كورنەكتى عالىم مارات بارمانقۇلوۆتىڭ تۋعانىنا – 85 جىل

مارات بارمانقۇلوۆ – ەلىمىزدەگى جۋرناليستيكا عىلىمي مەكتەبىنىڭ نەگىزىن قالاعان, ۇلتتىق تەلەراديو حابارلارىن تاراتۋعا ەلەۋلى ۇلەس قوسىپ, كوپتەگەن شاكىرت تاربيەلەگەن عالىم. ول ءال-فارابي اتىنداعى قازۇۋ جۋرناليستيكا فاكۋلتەتىندە 35 جىلدان استام ۋاقىت قىزمەت ەتتى.

مەرەيتويعا وراي ۇيىمداستىرىلعان «جۋرناليستيكا بارشاعا: مەديا جانە تەحنولوگيانىڭ جاڭا بۋىنى» اتتى عىلىمي كونفەرەنتسيادا قاتىسۋشىلار وتاندىق جانە الەمدىك جۋرناليستيكاسىنىڭ دامۋىن تالقىلادى. كورنەكتى عالىمنىڭ شاكىرتتەرى, جاس عالىمدار بارمانقۇلوۆتىڭ زەرتتەۋلەرى بۇگىنگى زاماندا دا وزەكتى ەكەنىن اتاپ ءوتتى.

جۋرناليستيكاعا ەرەن ەڭبەك سىڭىرگەن مارات بارمانقۇلوۆ – بۇقارالىق كوممۋنيكاتسيا, مادەنيەتتانۋ جانە تۇركىتانۋ بويىنشا كوپتەگەن كىتاپتاردىڭ اۆتورى. «جالپىعا ارنالعان جۋرناليستيكا», «تەلەۆيزيا مەن راديوداعى رەپورتاج», «تەلەۆيزيا: بيزنەس الدە بيلىك؟» اتتى كىتاپتارى قازاق تىلىنە اۋدارىلدى. سونداي-اق ول تۇركى الەمىن ءجىتى تانۋعا تالپىندى. بۇل باعىتتا كوپ جىل ىزدەنىپ, «تۇركى دۇنيەسى», «التىن بابا» دەپ اتالاتىن تاريحي-تانىمدىق ەڭبەكتەرىن جارىققا شىعاردى.

– بىزدە تاۋمان اماندوسوۆ, تەمىربەك قوجەكەەۆ وسى قاتاردا تۇراتىن ۇلكەن ۇلى ۇستازداردىڭ ءبىرى – مارات كارىباي ۇلى بارمانقۇلوۆ. بيىل بۇل كىسىنىڭ 85 جىلدىعىن اتاپ ءوتىپ جاتىرمىز. بىرىنشىدەن, كەيىنگى ۇرپاق ءۇشىن, بۇگىنگى جاستار ءۇشىن, ستۋدەنتتەر ءۇشىن ۇلگى-ونەگە بولارلىق دۇنيە, – دەدى جۋرناليستيكا فاكۋلتەتىنىڭ دەكانى سانسىزباي ماديەۆ.

كونفەرەنتسيا بارىسىندا قازاق جۋرناليستيكاسىنىڭ دامۋى, باق تەحنولوگيالارى مەن تەندەنتسيالارى, جاڭا مەديا مەن تسيفرلىق ءداۋىردىڭ قيىندىقتارى, اقپاراتتىق مادەنيەت, باق كادرلارىن دايارلاۋ ماسەلەلەرى, پروفەسسور م.ك.بارمانقۇلوۆتىڭ شىعارماشىلىعى, زەرتتەۋلەرى جانە مۇرالارى بويىنشا عىلىمي ەڭبەكتەر قابىلداندى.

جۋرناليستيكا فاكۋلتەتىندە مارات بارمانقۇلوۆ اتىنداعى ارنايى اۋديتوريا بار. ونىڭ كىتاپتارى ستۋدەنتتەردىڭ وقۋ باعدارلاماسىنا ەنگىزىلگەن. الداعى ۋاقىتتا عالىمنىڭ جاقىندارى مەن ارىپتەستەرى ونىڭ مۇراسىن جيناقتاپ, كوپ تومدىق كىتاپ ەتىپ شىعارۋدى كوزدەيدى.