قىسقى جول قاشاندا قاۋىپتى. جار باسىنا جاسىرعانىڭ جارلاۋىتتىڭ استىنان سىعالاعانداي كورىنىپ تۇرادى. وڭىردەگى اۆتوجولداردان 64 ءتۇرلى كەلەڭسىزدىكتىڭ بەتى اشىلعان.
ءبىزدىڭ وڭىردە ادەتتە اتان تۇيەنى الىپ جىعاتىن اق بوران, ۇسكىرىك اياز ءجيى بولاتىن. بيىل قىس قاھارىنا مىنە قويعان جوق. سونىڭ وزىندە كۇرە جولداردىڭ بويىن تاۋ-تەڭىز قار باسىپ, وكپەك جولاۋشىنىڭ وكپەسىن ءوشىرىپ تۇر. قىس بويى جۇزدەگەن كولىك اق بوراننىڭ تۇتقىنىندا قالىپ, تالاي جولاۋشى قۇتقارىلدى. جول-كولىك وقيعاسى دا ورىن الۋدا. وسىنىڭ بارلىعى جول بويىنداعى جونسىزدىكتەن. كەي تۇستا جول سىلتەپ, باعىت باعامداتار بەلگى دە جوق, بارىنىڭ ءوزىن داۋىل جۇلمالاپ, جارامسىز ەتىپ تاستاعان. قايسىبىرى قارعانىڭ سىنعان قاناتىنداي بولىپ قالقيىپ تۇر.
جىل باسىنان بەرى كۇرە جولداردىڭ بويىنا 18 مارتە ينسپەكتسيالىق رەيد جۇرگىزىلدى. جولاۋشىنىڭ قامى. قار باسقان جولدا قاڭتارىلىپ قالۋ كىمگە بولسىن وڭاي ەمەس. ءبىرىنشى قيىندىق – كولىك وتە المايتىن كۇرەسىننىڭ كوپتىگى. ءوڭىر جولدارىندا 227 جەردە قار تولىپ قالاتىن ۋچاسكەلەر بار ەكەن. اۋەل باستا, جول قۇرىلىسىن جۇرگىزگەن كەزدە جەلدىڭ باعىتىن, تابيعاتتىڭ ەرەكشەلىگىن ەسكەرۋ كەرەك ەدى. قار تۇسكەن سايىن قاربالاس تا كوبەيمەك. قاۋىپ كوبەيگەن سوڭ كوكشەتاۋ – ششۋچە, كوكشەتاۋ – ومبى باعىتتارىنداعى تاس جولدىڭ بويىن باقىلاۋ ءجيى جۇرگىزىلەدى.
– بىرقاتار كەمشىلىك انىقتالىپ وتىر, – دەيدى جول اكتيۆتەرى ۇلتتىق ساپا ورتالىعى وبلىستىق فيليالىنىڭ ينجەنەرى يگور ستەفان, – مەردىگەر ۇيىمدارعا ۇيعارىلىمدار جىبەرىلدى. ەگەر كەمشىلىكتەر ۋاقتىلى جويىلماسا, ءتيىستى شارا قابىلداۋ ءۇشىن وبلىستىق پوليتسيا دەپارتامەنتىنە دە حابار جولدايمىز.
قىسقى جولدىڭ قاۋپى تۋرالى جولاۋشىلارعا ەسكەرتۋ از ايتىلىپ جاتقان جوق. بۇل ورايدا بار مۇمكىندىك تەگىس پايدالانىلۋدا.
– ەڭ الدىمەن ادامداردىڭ امان بولعانى كەرەك. قىسقى جولدى كۇتىپ ۇستاۋ, قاسات قاردىڭ قۇرساۋىنان تازالاۋ از شارۋا ەمەس, – دەيدى Aqmola – adaldyq alany جوبالىق كەڭسەسىنىڭ جەتەكشىسى ساميرا تايتەنوۆا, – تۇرعىندار تاراپىنان تۇسكەن ارىز-شاعىم ۋاقىتىندا تەكسەرىلەدى. ەل ەسكەرتۋىنە نازار اۋدارۋ ارقىلى توتەنشە وقيعالار ورىن العان جوق.
كوكتەم دە كەلىپ قالدى. قار قۇرساۋىنان قۇتىلعانىمىزبەن, كەيبىر جول بويىن ورىپ كەتەتىن قىزىل سۋدىڭ دا قاۋىپ توندىرەتىندىگىن قاپەردەن شىعارماعانىمىز ءجون. ساقتىق شارالارىن بۇلجىتپاي ورىنداعاندا عانا جولاۋشىنىڭ جولى بولماق.
اقمولا وبلىسى