىتى ودان كەيىنگى سەگىز باسەكەدە ءوزىنىڭ ۇستەمدىگىن پاش ەتتى. ياعني 2017 جىلدىڭ قاراشا ايىنان بەرى ول ەشكىمنەن جەڭىلگەن جوق. رەزنيكوۆتەن تاياق جەگەندەر اراسىندا رەسەيلىك ميحايل بالاكيرەۆ, حاسان حاليەۆ, حامزات اۋشەۆ, يۋسۋف رايسوۆ جانە تاعى باسقا تانىمال سپورتشىلار بار. قازىرگى كەزدە وتانداسىمىز اسا رەيتينگىندە ءۇشىنشى ورىندى يەلەنۋدە. قازىرگى كەزدە كوپتەگەن جانكۇيەر ارتەمنىڭ جەڭىل سالماقتىڭ ۇزدىگى ابدۋل-ءازيز ابدۋلۆاحابوۆپەن چەمپيوندىق بەلبەۋ ءۇشىن وتەتىن باسەكەسىن تاعاتسىزدانا كۇتۋدە.
اتالعان جارىسقا قاتىساتىن سەگىز سپورتشىنىڭ ازىرگە التاۋىنىڭ عانا ەسىمى بەلگىلى. سولاردىڭ قاتارىندا ارتەم رەزنيكوۆتەن بولەك, امەريكالىق لۋيس پەنيا, برازيليالىق حاكران دياس, رەسەيلىك الي باگوۆ, ەدۋارد ۆارتانيان جانە يۋسۋف رايسوۆ سىندى سپورتشىلار بار. بۇل جىگىتتەردىڭ بارلىعى دا «كىممەن بولسا دا ايقاسۋعا دايارمىز» دەپ جۇلقىنىپ تۇر.
28 جاستاعى لۋيس انتونيو پەنيا يتاليانىڭ نەاپول قالاسىندا دۇنيەگە كەلگەن. كەيىننەن امەريكاعا قونىس اۋدارىپ, اقش-تىڭ ازاماتتىعىن الدى. لاقاپ اتى – «اشۋلى» («Violent»). بارلىعى 14 مارتە جەكپە-جەككە شىققان ول 10 رەت جەڭىس تويىن تويلادى. سوڭعى توعىز كەزدەسۋىن پەنيا UFC-دە وتكىزدى. لۋيس – «قىلقىندىرۋ» ءادىسىن ورىنداۋدىڭ حاس شەبەرى.
حاكران دياستىڭ جاسى – 37-دە. ول ريو-دە-جانەيرو قالاسىندا تۋىپ-ءوستى. دجيۋ-دجيتسۋدى جەتىك مەڭگەرىپ, قارا بەلبەۋ يەگەرى اتانعان برازيليالىق وسى سپورت تۇرىنەن ۇزدىكسىز ءوتىپ تۇراتىن جارىستارعا سوناۋ 2005 جىلدان بەرى قاتىسىپ كەلەدى. 2012-2017 جىلدار ارالىعىندا دياس تا UFC-دە ونەر كورسەتتى. بارلىعى 34 رەت وكتاگونعا شىققان وڭتۇستىك امەريكا وعلانىنىڭ 26 رەت مەرەيى ۇستەم بولدى. سول باسەكەلەرىنىڭ تەڭ جارتىسىن ول مەرزىمىنەن بۇرىن اياقتادى.
31 جاستاعى الي باگوۆ – قاباردا-بالقاردىڭ تۋماسى. ول – دجيۋ-دجيتسۋدان الەم چەمپيونى, گرەپپلينگتەن دۇنيەجۇزىلىك اسكەريلەر ويىندارىنىڭ جەڭىمپازى. ارالاس جەكپە-جەكپەن 2009 جىلدان بەرى اينالىسىپ جۇرگەن الي 42 مارتە ايقاس الاڭىنا شىعىپ, 31 رەت كوزدەگەن ماقساتىنا قول جەتكىزدى. سەگىز سايىستى ايقىن باسىمدىقپەن اياقتادى. وسىدان 12 جىل بۇرىن باگوۆ جاس جۇلدىز حابيب نۋرماگومەدوۆپەن شەبەرلىك بايقاسىپ, ودان ۇپاي سانىمەن ۇتىلدى.
30 جاستاعى ەدۋارد ۆارتانيان ەرەۆاندا تۋدى. ەرتەرەكتە ول اتا-اناسىمەن بىرگە ماسكەۋدىڭ ىرگەسىندەگى ۆيدنوە قالاسىنا كوشىپ باردى. ول سامبودان الەم كۋبوگىنىڭ يەگەرى اتانسا, تاي-بوكستان رەسەي چەمپيوناتىندا توپ جاردى. وكتاگونعا 26 مارتە شىققان ۆارتانيان 22 رەت ۇستەمدىك تانىتتى. سول باسەكەلەردىڭ تەڭ جارتىسىندا قارسىلاستارىن ەسىنەن تاندىردى.
يۋسۋف رايسوۆتىڭ ەسىمى ءبىزدىڭ جانكۇيەرلەرگە جاقسى تانىس. چەشەنستاندا سوعىس باستالعان كەزدە بولاشاق سپورتشىنىڭ اكە-شەشەسى رەسەيدىڭ ساراتوۆ وبلىسىنا قونىس اۋداردى. سول جەردە يۋسۋپ دۇنيە ەسىگىن اشتى. جاۋىنگەرلىك سامبونى جاقسى مەڭگەرگەن ول 2014 جىلى ارالاس جەكپە-جەكتەن ءوزىنىڭ تۇساۋكەسەر كەزدەسۋىن وتكىزدى. سودان بەرى 20 رەت ايقاس الاڭىنا شىعىپ, سونىڭ تەك ەكەۋىندە عانا ۇتىلدى. 11 باسەكەنى مەرزىمىنەن بۇرىن اياقتادى. «بورز» («قاسقىر») دەگەن بۇركەنشىك ەسىمدى يەمدەنگەن 26 جاستاعى سپورتشىنىڭ جولى قازاقستاندىقتارمەن ەكى مارتە قيىستى. وسىدان سەگىز جىل بۇرىن استانادا ول جۇماكەلدى جالعاس ۇلىن جەڭسە, 2020 جىلدىڭ كۇزىندە ماسكەۋدە ارتەم رەزنيكوۆقا ەسە جىبەردى. كەزىندە يۋسۋپ جارتىلاي ورتا سالماقتا اتالعان ليگانىڭ چەمپيوندىق بەلبەۋىن يەلەندى.
الداعى اسا تۋرنيرىندە سەگىز ساڭلاق ۇستىمىزدەگى جىلدىڭ سوڭىنا دەيىن ءبىر-بىرىمەن ايقاسىپ, سولاردىڭ اراسىندا كىمنىڭ مىقتى ەكەنى انىقتالادى. باس جۇلدەنى ولجالاعان سپورتشى 200 مىڭ دوللار كولەمىندە سىياقى الادى. وزگە جىگىتتەر دە قۇرالاقان قالمايدى. ولار دا وزدەرىنىڭ جەتكەن مەجەلەرىنە سايكەس اقشالاي سىيلىققا يە بولادى. ال وسى جارىستىڭ جالپى جۇلدە قورى 800 مىڭ دوللاردى قۇراپ وتىر.