قايتكەندە قىلمىس ازايادى؟ قايتكەندە ءىزىن سۋىتپاي اشىلادى؟ قايتكەندە قىلمىستىڭ الدىن الۋعا بولادى؟ قۇقىق بۇزۋشىلىقتىڭ الدىن الۋ شارالارى جونىندەگى ۆەدومستۆوارالىق كوميسسيانىڭ ماجىلىسىندە وسى ساۋالدار وتكىر قويىلدى. وبلىس وڭىرىندە وتكەن جىلى قىلمىس 2012 جىلمەن سالىستىرعاندا 13,5 پايىزعا وسكەن. قۇقىق پروفيلاكتيكاسىنىڭ ءار ءۇش جىلعا بەلگىلەنەتىن وڭىرلىك باعدارلاماسى شەڭبەرىندە 2011-2013 جىلدارى اتقارىلعان جۇمىستار قورىتىندىلاندى. بىراق وبلىس اكىمى نۇرالى سادۋاقاسوۆتىڭ ايتۋىنشا, قىلمىسپەن كۇرەستە شەپتى بۇزعان, ەلەڭ ەتەرلىك ەشتەڭە بايقالمادى. ونىڭ ەسەسىنە ادام ءولتىرۋ, زورلاۋ, ۇرلىق, بۇزاقىلىق سەكىلدى قىلمىستىڭ اۋىر تۇرلەرى ازايار ەمەس. ءتىپتى, وبلىستىڭ كەيبىر اۋداندارىندا ءورشىپ تۇر دەۋگە دە بولادى. مىسالى, قىلمىس تاران اۋدانىندا وتكەن جىلى 96,8, ليساكوۆ قالاسىندا 85,9, امانگەلدى اۋدانىندا 77,3 پايىزعا كوبەيگەن.
وبلىستىق ىشكى ىستەر باسقارماسىنىڭ باسشىسى تىلەگەن ماتكەنوۆ قىلمىستىڭ كوبەيۋ كورسەتكىشىن قىلمىس سيپاتىنداعى كەلگەن دابىلدىڭ بارلىعىن تىركەگەننەن دەپ ءتۇسىندىردى. سوندا بىلتىر وڭىردە بارلىعى 25580 قىلمىستىق ارەكەتتەر تىركەلگەن. اسا اۋىر قىلمىستار ازايعانىمەن, ونىڭ اشىلۋى دا بۇرناعى جىلدارمەن سالىستىرعاندا كوڭىل كونشىتپەيدى. مىسالى, الدىڭعى جىلى اسا اۋىر قىلمىس 80 پايىزعا اشىلىپ, كىنالىلەر دالەلدەنسە, بىلتىر بۇل كورسەتكىش 69 پايىزبەن شەكتەلدى. سونىمەن قاتار, الاياقتىق فاكتىلەرىنىڭ تورتتەن ءبىرى اشىلۋسىز, ۇرلىقتىڭ 7 پايىزى دا جۇمباق كۇيىنشە قالعان. وبلىس وڭىرىندە ەسىرتكىمەن بايلانىستى قىلمىس تۇرلەرىنىڭ كوبەيۋى الاڭداتارلىق حالدە. گەنەرال ەسەپتى جىلى 406 كيلوگرامم ەسىرتكى زاتتارىنىڭ تاركىلەنگەنىن تىلگە تيەك ەتتى. بۇل الدىڭعى جىلعا قاراعاندا 124 كيلوگرامعا كوپ جانە 318 ەسىرتكى قىلمىسى انىقتالعان. قىلمىستاردىڭ اشىلىپ جاتقانى دا بۇرىنعىعا قاراعاندا از, ياعني 12,2 پايىزعا كەمىپ كەتكەن.
تىلەگەن ماتكەنوۆ بۇل ماسەلەدە وسى سالانىڭ ماتەريالدىق-تەحنيكالىق جاعىن نىعايتۋدى, باقىلاۋ بەينەكامەرالارىنىڭ, بەينەتىركەمەلەردىڭ جەتىسپەۋشىلىگىن, وبلىستا ماماندار مەن قىزمەتكەرلەر سانىن 500-گە دەيىن جەتكىزۋ كەرەكتىگىن ايتتى. ءبىراق بيۋدجەتتەن ىشكى ىستەر ۆەدومستۆوسىنا بولىنگەن قارجىنى از دەۋگە بولمايدى.
– 2011 جىلدان بەرى وبلىستىق ىشكى ىستەر باسقارماسىنىڭ بيۋدجەتى 16 پايىزعا كوبەيدى, وتكەن جىلى ول 6 ميلليارد تەڭگەنى قۇرادى. قىلمىستىق جاعدايدىڭ ناشارلاعانىنان باسقا ناتيجەسىن كورىپ وتىرعانىمىز جوق, – دەدى وبلىس اكىمى نۇرالى سادۋاقاسوۆ.
ال كادر ماسەلەسىنە كەلگەندە تەك سان قۋ ءادىسى ورىن الىپ وتىرعان سىڭايلى. قازىر اۋىلدىق-سەلولىق وكرۋگتەردىڭ بارلىعىندا ۋچاسكەلىك ينسپەكتور بار. بىراق ۋچاسكەلىك ينسپەكتورلاردىڭ 30 پايىزى اۋىلدا تۇرمايدى. ولار دا اۋىلداعى جەرىن قالادا وتىرىپ وڭدەيتىن «اسفالتتىق كاسىپكەرلەر» سەكىلدى, وزدەرى اۋدان ورتالىعىندا نەمەسە قالادا تۇرىپ, اۋىلدا قىزمەت ىستەيدى. جاعداي مىنە, وسىنداي.
ءنازيرا جارىمبەتوۆا,
«ەگەمەن قازاقستان».
قوستاناي.