ءنادىر ءنادىروۆتىڭ ەسىمى جۇرتشىلىققا ۇلتتىق عىلىم اكادەمياسىنىڭ اكادەميگى, وتاندىق مۇناي-حيميا عىلىمي مەكتەبىنىڭ نەگىزىن قالاۋشى رەتىندە تانىمال. ىزدەنىسكە تولى عىلىمي جەتىستىكتەرىمەن عىلىمنىڭ بيىك شىڭىنا كوتەرىلگەن عالىم ءبىر شوعىر شاكىرت تاربيەلەدى.
س.وتەباەۆ اتىنداعى اتىراۋ مۇناي جانە گاز ۋنيۆەرسيتەتىندە اكادەميكتىڭ 90 جىلدىعىنا وراي «عىلىمي داستۇرلەر ساباقتاستىعىنىڭ جانە ماماندىققا ادالدىقتىڭ جارقىن ۇلگىسى» تاقىرىبىندا ءنادىروۆ وقۋلارى ءوتتى. وعان وتاندىق مۇناي-گاز سالاسىنداعى تانىمال ارىپتەستەرى مەن عالىمنىڭ وتباسى قاتىستى. اتالعان ءىس-شاراعا ونلاين فورماتتا قوسىلعان رەسەي فەدەراتسياسىنىڭ, ازەربايجان مەن قىرعىزستان رەسپۋبليكاسىنىڭ عالىمدارى عيبراتتى عۇمىر يەسى تۋرالى ەستەلىگىمەن ءبولىستى.
اكادەميك مۇناي-گاز ونەركاسىبى ءۇشىن بىلىكتى ماماندار دايارلاۋعا دا ۇلەس قوسقان. كەيىن مۇنايلى وبلىستىڭ قۇرمەتتى ازاماتى اتاندى. ەندى مىنە, س.وتەباەۆ اتىنداعى اتىراۋ مۇناي جانە گاز ۋنيۆەرسيتەتىنىڭ بازاسىندا اشىلعان حيميالىق ينجەنەريا جانە ەكولوگيا ينستيتۋتىنا بەرىلىپ, ەسكەرتكىش تاقتا قويىلدى.
– ءنادىر ءنادىروۆ – كوپ قيىندىق كورگەن عالىم. كەزىندە قىزىلوردا وڭىرىنە جەر اۋدارىلىپ كەلىپ, ءوزىنىڭ «حالىق جاۋى» ەمەس ەكەنىن دالەلدەۋ ءۇشىن مىڭداعان قۇجات جيناپ, وقۋعا ءتۇستى. كەيىن ايگىلى عالىم اتاندى. اكادەميك تەك ءبىر سالامەن شەكتەلمەي, عىلىمنىڭ بىرنەشە سالاسىن يگەردى. سوندىقتان بۇگىنگى جاستار مۇناي حيمياسىنا عانا بايلانىپ قالماي, ءوز مۇمكىندىگىن كەڭەيتۋگە نازار اۋدارۋى كەرەك, – دەيدى پارلامەنت سەناتىنىڭ دەپۋتاتى باقىتجان جۇماعۇلوۆ.
اتىراۋ وبلىسى