ەلوردادا باق وكىلدەرى اراسىندا ۆولەيبولدان تۋرنير ءوتتى

قر يندۋستريا جانە ينفراقۇرىلىمدىق دامۋ مينيسترلىگى ءباسپاسوز قىزمەتى ۇيىمداستىرعان «Mير PRESS CUP - 2022» تۋرنيرىنە رەسپۋبليكالىق باق-تان 7 ايەلدەر كومانداسى قاتىستى: «Qazaqstan» رترك, «حابار» اگەنتتىگى, «جەتىنشى ارنا», «ەۋرازيا ءبىرىنشى ارناسى», «Baq.kz» اقپارات پورتالى, «ەگەمەن قازاقستان» جانە «ايقىن» گازەتتەرى.

جەرەبە قورىتىندىسى بويىنشا كوماندالار ەكى توپقا ءبولىنىپ, ولاردىڭ جەڭىمپازدارى فينالدا تۋرنير كۋبوگىنا تالاستى. باس جۇلدە اقتىق سايىستا جەڭىسكە جەتكەن «Qazaqstan» رترك كومانداسىنا بۇيىردى. ەكىنشى ورىندى «جەتىنشى ارنا» قىزمەتكەرلەرى يەلەندى. قولا جۇلدە «حابار» اگەنتتىگىنىڭ قورجىنىندا. جۇلدەلى ءتورتىنشى ورىن «Baq.kz» اقپارات پورتالىنىڭ ارۋلارىنا تاپسىرىلدى.

جارىسقا بەلسەندى قاتىسقان «ەۋرازيا ءبىرىنشى ارناسى» - «كورەرمەن كوزايىمى», «ەگەمەن قازاقستان» گازەتى - «ەڭ سۇيكىمدى كوماندا», «ايقىن» گازەتى - «ەڭ سۇلۋ كوماندا» اتالىمدارىن يەلەنىپ, باعالى سىيلىقتارمەن ماراپاتتالدى.

«جارىس ماقساتى - جۋرناليستەر اراسىنداعى دوستىقتى ارتتىرۋ, حالىقارالىق ايەلدەر مەرەكەسىمەن قۇتتىقتاۋ.

سپورتتىق سايىس بولعاندىقتان سالاۋاتتى ءومىر سالتىن ناسيحاتتاۋ. دوستىق بار جەردە-ءوسۋ بار, بىرلىك بار جەردە-بەرەكە بار. سونى قولداپ, بۇگىن وسىنداي ءىس-شارا وتكىزىپ جاتىرمىز. بۇل جەردە ماڭىزدىسى ءبىرىنشى, ەكىنشى ورىن الۋ ەمەس, وسىندا كەلىپ قاتىسۋ, باس قوسىپ, ءبىر-بىرىمەن تانىسۋ. ءبىزدىڭ دە ۇيىمداستىرۋداعى ماقساتىمىز – سول», دەيدى قر يدم ءباسپاسوز حاتشىسى جانجىگىت ومارحان.

ايتا كەتەرلىگى, تۋرنيرگە Qazaq geophysics جانە Kazakhmys barlau كومپانيالارى قولداۋ ءبىلدىردى. ۇيىمداستىرۋ جۇمىستارىنا BAQ League جۋرناليستەر ليگاسى اتسالىستى. BAQ League - باق ۇجىمدارى ءۇشىن «تيمبيلدينگ».

بۇعان دەيىن ميني-فۋتبولدان توعىز ماۋسىم جانە ۆولەيبولدان چەمپيونات وتكىزگەن. جالپى العاندا BAQ League ماۋسىمدارىنا قازاقستاننىڭ ءتۇرلى وڭىرلەرىنەن 50-دەن استام باق-تان 700-دەن استام جۋرناليست قاتىستى.