امانات ورىندالۋىمەن قۇندى

ءوزىمىز بەتىنە كۇيە جاعىپ شىعارىپ سالعان سوتسيا­ليزم كەزەڭىندەگى باسپاسوزدە حالىق قالاۋلىلارى – دەپۋتاتتارعا ارنالعان «اماناتقا ادال بول» دەگەن ايدار بار ەدى. سول ايدارمەن جاريالانعان ماتەريالداردا ءار دەپۋتاتتىڭ اتقارعان ءىسى مەن جەكە ادامعا جاساعان قامقورلىعى تۋرالى ايتىلاتىن.

ەندى Nur Otan پارتياسىنىڭ اتاۋى Amanat بولىپ وزگەردى.

الەۋمەتتىك جەلىدە وسى اتاۋ Otan بوپ قالا بەرۋى كەرەك ەدى دەگەن پىكىرتالاس وربۋدە. ەجەلگى قوڭسىمىز – ورىستار «رودينانىڭ» الدىنا ءسوز قويعان جوق, ءبىز عانا وتاننىڭ الدىنا ءتۇسىپ كەتتىك. ولار «رودينا-مات» دەپ انانى وتاننان كەيىن قويدى. 1905 جىلى شىققان م.گوركيدىڭ «انا» پوۆەسىندە تۇڭعىش رەت «جۇمىسشىلار 8 ساعاتتىق جۇمىس كۇنىن تالاپ ەتەدى!» دەگەن سويلەم جازىلدى. وسى تالاپ ورىندالىپ, قوعام وسى كۇنگە دەيىن 8 ساعاتتىق جۇمىس كۇنىنە اۋىس­تى. ءار پارتيانىڭ وتپەلى ەمەس, ومىرلىك باعدارلاماسى بولۋ كەرەك. ماسەلەن, «اۋىل» پارتياسىنىڭ تالابى ورىندالىپ جاتىر ما؟ پارتيا قوعامىمىزعا وزگەرىس ەنگىزۋگە ىنتالى ما؟ وندا نەگە اۋىل شارۋاشىلىعى قۇلدىراپ كەتتى؟

امانات − سيمۆولدىق ۇعىم. اكەنىڭ بالاعا اماناتى – اكەدەن وق بويى وزىق بولۋ, گەنەرال پانفيلوۆتىڭ 28 گۆاردياشىلارعا اماناتى – ماسكەۋدى قورعاپ قالۋ. قازاقستاندىق پانفيلوۆشىلار سول اماناتتى ورىندادى. ال ۇرپاقتارى ءتىل مەن جەردى ساقتاپ قالۋ دەگەن امانات ءۇشىن جانتالاسىپ ءجۇر.

امانات – تاريحي ۇعىم. بۇل – اۋزىنا قىمىز تامىزىپ جاتقان باتىردىڭ سوڭعى ءسوزى, ءتىپتى شەجىرە شەرتكەن كىتاپ­­تار­دىڭ اتاۋى دا – امانات. بولسىن دەيىك. بىراق سول اما­­نات جەردە قالماسىن. مىنا «اماناتتى» ەستىگەندە بەل­­دى بەكەم بۋىپ, ەرگە قايتا قونىپ, جاۋعا اتتانداي شاپ­قان اسەر­دەمىن. سولاي-اق بولسىن. تەك قولدى تازا ۇستاپ, ادام­زاتتى الالاماي, جاڭا ىسكە كادر تاڭداۋدا اماناتقا ادال بولۋ كەرەك. پارتيا بولاشاعى – حالىقتىڭ بولاشاعى. بىزدە ءبىلىمى تەرەڭ, بىراق جولى قىسقا بوپ جۇرگەن جىگىتتەر جەتەر­لىك. پارتيا وسىنداي بولاشاققا جاسىل باعدارشام بوپ جانۋى كەرەك.

 تاريحشى الكەي مارعۇلان, گەولوگ قانىش سات­باەۆ, ديقان ىبىراي جاقاەۆ پەن شوپان جازىلبەك قۋانىش­باەۆتىڭ اماناتىن جەردە قالدىرمايىق. امانات – ورىندالۋىمەن قۇندى.

قۋاندىق تۇمەنباي,

جازۋشى