جامبىل وڭىرىندە العىس ايتۋ كۇنىنە وراي بىرقاتار ءىس-شارا ءوتتى. وعان جامبىل وبلىسىنىڭ اكىمى بەردىبەك ساپارباەۆ قاتىسىپ, اۋەلى «قازاق ەلىنە مىڭ العىس» مونۋمەنتىنە گۇل شوقتارىن قويدى. سونىمەن قاتار اۋليەاتا وڭىرىندە وتكەن ءىس-شارالارعا جەرگىلىكتى جۇرتشىلىقپەن قاتار, بىرقاتار مەكەمە باسشىلارى مەن وكىلدەرى دە قاتىستى.
«تاريحتان بەلگىلى, ءبىزدىڭ اتا-بابالارىمىز سوعىس, اشارشىلىق سەكىلدى قيىن كەزەڭدەردە ەلىمىزگە قونىس اۋدارىلعان كوپتەگەن ەتنوس وكىلىن شەتكە قاقپاي, باۋىرىنا باسقان. ءبىر ءۇزىم نانىمەن ءبولىسىپ, قوناقجايلىق تانىتقان. سول دوستىق پەيىل, بىرلىگىمىز بۇگىنگە دەيىن جالعاسىپ كەلەدى. بىرلىك – باق-بەرەكەنىڭ باستاۋى دەمەكشى, ءبىز كوپەتنوستى مەملەكەتىمىزدىڭ ىنتىماعىن, تاتۋلىعىن ساقتاۋعا ءتيىسپىز. قوعامدىق كەلىسىم – تۇراقتىلىعىمىزدىڭ, دامۋىمىزدىڭ كەپىلى. بارشاڭىزعا قورداي, بايزاق, كەشەگى قاڭتار وقيعالارى كەزىندە بىرلىكتەرىڭىزدى كورسەتىپ, تۇسىنىستىك تانىتقاندارىڭىز جانە قالىپقا كەلتىرۋ جۇمىستارىنا بەلسەندى اتسالىسقاندارىڭىز ءۇشىن العىس ايتامىز. «بەيبىتشىلىك پەن كەلىسىم», «اسارلاتىپ ءۇي سالۋ», «تارازعا تارتۋ», «جومارت تۇلەك» سەكىلدى جوبالاردىڭ جەمىستى جۇزەگە اسۋىنا كورسەتكەن قولداۋلارىڭىزعا ريزاشىلىعىمدى بىلدىرگىم كەلەدى. بۇل جوبالار مۇقتاج جانداردىڭ الەۋمەتتىك ماسەلەلەرىن شەشۋگە ىقپال ەتە وتىرىپ, بارشا جامبىلدىقتاردى بىرلىككە, قامقورلىققا, پاتريوتتىققا ۇندەيدى», دەدى ب.ساپارباەۆ. سونداي-اق ايماقتاعى ەتنو-مادەني ورتالىقتاردىڭ وكىلدەرى مەرەكەنىڭ ماڭىزدىلىعىن اتاپ ءوتىپ, باۋىرمال قازاق ەلىنە دەگەن العىستارىن ءبىلدىردى.
بۇدان كەيىن وبلىس اكىمى بەردىبەك ساپارباەۆ «قوعامدىق كەلىسىم» مەكەمەسىنىڭ «دوستىق» ۇيىندە جاسى جۇزگە كەلگەن بىرقاتار ارداگەردى, قوعام بەلسەندىلەرى جانە ءتۇرلى سالا قىزمەتكەرلەرىن, جاپپاي تارتىپسىزدىك پەن توتەنشە جاعدايلار كەزىندە قىزمەتتىك مىندەتىن ادال اتقارعان ازاماتتاردى ماراپاتتادى. «قارعىس الما, العىس ال!», دەگەن جاقسى ءسوز بار. العىس ايتۋ – ادامداردىڭ ءبىر-بىرىنە دەگەن ريزاشىلىعى, قۇرمەتى. بۇگىندە جامبىل وبلىسىندا 90-عا جۋىق ەتنوستىڭ وكىلدەرى تاتۋ-ءتاتتى ءومىر سۇرۋدە. ولاردىڭ اراسىنداعى بىرلىك پەن كەلىسىمدى ساقتاۋ, دوستىق قارىم-قاتىناستى دامىتۋ بارشامىزدىڭ مىندەتىمىز. ءبىز ەڭ ءبىرىنشى اعا بۋىن اتا-اپالارىمىزعا ەلەۋلى ەڭبەكتەرى ءۇشىن العىس ايتۋعا ءتيىسپىز. ءوڭىرىمىزدىڭ وركەندەۋى جولىندا جەمىستى جۇمىس اتقارىپ, دەمەۋشىلىك, قايىرىمدىلىق شارالارىنا بەلسەنە اتسالىسىپ جۇرگەن كاسىپورىندارعا, قوعامدىق ءتارتىپتى قامتاماسىز ەتىپ جۇرگەن قۇقىق قورعاۋ, توتەنشە جاعداي سالاسىنىڭ قىزمەتكەرلەرىنە, وبلىستىڭ دامۋىنا اتسالىسىپ جۇرگەن ءتۇرلى سالا قىزمەتكەرلەرىنە, دارىگەرلەرگە, مۇعالىمدەرگە, سپورتشىلارعا جانە بارشا جەرلەستەرىمىزگە العىس ايتامىز», دەدى اكىم. سونىمەن قاتار بايزاق اۋدانىنان 95 جاستاعى قاريا سەرىك ماماي ۇلى ءسوز الىپ, ءوزىنىڭ يگى تىلەگىن جەتكىزدى. «سوڭعى جىلدارى وبلىس ورتالىعى كوركەيىپ, تاماشا كەيىپكە ەنىپ كەلەدى. وبلىستىڭ بارلىق باعىتىندا وڭ وزگەرىستەر بايقالادى. وسى جولدا ايانباي ەڭبەك ەتىپ جۇرگەن بارشا ازاماتقا ريزاشىلىعىمدى جەتكىزگىم كەلەدى. قاڭتار وقيعاسى سەكىلدى كەلەڭسىز وقيعالار قايتالانباسىن دەپ تىلەيمىن. ەلىمىزدە تەك بەيبىتشىلىك, تۇراقتىلىق بولسىن», دەدى ول.
العىس ايتۋ كۇنىنە وراي «كونە تاراز» كەشەنىنىڭ الاڭىندا تۇرعىندارعا ارنالىپ كونتسەرتتىك باعدارلاما, سپورتتىق ءىس-شارالار, كورمە, ۇلتتىق ويىندار ۇيىمداستىرىلىپ, تەگىن ىستىق تاماقتار تاراتىلدى.
جامبىل وبلىسى