قاي اۋرۋ ايتىپ كەلۋشى ەدى؟! قاۋىپتى ۆيرۋس تا تۇتقيىلدان ساپ ەتە قالىپ, ابىگەرگە سالاتىن اپات سەكىلدى ەكەنىنە كوز جەتتى. جاھان جۇرتىن شىرماۋىقتاي شىرماعان دەرتكە جاسى ۇلعايعان اعا بۋىننان باستاپ, جارىق دۇنيە ەسىگىن ەندى اشقان نارەستەلەر دە شالدىعىپ جاتىر.
وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ مالىمەتىنە سۇيەنسەك, 2020 جىلدىڭ ناۋرىزىنان بەرى 62 195 ادامنان COVID-19 ينفەكتسياسى انىقتالىپ وتىر. سودان بەرى ناۋقاستاردىڭ 98,2%-ى ساۋىعىپ شىقتى. سوڭعى ەكى اپتادا كوروناۆيرۋس ينفەكتسياسىن جۇقتىرۋ دەرەگى 2,6 ەسەگە تومەندەدى. وڭىردە 24 اقپانداعى دەرەككە سايكەس قاۋىپتى ۆيرۋسقا شالدىققان 346 ادام ءۇي جاعدايىندا, ال 47 ناۋقاس 2 360 ورىندىق ينفەكتسيالىق ستاتسيوناردا, 106 توسەكتىك ورىنعا ارنالعان جانساقتاۋ بولىمىندە جاعدايى ناشارلاعان بەس ناۋقاس ەم قابىلداۋ ءۇشىن وقشاۋلانعان.
ماسەلەن, قۇرمانعازى اۋدانىندا تۇراتىن ەرلى-زايىپتى زەينەتكەرلەر ءساۋىرباي ءداۋىتوۆ پەن جەمىس جانتەمىروۆانىڭ جاسى – 74-تە. ەكەۋى دە كوروناۆيرۋس ينفەكتسياسىن جۇقتىرعان. ولار 1 اقپاندا جەدەل جاردەممەن اتىراۋعا جەتكىزىلىپ, اۋرۋحاناعا اۋىر جاعدايدا تۇسكەن.
– باستاپقىدا ناۋقاستاردىڭ دەنە قىزۋى كوتەرىلىپ, تابەتى تومەندەگەن. ەنتىكپە, تاماق, باس اۋرۋى 23 قاڭتاردان باستاپ مازالاعان. الايدا اۋرۋ بەلگىلەرى 31 قاڭتاردا كۇشەيگەن. دارىگەرلەر ناۋقاستاردىڭ دەنساۋلىعىنا ءجىتى تەكسەرۋ جۇرگىزدى. ەرلى-زايىپتى زەينەتكەرلەردە كوروناۆيرۋس ينفەكتسياسىنا قارسى پتر زەرتتەۋى وڭ ناتيجە كورسەتتى. ەر ادامنىڭ وكپەسىنىڭ 17%-ى, ال ايەلدە 42%-ى زاقىمدانعانى بەلگىلى بولدى, – دەپ ءمالىم ەتتى №2 وبلىستىق اۋرۋحانانىڭ ءباسپاسوز قىزمەتى.
جەمىس جانتەمىروۆاعا ەكىجاقتى پوليسەگمەنتارلى پنەۆمونيا دياگنوزى قويىلىپتى. ينفەكتسيالىق ستاتسيوناردىڭ جانساقتاۋ بولىمىندە 9 كۇن ەم قابىلدادى. جاعدايى جاقسارعاننان كەيىن ۇيىنە شىعارىلعان.
– اۋرۋحاناعا تۇسكەن ساتتەگى جاعدايىمدى ايتىپ جەت- كىزە المايمىن. دەم الۋ قيىنعا ءتۇستى. باس اۋرۋى مازالاپ, دەنە قىزۋىم 38 گرادۋسقا دەيىن كوتەرىلدى. اق حالاتتى ابزال جانداردىڭ جىلى ءسوزى مەن حاتتاماعا سايكەس جۇرگىزگەن ەمىنىڭ ارقاسىندا جاعدايىم جاقساردى. الەمدى قاۋىپتى ىندەت شارپىعان قيىن ساتتە №2 وبلىستىق اۋرۋحانانىڭ دارىگەرلەرى مەن مەدبيكەلەرى, باسقا دا قىزمەتكەرلەرى ەش مويىماي, اجالدان اراشالاپ قالدى. «ساۋىعىپ شىعاسىز, اجە!» دەپ دەمەۋ بولعان مەيىرىمدى جاندارعا العىستان باسقا ايتارىم جوق, – دەيدى جەمىس جانتەمىروۆا.
دارىگەرلەر جاقىنىڭا جاناشىر بولۋدىڭ, قاۋىپتى ۆيرۋستى تەجەۋدىڭ ءبىر عانا جولىن ۇسىنادى. بۇل – ۆاكتسينا سالدىرۋ. بىراق ۆاكتسينا سالدىرۋ ءالى دە باياۋ ەكەنى بايقالىپ وتىر. وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ ايتۋىنشا, بىلتىرعى 1 اقپاننان بەرى ۆاكتسينالاردىڭ ءبىرىنشى كومپونەنتىن 268 149 ادام ەكتىرگەن. ۆاكتسينالاردىڭ ەكىنشى كومپونەنتىن سالدىرعان اتىراۋلىقتاردىڭ سانى 253 252 ادامعا جەتكەن.
سونداي-اق 20 قاراشادان بەرى Pfizer ەكپەسىن سالدىرۋ جالعاسىپ جاتىر. بۇل ۆاكتسينانى الاتىن 12 مەن 18 جاس ارالىعىنداعى بالالار سانى 63 138 ادامدى قۇرايدى. بالا ەمىزەتىن جانە جۇكتى ايەلدەر سانى – 35 362. وسى كەزگە دەيىن Pfizer ەكپەسىن وسى ساناتقا كىرەتىن 6 900 ادام سالدىرعان.
بىلتىرعى 23 قاراشادا باستالعان رەۆاكتسينالاۋدان وتەتىندەر تىزىمىنە 97 493 اتىراۋلىق ەنگىزىلگەن. رەۆاكتسينالاۋدى ءبىرىنشى كەزەكتە دارىگەرلەر مەن پوليتسەيلەر, مۇعالىمدەر, قۇقىق قورعاۋ ورگاندارى مەن ارنايى مەكەمەلەردىڭ قىزمەتكەرلەرى, مەملەكەتتىك قىزمەتشىلەر, سونداي-اق ستۋدەنتتەر مەن سوزىلمالى سىرقاتپەن ەسەپتە تۇرعان پاتسيەنتتەر الادى. قازىر اتالعان ساناتتارداعى 38 756 ادام قايتا ۆاكتسينالاۋدان وتكەنى بەلگىلى بولىپ وتىر.
اتىراۋ وبلىسى